VOV4.M’nông: Ta năp nô nău ntưp rêng ngăch bah nuh srê pŭn ntô ndrôk, rpu, n'gor Dak Lak dôl an chuh n'gang ngăch vaccine gay rdêl bah nuh srê, hŭch bah khuch khat an nuĭh mât rong ta ntŭk.

Wa Lê Văn Chín, Kruanh Ntŭk mât rong n'hanh Thú y  nkuâl Cư Kuin, n'gor Dak Lak an gĭt, nuh srê pŭn ntô ndrôk, rpu ntoh ta n'gor ntơm bah nar 8/6 mhe aơ ta xã Ea Ning n'hanh hŏ ntưp rêng ngăch tât ăp xã êng ƀa ƀă tâm lam nkuâl. Tât aƀaơ, nuh srê hŏ geh ta 19 thôn, ƀon mpeh 8 xã, đah bơi 50 mblâm ndrôk geh ntưp  ji, tâm nê 42 mblâm ân nkhĭt su jăng. Ta năp nău tât krit nji bah nuh srê, ntơm bah n'gul khay 6 UBND nkuâl Cư Kuin hŏ mbơh geh nuh srê ta nkuâl n'hanh n'gluh tơm prăk rnă ntêm lor 700 rkeh prăk gay rvăt vaccine n'hanh dak si, ƀư chuh n'gang n'hanh rdêl bah ăp tơm nuh srê. Wa Lê Văn Chín lah:

“Nhih pah kan mât rong mbra ƀư puh nkhĭt kaman ta ntŭk tâm ăp nkual geh nuh srê dĭl. Aơ lah du nău ji mhe jêng ân n'hao dăng nkô̆ nău nkoch trêng an kônh wa, ntrŭt nsôr kônh wa su jăng tâp bôr ăp ndrôk geh ji dja, n'hanh geh rnoh ndơ ntop kơl bah Ngih dak kơt lah Nghị định 02 an kônh wa. Nkre ntop kơl n'gâng kan ta ntŭk vaccine n'hanh dak si gay chuh njrăng n'gang an  nkual geh ntưp ji".

          Kơp tât n'gul khay 7, nuh srê pŭn ntô ndrôk, rpu hŏ ntưp geh ta 76 rnăk ta 9 nkuâl bah n'gor Dak Lak. Lĕ rngôch rnoh âk geh ntưp lah 135 mblâm ndrôk, tâm nê ân su jăng 69 mblâm đah rnoh âk lah rlău 12,5 tấn. Ndrel đah nkuâl Cư Kuin hŏ mbơh nuh srê, nuh srê ta nkuâl Krông Păk dôl tâm nô nău duh hô đŏng đah rlău 60 mblâm ndrôk geh ji, 17 mblâm ân nkhĭt su jăng. Bol mô hŏ mbơh nuh srê yơn nkuâl Krông Păk hŏ n'gluh tơm prăk rnă ntêm lor gay rvăt bơi 7.000 dĭng vaccine rdêl bah n'hanh mpă wêl ta ăp xã geh nô nău nuh srê krit nji.

          Ta 7 nkuâl hôm ƀa ƀă bah n'gor Dak Lak, nuh srê geh nchah nchrai. Ta năp nô nău dja, âk rnăk mât rong hŏ tâm boh, ntop kơl cán bộ thú y tât hăn chuh n'gang. Ăp ntŭk mât rong têh hŏ lor nchrăp rvăt vaccine sĭt chuh an ndrôk, rpu mô kâp tơm vaccine ntop kơl. Wa Nguyễn Quang Đức, Kruanh ntŭk kan Mât rong n'hanh Thú y nkuâl Cư M’gar an gĭt, lôch ta nkuâl geh ntoh nuh srê pŭn ntô ndrôk, rpu ta 5 rnăk, ntŭk kan mât rong hŏ su jăng 3 mblâm ndrôk geh ji jru nkre an ƀư ăp trong nkra njrăng n'gang bah nuh srê.

          “Lam nkuâl aƀaơ chuh geh nklăp 2.000 dĭng, nuĭh ƀon lan sŏk ndơ nơm hăn chuh êng. Gay chuh n'gang vaccine dja ri nuĭh mât rong ân đăng ký đah cán bộ gưl xã tĭng ƀư chuh. Ta năp măt ri ntŭk kan dak si mât rong ndrel đah ăp xã, thị trấn tĭng groi nđôi tay nuh srê, ntĭm nti nkra bah ngăch. Tâl 2, gay njrăng, n'gang nuh srê dja ri ân n'hao dăng trong mât chăm, mât uănh ndrôk, rpu, tĭng groi nđôi, saơ  nuh srê lah săm dĭl. Nkre mât kloh uĕh puh nkhĭt kaman ndrung n'gar".

          Tĭng wa Thủy Lệ Vũ, Groi Chi Cục trưởng mât uănh Chi cục Mât rong n'hanh Thú y Dak Lak, tât rnôk dja, lam n'gor hŏ chuh rlău 40 rbăn dĭng vaccine njrăng n'gang nuh srê pŭn ntô ndrôk rpu. Gay nta trong dơh an nuĭh ƀon lan, chi cục hŏ tâm ôp đah tơm ntŭk pă an ndơ̆ rlău 20.500 dĭng vaccine sĭt ta ntŭk tăch ndơ bah chi cục. Ndrel đah nê, chi cục nsŏng kơl an UBND n'gor, dăn sŏk bah tơm prăk rnă ntêm lor bah n'gor gay rvăt tay vaccine ntop kơl an nuĭh mât rong đŏng.

          “Mpôl hên hŏ lor nchrăp dăn prăk bah Ủy ban n'gor, ri nsrôih an dŭt ơm geh prăk dŏng n'hanh ƀư tâm rlong ndranh rvăt vaccine sĭt rhŏ dŏng an nuĭh ƀon lan lah chuh n'gang. Pah kan chuh n'gang lah n'glêh an tât rdêl bah nuh srê ntưp rêng, lôch nê ri mơ nkhĭt tut rkăy, puh nkhĭt kaman ntŭk gŭ rêh n'hanh mât mêr an ngăch dăng uĕh. Aƀaơ, nău gĭt êng bah kônh wa mpeh nău dja lah dŭt âk n'hanh hŏ lor nchrăp rvăt vaccine sĭt chuh đŏng, jêng nô nău nuh srê aƀaơ ta n'gor lah mô ir rvê hôm mô duh jêr kơt ăp n'gor mpeh bah lơ".

          Tĭng wa Thủy Lệ Vũ đŏng, aƀaơ dôl lăp tâm n'gul khay mih, ăp ntil tut rkăy kăp jêng geh âk nău ji deh rơ̆ âk dŭt dơh jêng nuh srê ntưp rêng. Jêng, rlău ma chuh n'gang vaccine ăp tŏng, nuĭh mât rong ân njrăng mât kloh uĕh ndrung n'gar; puh nkhĭt kaman nkual mât rong, nkhĭt tơm ntưp rêng bu tuh kơt tut rhuăy, rkăy; n'hao dăng mât mêr gay an sĭt dăng săk suan an ndrôk, rpu./.

Nuĭh rblang: Điểu Thân