VOV4.Mnông- Ta nkuăl Cư M’gar, n’gor Dak Lak nău ji pŭn ntô n’hanh ji ndul djroh sŭr Châu Phi dôl ntưp trêng ƀư an âk rnăk mât rong khuch khat âk.

          Mpôl ndrôk ntưp nău ji pŭn ntô bơi khĭt lĕ rngôch, wa bu ur Hoàng Thị Chấn ta tổ dân phố 8, nkuăl têh Quảng Phú, nkuăl Cư Mgar n’gor Dak Lak dŭt rngot rnôk prăk kiah rnăk vâl mât rong aƀaơ lĕ roh dơm. Wa Chấn an gĭt, mpôl ndrôk 4 mblâm aƀaơ lĕ khĭt 3 mblâm, khuch khat bơi tât 100 rkeh prăk.

          “Lĕ kuăl bu tât gay ma chuh n’gang, njrăng nău nuh srê, puh dak si da dê đŏng. Yơn lah srê ngăch ngăn, ba năp nơh ndrôk me khĭt, 3 nar lôch nĕ ndrôk kon khĭt đŏng. Aƀaơ tât kon aơ bơi tât 2 khay geh srê tay păng khĭt đŏng”.

          Ndrel đah nău ji pŭn ntô ta rpu ndrôk, aƀaơ ta nkuăl Cư Mgar geh nău ji ndul djroh sŭr Châu phi dôl geh ntưp trêng ngăch đŏng. Wa Nguyễn Ngọc Đương, ta thôn Hiệp Hòa, xã Quảng Hiệp, nkuăl Cư Mgar an gĭt, 3 mblâm sŭr me n’hanh sŭr sŏk poăch bâh rnăk vâl nchrăp tăch lĕ khĭt yor nuh srê, rnoh su jăng  dŭt âk.

          “Mpôl hên lĕ geh chuh n’gang tŏng ăp vac xin 3 tâm 1, srê ji ndul, tôr brâp, sôt mbung plôk nchop. Mpôl hên an gŭ rong êng dŭt đăp mpăn mô gĭt ntŭk tât ntưp rêng păng. Nar bôk năp geh saơ 1 mblâm ntô gŭr, tât tal 2 lĕ mpôl sŭr khĭt lĕ rlău jât mblâm, nđâp ma sŭr me tât sŭr sa poăch. Gâp geh mbơh an ntŭk kan thú y xã, n’gâng kan xã bu sŭr sŏk mẫu xét nghiệm rĭ mbơh lah ntưp srê ji ndul djroh sŭr châu phi”.

          Tĭng rnoh kơp bâh ntŭk kan tuch tăm mât rong n’hanh hun hao ƀon lan nkuăl Cư Mgar, tât aƀaơ nău ji ntô pŭn ta ndrôk rpu ntoh ta 42 thôn, ƀon, tổ dân phố ta 14 xã, nkuăl têh. Mpôl kan têh lĕ geh su jăng 88 mblâm rpu ndrôk đah lĕ rnoh bơi tât 8.500kg. Đah nuh srê ji ndul djroh sŭr châu phi ntưp rêng ta 9 xã, nkuăl têh, đah rnoh su jăng bơi tât 26 rbăn kg.

          Wa Nguyễn Quang Đức, kruanh trạm mât rong thú y nkuăl Cư M’gar an gĭt, aƀaơ n’gâng kan thú y lĕ geh chuh vacxin an kon rong, nkre lah tâm rgop đah n’gâng kan ta ntŭk n’hao kâp njrăng, ntrôl dăng nău kan mât uănh, mât njrăng nău nkhĭt roch, nchoăn rdeng, tăch rvăt ndrôk sŭr ta ntŭk.

          “Rnôk geh nuh srê, Trạm thú y n’hanh ntŭk kan tuch tăm mât rong n’hanh hun hao ƀon lan nkuăl lĕ geh dŏng ăp ntrong kan ndăn ngăch kơt lah puh dak si, chuh vacxin đah nău ji pŭn ntô săk. Tât aƀaơ nuh srê lĕ dơi njrăng. Rnôk tăng geh mbơh geh tay nuh srê rĭ trạm mbra jŭr uănh nđôi, mât njrăng ta ntŭk, sŏk ntil nău ji njoăl ta ntŭk kan ba lơ gay ma xét nghiệm. Tâm rnôk kâp nău geh lah kon rong lah geh khĭt rĭ mbra su jăng. Lah nău geh ntưp ji rĭ mbra njrăng rdâng ta ntŭk n’hanh mbơh ta ntŭk dâl gay ma ndrel njrăng rdâng.

Nuĭh rblang: Thị Đoắt