VOV4.M’nông: Du tơm nuh srê pŭn ntô ndrôk rpu hŏ ntoh ta xã Đăk Djrăng, nkuâl Mang Yang, Gia Lai. Na nê̆, nar 28/5, geh 19 mblâm ndrôk, rpu bah 12 rnăk ta ƀon Brếp n'hanh Đê Rơn (xã Đăk Djrăng, nkuâl Mang Yang) geh nău mpơl hor muh, mbrek, geh luh pŭn ta bôk, ndŭl, jâng, lŭr ăch, ji duh 40 độ C n'hanh mô lăp sa. Chi cục Mât rong n'hanh Thú y n'gor Gia Lai hŏ sŏk ntil mham njuăl tât nhih pah kan Thú y nkual 5 gay uănh năl. Nar 31/5, lôch jêh uănh năl an saơ, geh 2 ntil nău ji đah pŭn ntô. Tât kêng măng 1/6, lĕ rngôch rnoh ndrôk rpu geh mpơl ji hŏ hao rlău 27 mblâm, ta 20 rnăk. N'gâng kan ta ntŭk hŏ mbơh nkual nuh srê pŭn ntô ndrôk rpu lah xã Đak Djrăng; xã hŏ an ƀư ăp trong nkra jăch ndăn gay bah ir nuh srê ntưp rêng, khuch tât đăp mpăn ndrôk rpu.

Srê ji tâm ndrôk rpu tâm n’gor Kon Tum dôl lŏ lơh khuch ân nŭih rong. Tâm 2 xã n’har bri Dak Nhoong ndrel Đăk Plô bah nkuăl Đăk Glei bah n’gor aơ ƀư geh bơi tât 200 rpu, ndrôk khĭt yor pŭn ntô. Wa A Mon, Groi Kruanh UBND xã Đăk Plô, nkuăl Đăk Glei, n’gor Kon Tum mbơh, kơp tât lơ 11 tât6 31/5 tâm 3 thôn bah xã, geh: Đăk Bôk, Pêng Lang ndrel Bung Tôn geh 69 mlâm rpu, ndrôk khĭt geh n’gâng kan bonh đă ƀon lan leo tâp bôr. Nkô̆ nau khĭt geh n’gâng kan mât rong năl lah pŭn ntô. Bah năp nau ndrôk rpu khĭt âk, n’gâng kan xã hŏ bonh đă nŭih ƀon lan leo ndrôk pru m’ơk lêng sĭt rong, chuh dak si njrăng n’gang, yơn lah ndrôk rpu khĭt hôm geh âk. Tâm n’gor Kon Tum srê tâm ndrôk rpu dôl geh âk ndrel jêr, ƀư khuch ân nŭih mât rong. Rnôk aơ, ndrel ma rnoh geh srê ƀư dơi 200 mlâm rpu, ndrôk rpu khĭt tâm 2 xã n’har bri Đăk Nhoong ndrel Đăk Plô bah nkuăl Đăk Glei, n’gâng kan mât rong ndrel Thú y n’gor kŏ kơp dơn nau ji srê brâp mham tâm ndrôk geh 3 nkuăl: Kon Plông, Sa Thầy ndrel Ia H’Drai. Êng nê, srê ji ndul djroh sur Châu Phi kŏ mra geh nau khuch ntoh tay./.

Nuĭh rblang: Điểu Thân