VOV4.M’nông: Đah nuih n’hâm gơih nđơr, lŏ ngăch prăl tâm nkra njêng tăch rgâl, wa Phạm Ngọc Thân ta thôn 4, xă Tân Hòa, nkuăl Buôn Đôn (Dak Lak) lĕ dơi ntô̆ n’hao lah ngoăy tâm 63 nuĭh ƀon lan nkra njêng-tăch rgâl blău bah lam dak năm 2021. Mô knŭng nkra njêng tăch rgâl blău, wa hôm geh nuih n’hâm uĕh rnôk kơl âk nuĭh tâm rmôt nuĭh ƀon lan hao rklaih ach o n’hanh nsrôih rgop ndâk njêng ƀon lan mhe kơt ntop kơl ăp nuĭh geh nău rêh jêr jŏt ta ntŭk.

Nô Hoàng Đức Dũng ta thôn 6, xă Tân Hòa nkah gĭt mro wa Phạm Ngọc Thân, yor dơi dơn lăp pah kan ta ntŭk kan tăch rgâl lŭ loih choih xi măng đah prăk khay 6 rkeh prăk/khay. Mô knŭng ndrĭ, wa Thân hôm an rnăk wâl nô Dũng manh prăk mô sŏk prăk kon gay mât rong bê hun hao wăng sa. Dơn prăk manh bah wa Thân nô rwăt 8 mlâm bê ntil sĭt mât. Jêh rlău du năm râ̆ hao geh rlău 50 mlâm, nô tăch đêt rwăt tay du kôp ndrôk ntil. Rơh aơ, nô Dũng lôch uĕh geh tay. Mât rong geh nsĭt rnglăy, rnăk wâl lĕ jêh trok prăk me n’hanh geh 1 mlâm jay têh 70 m2, mât rong 2 hê kon hăn nti.

          “Gâp lăp kan an wa Thân bah rlău 5 năm bah năp. Jêh nĕ gâp manh bah wa 100 rkeh prăk gay rwăt bê mât, jêh bê deh tăch đêt hăn rwăt ndrôk gay năp tâm nău rêh. Aƀaơ geh mbơm oi. Rlău ma prăk khay 70 rkeh prăk bah wa Thân, ri geh bah ndrôk n’hanh bê dơi geh 10 rkeh prăk tay, rgop geh rlău 100 rkeh prăk. Rnăk wâl geh prăk ƀư jay, mât ăp mon hăn nti”.

Dơi wa Phạm Ngọc Thân kơl, âk rnăk jêr jŏt ta nkuăl Buôn Đôn n’hanh nkual kiău ma lĕ rklaih ach o, đê̆ đŏng rlet hao ƀư ndrŏng.

          Wa Tô Văn Liệu-Groi Kruanh Hội nông dân nkuăl uănh lah, ăp năm bah năp rmôt kan wa Phạm Ngọc Thân mô knŭng nkra njêng, tăch rgâl blău, ma hôm lah rmôt kan dŭt n’hâm râng ăp nău ƀư, ntrong leo tâm rlong an ăp gưl Hội Nông dân rgŏ jă; rgop tâm ăp ndơ ƀư, ntung trong ndâk njêng ƀon lan mhe ta ntŭk; nkre, wa dŭt n’hâm đŏng, jao an khoa học kỹ thuật mât rong, tuch tăm an hang rhiăng nuĭh êng ta nkuăl Buôn Đôn; tăch an manh phân, dak si mpa rong tơm tăm đah prăk kon mô sŏk an ăp rnăk ach o... Đah nău ntop kơl bah wa Phạm Ngọc Thân, âk nuĭh ta xă Tân Hòa n’hanh nkual kiău ma, đê̆ đŏng hao ƀư sâm geh.

