VOV4.Mnông- Đah nău dơi geh, nău ơm geh mpeh ăp ntil ndơ tuch tăm, ndrel đah ăp ntrong kan, nău kơl bâh n’gor, lôch 3 năm mbơh ƀư nău kan, bôk nău kan ăp xã du ntil ndơ (OCOP) ta Đăk Lăk lĕ geh âk nău dơi ueh khlăy, njêng nău trĕ lam, mpơl na nê̆ nău ntơ ndơ bum mbo ta ntŭk.

            Ndrel đah cà phê, ca cao lah ngoăy tâm 1 ntil ndơ dơi geh uănh lah tơm khlăy, nău dơi khlăy bâh n’gor Dak Lak. Yơn lah ăp năm ntơm nơh, ca cao ta Dak Lak mô nă geh gĭt tât n’hanh dŭt âk lah tăch mô hŏ geh nkret ƀư. Rnoh khlăy mô âk, ê hŏ geh sŏk dŏng lĕ nău ta nkual ƀon lan mhe. Dơn gĭt saơ nău mô dơi nĕ, wa Trương Ngọc Quang, Giám đốc Công ty TNHH Ca Cao Nam Trường Sơn ta xã Ea Na, nkuăl Krông Ana lĕ mât uănh joi gĭt ntŭk tăch rgâl, ntuh kơl máy mok, ntil ndơ ueh mhe gay ma nkret njêng ăp ntil ndơ ueh bâh ca cao kơt lah: ca cao môi, bơ ca cao, kẹo socola...gay ma an saơ nău dơi ueh, công ty lĕ tât râng uănh năl ntil ndơ OCOP gâl n’gor.

Tât aƀaơ, 3 ntil ndơ geh: ca cao môi, kẹo socola krăk, kẹo socola dak toh bâh Công ty geh 4 sao tâm lĕ rnoh 8 ntil ndơ ntoh lư bâh 4 sao gâl n’gor. Wa Trương Ngọc Quang, Giám đốc Công ty an gĭt:

            “Lôch rnôk ntil ndơ bâh công ty geh kơp dơn OCOP 4 sao gâl n’gor, nĕ lah ntung njo gay ma công ty tât râng ta ntrong kan ăp ntŭk tăch ndơ OCOP. Bâh ăp ntŭk tăch ndơ OCOP du gâl mpơl nău dơi tâm ban kơt nău ueh bâh ndơ geh ƀư, bâh nĕ năch geh knơm n’hanh geh rnê âk. Bâh ăp ntŭk tăch ndơ OCOP aơ rĭ ndơ geh tât ti nuĭh dŏng na nê̆ lơn n’hanh ngăch lơn”.

            Tĭng nău mbơh bâh wa Võ Văn Sơn, Giám đốc HTX tuch tăm pâl nđaih Thăng Bình, xã Cư Kty, nkuăl Krông Bông, n’gor Dak Lak: Kơp dơn OCOP an ntil ndơ aơ ăp nar lơ ma geh mât uănh, jêng nău kan khlăy an ăp ntŭk tăch rgâl, nkra njêng. Ăp ntil ndơ geh kơp dơn OCOP lah du njoat kan rnê uănh nău khlăy, kơl ndơ geh ƀư geh mât đăp mpăn ueh kah, ntil ƀư ueh, dung tâl ueh, gĭt na nê̆ tu tơm n’hanh n’hao nău tâm rlong ta ntŭk tăch rgâl.

An saơ na nê̆ ngăn lah ntil phe kloh HTB bâh hợp tác xã rnôk geh UBND n’gor Dak Lak kơp dơn lah ntil ndơ OCOP 3 sao, rnoh khlăy tăch rlău 2 tơ̆ đah ba năp, rnoh ndơ tăch hao bâh 200 tấn hao tât 400 tấn/năm, nsĭt tay nău geh ueh mpeh âk nău kan an hợp tác xã tâm ban kơt ăp ntŭk kan ndrel. Wa Võ Văn Sơn nkoch:

            “ Ntơm nơh ntil ndơ way ơm geh ƀư mô geh nuĭh gĭt tât, tăch rgâl mô jêr đŏng, yơn bâh ntơm geh kơp dơn OCOP n’hao nău dơi lư ndơ geh hao du njoat mhe mpeh nău ueh, nău kah, ndơ geh ƀư rnôk nĕ nuĭh dŏng ndơ mbra dơh geh uănh năl, gĭt năl, geh gĭt n’hanh tăch rvăt ndơ bâh nơm. Aơ lah nău geh ueh mhe bâh ăp ntil ndơ ơm geh bâh ƀon lan kan lŏ mir rnôk geh ndơ ƀư geh kơp dơn OCOP ăp sao n’hanh lah rơh nkhêp gay ma ndơ bâh ƀon lan tâm ƀon geh tăch ntŭk tăch rgâl têh”.

            Wa Nguyễn Hoài Dương, Giám đốc ntŭk kan tuch tăm mât rong n’hanh hun hao ƀon lan n’gor Dak Lak an gĭt: Dak Lak aƀaơ geh 46 ntil ndơ OCOP, tâm nĕ, geh 8 ntil ndơ geh rnê ntơ 4 sao, n’hanh 38 ntil ndơ geh rnê 3 sao. Nău pă ntil, uănh năl, rnê jêng sao ăp ntil ndơ OCOP lah nău an saơ nău ueh, ntil ndơ geh ƀư. Nău aơ tâm rgop n’hao nău gĭt vât, dơn kan bâh nuĭh ƀon lan, doanh nghiệp tâm nău pah kan, mât đăp mpăn nău ntơ OCOP tâm ban kơt nău dơi geh bâh nuĭh dŏng ndơ. Tâm let năp tay, n’gâng kan tuch tăm mât rong mbra geh tâm rgop đah n’gâng kan công thương mbơh tơih tay ăp ntil ndơ OCOP lĕ ơm geh ta ntŭk tât đah nuĭh dŏng ndơ tâm n’hanh bah dih dak.

            “Nău tâm rgop tăch rvăt ndơ lah nău kan dŭt khlăy tâm ntrong kan rdâk njêng nău khlăy rnoh ndơ OCOP. Uănh năl dơi nău kan aơ geh ntŭk kan công thương dôl ndơ̆ an UBND n’gor an dŏng mbra kơl âk gay ma âk ntŭk tăch ndơ OCOP mbra geh njêng. Bâh nĕ, tâm rgop đah ăp ntŭk, ăp nkual tâm lam dak gay ma geh tăch rvăt ndơ geh ƀư, ntrôl ndơ geh ƀư OCOP hun hao têh dăng tâm let năp tay”.

            Nău nsrôih ndơ̆ ndơ ta ntŭk geh kơp dơn ndơ OCOP dôl jêng nău nsrôih gay  ma kơl an hun hao nău wăng sa nkual ƀon lan ta Dak Lak. Nău aơ lĕ njêng soan nsan têh dăng an rdâk njêng nkual ƀon lan mhe nâp nâl bâh nău kan mpơl saơ na nê̆ nău dơi knơm an ntil ndơ ta ntŭk.

Nuĭh rblang: Thị Đoắt