VOV4.M’nông: Ăp năm mhe aơ, play prit nkŏ dơi uănh lah tơm tăm tơm nsĭt geh tay wăng sa an nuĭh ƀon lan ăp xã nkual jru ngai Cư Pui, Cư Đrăm n'hanh Yang Mao, nkuâl Krông Bông, n'gor Dak Lak. Tơm geh bah play prit nkŏ hŏ kơl âk rnăk klaih rlău ach o nsan hao ƀư geh ndrŏng. Yơn lah, khay klêh play prit nkŏ năm aơ, nuĭh tăm ta nkuâl Krông Bông dôl rvah rvăch joi trong tăch luh an ntil tơm play dja.

            Khay klêh play prit nkŏ năm aơ, rnăk wa Trần Dương Sỹ, ta xã Cư Đrăm, nkuâl Krông Bông, n'gor Dak Lak tăm 4 ha. Lĕ rngôch rnoh play prit nkŏ hŏ tât nar klêh yơn rnăk păng gŭ dâk mô đăp, yor rnoh khlay tăch jŭr  thuk tĭng nar, nuĭh tât joi rvăt đêt đŏng. Wa Trần Dương Sỹ an gĭt, ntuh kơl bơi 160 rkeh prăk rvăt phân poh, ăp ntil chế phẩm sinh học, dak si ndrŭng, nuĭh kan mât chăm...mir tơm săk geh âk play, yơn aƀaơ play prit nkŏ jêr tăch, geh ma nău dôl roh dơm ntoh mpơl ta năp măt:

“Bah năp nơh jŏ đah aƀaơ nklăp n'gul khay ri tăch rnoh khlay 20.000đ/play, aƀaơ dơn hôm 12.000 - 13.000đ/play. Bu hăn rvăt bu hôm rŭn thuk đŏng rnôk kônh wa klêh âk. Kônh wa dơn mpŏng ta ntŭk geh nhih maý nkret njêng mô lah njêng hợp tác xã buăt nthoi đah ăp ntŭk tăch play đăp mpăn".

Mô dơn êng rnăk wa Sỹ, ma hang rhiăng rnăk tăm play prit nkŏ ăp xã Cư Pui, Cư Đrăm n'hanh Yang Mao, nkuâl Krông Bông dôl tŭp tâm nău rêh jêr jŏt đŏng rnôk play prit nkŏ tât nar klêh dŭm ryô. Ăp năm bah năp nơh, đah rnoh khlay play prit nkŏ ntơm bah 16.000 – 20.000 đ/play têh 2kg let lơ, ri aƀaơ hŭch hôm 10.000- 12.000 prăk 1kg. Rnôk play prit nkŏ jŭr geh âk play, rnoh khlay hao, ăp ha mbra an nsĭt geh 50 rkeh prăk, nơm geh kơt nê ma âk rnăk ƀon lan hŏ ƀư nhih jay têh uĕh. Năm aơ play prit nkŏ jŭr thuk ri geh đêt, mô dơn nê geh âk rnăk geh ma nău roh dơm.

Wa Niê Thanh Trang – Groi Bí thư Đảng ủy xã Cư Đrăm, nkuâl Krông Bông an gĭt, lam xã geh rlău 300 rnăk tăm play prit nkŏ, đah rnoh hvi nklăp 450 ha. Ta năp nău play prit nkŏ way geh jŭr geh rnoh khlay thuk, n'gâng kan ta ntŭk hŏ an ƀư âk trong nkra ntop kơl nuĭh tăm, yơn mô hŏ geh nău tam:  

“Tâm rnôk dja ri kônh wa dôl rvăt play prit nkŏ yơn mô hŏ geh trong tăch luh jêng rnoh âk play prit nkŏ kônh wa dơi tăch luh rnoh thuk. Đảng uỷ geh nău ôp gưl bah lơ dăn trong nchrăp kuăl jă wăch rgum ntuh  kơl ƀư nhih máy nkret njêng gay rvăt play prit nkŏ an kônh wa. Yơn lah, tât aƀaơ nha mô hŏ dơi ƀư ơm."

Lam nkuâl Krông Bông aƀaơ geh rlău 550 ha tơm play prit nkŏ, rgum lơn âk ta ăp xã Cư Pui, Cư Đrăm n'hanh Yang Mao. Wa Trần Thị Len – Giám đốc HTX Nông nghiệp Cư Đrăm uănh năl, tơm play prit nkŏ dŭt tâm di đah neh ntu, trôk nar ta ntŭk. Rnoh âk geh play ntơm bah 35- 40 tấn play/ha/năm. Săk play kah njŭng, săk jêng tơm play prit nkŏ hŏ dơi kơp dơn, ƀô kah; lok tâm ban, dŭm êr uănh dŭt lăp măt.

Săk geh, kah uĕh play prit nkŏ ta Krông Bông hŏ dơi uănh năl ơm bah ăp năm bah năp nơh; yơn nău dŭt rvê bah nuĭh ƀon lan tăm play prit nkŏ lah trong tăch luh play.

“Rnoh hvi neh tăm tơm play prit nkŏ bah xã Cư Đrăm he aƀaơ hŏ hao tât 450 ha, yơn tât aƀaơ mô hŏ geh trong tăch luh an kônh wa. Tât rnôk dja mô hŏ geh du công ty mô lah doanh nghiệp hăn tât ký ton rvăt play prit nkŏ. Nău ŭch rŏng bah nuĭh lăp kan nsum bah hợp tác xã lah joi geh trong tăch luh an play prit nkŏ. Uănh nsum ƀon lan kan lŏ mir ƀư geh play prit nkŏ dŭt ŏ r'ah./.

            Tuấn Long- Nuĭh rblang: Điểu Thân