          “Wa Thân lĕ ntop kơl thôn 4 xă Tân Hòa ƀư Ngih rƀŭn thôn, nkra ăp trong hăn tâm thôn. Nkre kơl prăk lŏng bôk tôr kơl âk rnăk jêr jŏt êng ta xă mô lah nkual ƀon têh Buôn Ma Thuôt, ndâk ƀư jay sa tâm kơl ta Ngih dak si nkuăl Buôn Đôn gay nuĭh ach o geh piăng sa; an ndrôm sam ƀŭt an kon se ach o dơi tât ngih sam ƀŭt. Rmôt kan nuĭh ƀon lan ƀư lŏ mir nkuăl dôl pơk hvi tay ntrong kan ntoh lư gĭt blău gay rêng hvi tâm ntŭk gŭ rêh, âk rnăk ach o dơi kơl mô lah dơi ntop kơl”.

          Mhe aơ, wa Phạm Ngọc Thân lĕ sŏk ndơ nkhôm “Nuĭh ƀon lan nkra njêng-tăch rgâl blău lam dak năm 2021”. Wa Thân nkoch, wa ndâk ƀư nău kan bah 2 jâng lang mpang ty dơm, hăn pah kan bu, hăn manh prăk, tĭng njoăt hao đah cà phê, tiêu, mât ndrôk. Yơn gay rgâl mhe, wa lĕ mô klach rlong soan. Bah tăch rgâl pring xăng, ndơ ƀư ngih wâl, phân poh n’hanh dak si mpa rong tơm tăm, jêh nĕ ƀư mir nhan lồng, ndâk ƀư mât sĭm lŭng lang...

Săk rnglăy, aƀaơ wa lĕ geh du rot ntŭk tăch ndơ n’hanh mir n’gar, sŏk geh rlău 15 rmen prăk du năm. Nkre ƀư, nkre săch, mĭn rvê, wa Phạm Ngọc Thân dôl mât trong nchrăp têh. Wa mbra mô rlu ta wăng sa rnăk wâl, ma mbra tâm rgop đah âk rnăk êng pơk hvi nău geh bah nkual neh Buôn Đôn.

          “Mpôl hên hôm uănh khlay tâm nău mât ntop kơl ntuh kơl an kônh wa ƀon lan. Gâp hôm e nchrŏng trong an rnăk wâl n’hanh du đêt kônh wa tâm thôn pơk hvi mât sĭm lŭng lang, ndâk ƀư ndơ lŭng lang kloh uĕh tâm di OCOP gay ndơ̆ an ntŭk tăch lam ntŭr neh. Tal 2, gâp dôl ndrel nău kan lŏ mir nkuăl ndâk njêng HTX nkra njêng tăch rgâl tăm nhãn ta ndrĭch neh têh ta xă Tân Hòa. Gâp mpŏng ăp nău mbra dơh n’hanh lôch jêng”.

Wa Phạm Ngọc Thân lah ngoăy tâm 63 nuĭh ƀon lan nkra njêng tăch rgâl blău lap sŏk bằng khen bah Kruanh Quốc hội.

          Đah ăp nău geh tâm nkra njêng kơt trong kan kơl nuĭh âk năm bah năp wa Phạm Ngọc Thân lĕ dơi ăp gưl rmôt kan ta Dak Lak an âk ndơ rnê nkhôm; lơn lah tâm năm 2021 aơ, wa ngoăy tâm 63 nuĭh ƀon lan nkra njêng tăch rgâl blău lam dak lap dơi Kruanh Quốc hội Vương Đình Huệ an bằng khen. Wa dơi kơp dơn mô knŭng yor nău rlet rlău jêr jŏt ƀư ndrŏng uĕh di dơi rnê ryơk, yor nuih n’hâm ngăn ngên nchrăp an kơl kônh wa, yor trong uănh n’hanh nău nsrôih ndrel n’gâng kan ƀon lan n’hanh nuĭh ƀon lan ta ntŭk, rgâl neh sât blak ƀon nơm jêng nkual tuch tăm âk ntil n’hanh uĕh jêng./.

          Nuĭh rblang: Y Sưng Phê Ja