VOV4.Mnông- Tĭng nău uănh năl bâh ntŭk kan văn hóa- thể thao n’hanh pâl nđaih n’gor Đồng Tháp, ta meng ăp ntŭk dôl hun hao ueh mpeh pâl nđaih đah âk ntil nău kan rĭ hôm nha âk ntŭk, tâm nĕ geh ăp ntŭk ta nkual n’har bri bâh n’gor hôm nha ê hŏ geh sŏk dŏng lĕ nău dơi, nău geh tâm ntrong kan aơ. Gay ma ntrôl dăng nta nău dơh nơih gay ma pâl nđaih nkual n’har bri an geh ntô̆ hao tâm let năp tay, ntŭk kan văn hóa, thể thao n’hanh pâl nđaih lĕ tâm rgop đah nkuăl Hồng Ngự ƀư uănh nđôi, nkre lah mbơh ƀư Nghị quyết bâh hội đồng nhân dân n’gor, ntrŭnh mbơh mpeh nău kơl an hun hao pâl nđiah ta n’gor Đồng Tháp tât ăp nuĭh kan, ntŭk kan dôl geh rdâk njêng ăp nău kan pâl nđiah.

          Famstay (N’glău jay) bâh yuh Tô Kim Thi ta nkuăl Tân Hồng dăch aơ geh âk năch gĭt tât lah du ntŭk pâl nđaih mhe, ueh ta nkual n’har bâh Đồng Tháp.

          Aƀaơ Famstay “N’glău jay” geh 2 jrô geh ƀư tĭng trong ueh dăch đah ntŭk gŭ rêh, geh ƀư đah si đar da dê , tâm trôm geh năp tŏng ăp ndơ dŏng gŭ rlu. Ngăn lah, năch dŭt ŭch tât rnôk tât ta aơ geh saơ ntŭk ueh aih đah ntŭk tăm biăp ntu ka n’hanh ăp ntŭk si ueh êng.

“Nău ueh êng bâh nơm ta aơ lah geh du mblâm bè, aơ lah nău ueh êng geh bâh nuĭh ƀon lan rêh ta nkual pit dak, ntơm nơh rnăk vâl gâp lĕ tă rêh ta bè n’hông kơt aơ rĭ gâp ŭch tât ta n’glău jay aơ lah ăp băl geh gĭt du nar rêh ta jay bè n’hông kơt aơ, lĕ rngôch lah gâp năp tŏng ăp ndơ dŏng da dê”.

          Yor rnoh n’glău dak hvi jêng ndơn gŭ ta jay bè ta dak, aƀaơ, năch mbra dơi geh gĭt nău rêh ta nkual tu dak me Đồng Tháp ta n’glău jay nơm. Ta meng n’glău dak geh kao sen n’hanh yuh Tô Kim Thi an gĭt dôl geh tăm tay ăp tơm sa play tâm ban kơt rdâk njêng, ƀư lôch ueh ntŭk gŭ rlu, ntŭk pâl  rlưn, kơl an năch ngêt sông rnôk ntơm pơk mpông vơt năch.

          “ Ŭch lah băl mpôl tât ta aơ rĭ an oh kon geh gĭt tăm biăp, tăm êng biăp kloh, mbra geh nchih nar khay tăm ta nĕ gay ma tât ba kơi plơ̆ uănh tay, lôch nĕ mbra geh tôch kao sen, vah duk, tôch sen, tĕ ndar, ta aơ rlău 10 năm hôm ka ta aơ rêh êng râk êng dŭt âk ngăn”.

          Famstay nglău jay kanŭng lah 1 tâm âk ntŭk tât ta nkual n’har bri Đồng Tháp. Dăch nkuăl Tân Hồng, nkuăl Hồng Ngự geh 6 ntŭk geh săch gay ma mpŏng an tâm rgop hun hao pâl nđaih, geh nđâp: làng bè, nkual tăm biăp đăp mpăn kloh ueh ta xã Long Thuận, ăp ngih jay ơm yău rlău rhiăng năm, Đình Long Khánh geh  pă hạng di tích gâl ngih dak, ƀon tanh cheh way ơm n’hanh ăp ntŭk ŭm ta xã Long Khánh A.

          Bol ma ê hŏ geh kơp dơn lah ntŭk pâl rlưn ta n’gor yơn ba năp nơh, âk năch tâm n’hanh bah dih dak lĕ săch ntŭk aơ ƀư ntŭk tât pâl nđaih bâh nơm. Yor kơt nĕ, n’gâng kan ta ntŭk lĕ ntrôl dăng nău kan mât uănh ăp ntŭk tât, nkre lah geh njoat rdâk njêng rup mpơl pâl nđiah bâh nkuăl. Wa Nguyễn Đức Trí, kruanh ntŭk kan văn hóa thông tin nkuăl Hồng Ngự, n’gor Đồng Tháp an gĭt:

          “ UBND nkuăl geh nău ntĭm đă ăp gâl kan n’gâng kan, tâm nĕ geh n’gâng kan văn hóa tâm rgop đah UBND xã Long Khánh A pah kan ueh jăp nău kan bôk năp lah mât đăp mpăn rnă njrăng, tal bar lah mât kloh ueh ntŭk gŭ rêh. Tal pe lah mbơh lĭr rnoh khlăy tăch ndơ ta ăp ntŭk pâl rlưn”.

          Ta meng nău mbơh tơih du đê̆ nău učh mbơh tâm nău kan mât uănh nău way kan an ta ntŭk, ntŭk kan văn hóa thể thao n’hanh pâl nđaih lĕ mbơh ƀư ăp nău kơl an mpeh hun hao pâl nđaih ta n’gor, tĭng Nghị quyết mbrô 210 bâh Hội đồng nhân dân n’gor. Na nê̆, mbra kơl ntuh kơl rdâk njêng ntŭk năch gŭ, kơl prăk kon manh ntuh kơl hun hao ntil ndơ pâl nđaih ntŭk rêh jêng  đah ntŭk leo kan, nuĭh kan tĭng mbơh ta Nghị quyết aơ. Tĭng nău mbơh bâh wa Ngô Quang Tuyên, groi giám đốc ntŭk kan văn hóa thể thao pâl nđaih n’gor Đồng Tháp an gĭt:.

          “Lôch geh mbơh ôp uănh nău aơ rĭ mpôl he mbra ndrel gŭ nsum tay gay ma uănh năl an tâm di đah nău dơi kan. Tal bar lah he mbra geh njêng dơi ntil ndơ nĕ lah nău kơl an ăp rnăk vâl n’hanh ăp ntŭk gay ma rdâk njêng ăp ntil ndơ pâl nđaih ueh êng, bâh nău dơi ta ăp ntuđk, he mbra geh ntĭm nti gay ma dơi geh an hun hao pâl nđaih gay ma njêng nău kan, gay ma ƀư pâl nđaih ntŭk aơ, mhâm ƀư an păng geh săk rnglăy”.

          Ndrel đah ăp nău dơi geh mpeh nău ơm geh, ntop tay ta nĕ lah ăp nău kơl kan an na nê̆ mbra lah nău dơh nơih gay ma nuĭh ƀon lan n’hanh ăp nuĭh ntuh kơl pơk hvi, n’hao tay lơn ăp nău dơi mpeh nău kơl kan, kơl an nău kan pâl nđaih ta nkuăl Hồng Ngự lah êng n’hanh ăp ntŭk ta nkual n’har bâh Đồng Tháp lah nsum geh ntô̆ hao tâm let năp tay.

          Nuĭh rblang: Thị Đoắt