VOV4. M’nông: Tă khuch bah trôk nar, tơm điều ta Gia Lai năm aơ mô jŭr geh âk play tât rnôk rnoh khlay jŭr thuk, ƀư ƀon lan tăm điều roh ndrop. Hoàng Qui, Phóng viên Radio nău ngơi Việt Nam way gŭ kan ta nkual Tây Nguyên nchih nkoch ngăn geh ta nkuâl Ia Grai, lah ntŭk tăm điều dŭt têh bah n'gor Gia Lai.

Nŭng nar duh r'ôl, rnăk yuh Rchăm Thu, ƀon Krái, xã Ia Khai, nkuâl Ia Grai, n'gor Gia Lai ndrel du đêt nuĭh hăn kan dôl mô gŭ rlu donh điều. yuh Thu an gĭt, năm e nơh rnăk nsĭt geh rlău 100 rkeh prăk bah 3 ha điều, yơn năm aơ, rnoh geh dah n'gul dơm tă bah tu ndrŭng chuh sa ntoh âk ta rnôk tơm điều luh play nse, săk geh hŭch đêt:

“ Năm aơ, lah mô geh tu ndrŭng chuh sa ri điều geh dŭt âk play, yor păng luh kao dŭt âk. Yơn lah ân geh phân poh, dak si ndrŭng ăp tŏng mơ mât njrăng dơi play điều nse. Lah geh dak si puh ndrŭng ăp tŏng, koh n'ging geh ndrŭng chuh sa n'hanh n'ging geh kro dak ngom lơh ri sreh jăng mô an ntưp rêng ri kêng dŭt mbra geh play dŭt uĕh. Aƀaơ nuĭh ƀon lan dŭt jêr jŏt, mpŏng ngih dak ntop kơl mpeh trong njrăng n'gang nuh srê".

Ndrel xã Ia Khai, rnăk wa Ksor Huôn dôl kŭnh rôn nhôn donh 3 ha điều. wa Huôn an gĭt, tă bah tu ndrŭng chuh sa âk, găr điều jê̆- djơh jêng tăch mô khlay ơm. Ntơm bah bôk khay donh tât aƀaơ, rnăk păng dơn tăch geh ntơm bah 22 tât 25 rbăn prăk ăp kg dơm, tâm rnôk năm e nơh, rnoh khlay rĭng geh lah 30 rbăn prăk.

“Năm aơ mô jŭr geh khlay n'hanh rnoh dŭt thuk rđĭl đah năm e nơh, mpôl hên mpŏng ngih dak uănh khlay tay lơn đŏng tât nău kan tuch tăm gay rgâl geh nău rêh an kônh wa ƀon lan"

Điều mô jŭr geh play, nuĭh ƀon lan mô geh tơm wăng sa, nuĭh hăn joi rvăt mô geh ndơ gay nđơn tăch tay đŏng. Wa Phạm Thị Thúy, du hê nuĭh way hăn rvăt găr điều ta nkuâl Ia Grai an gĭt:

  “Năm aơ play điều mô săk uĕh tă bah mih rlơ̆ khay n'hanh geh bu tuh yor tŭp dak ngom, play điều mô săk uĕh, rvăt thuk lơn rlău ăp năm, rnoh khlay hŭch đŏng yor điều mô uĕh săk găr jêng geh rgum rvăt đêt, ăp năm rdôl khay donh rgum rvăt geh rlău jât tấn 1 nar, năm aơ ri dơn geh đêt dơm, nklăp 1/3 rđĭl đah ăp năm"

Tĭng wa Nguyễn Thị Mai Lương, Kruanh UBND xã Ia Khai, lah ntŭk geh rnoh neh dŭt hvi tăm điều ta nkuâl Ia Grai đah rlău 1000 ha. Ăp năm rlău aơ, tơm điều hao jêng uĕh, an nsĭt geh wăng sa âk, rgop kơl nuĭh ƀon lan n'hao âk geh wăng sa. Yơn lah, ta năp nău rgâl bah trôk nar kơt aƀaơ, nuĭh tăm điều nsĭt geh wăng sa rgoh n'gơ. Nău dja ân geh ăp trong nkra tâm di lơn đah ăp ntil tơm tăm tơm jut jăng ji ngot hŭch ach o dja ta ntŭk:

“Pah kan n'hŭch ach o ta ntŭk mpôl hên nơm geh âk tâm tơm điều đŏng, mpŏng ăp gưl n'gâng kan geh âk trong rƀŏng mhe, uănh khlay lơn đŏng tât nkual tăm âk tơm điều, ŭch rŏng geh ndơ ƀư OCOP gay năl di ndơ geh ƀư bah play điều bah xã Ia Khai”./.

Nuĭh rblang: Điểu Thân