VOV4.M’nông: Ndơ sa nuĭh Rđe ta n'gor Dak Nông ntoh lư đah ăp ndơ sa tăng gâm ndrel đah ka khô n'hôl ƀô kah, mha êng. Rlău ma blân tăng mô lah play mpang bri, nuĭh Rđe hôm geh bar ntil lha tăng dŭt mha êng way gâm đah ka khô, lha bum blang n'hanh lha biăp tăng.

Lha bum blang geh tăng dơi nuĭh Rđe dŭt ŭch sa. Lha bum blang sa lha lah lha bum blang nkong gŭr, way dŏng gâm trău,  lha bum blang wâr kao lhŭng klô,  lha bum blang wâr ka khô… Tâm nê, lha bum blang wâr ka khô dơh ƀư yơn sa dŭt kah.

Lor bôk năp lha bum blang ân siăt rhên n'hanh tuh ma dak duh an bah ir tăng lôch nê an sơh dak. Ăp nuĭh Rđe ŭch sa tăng mbra mô kâp tuh dak duh ma an lha bum blang rêh gâm dĭl. lha bum blang rêh mbra ndjôt juh hăch nkre đah mblăng. Ndơ sa gâm dơh ngăch đŏng nklăp tâm bar pe mnĭt lah hŏ sĭn hôm. Glah n'gân ta năk ŭnh an duh, tê̆ đêt dak ngi, tê̆ bar pe mblâm jiăm tăp hŏ plôk ntô wâr an luh êr, ntop tê̆ tay ka khô dah găp wâr. Rnôk ka sĭn, nuĭh Rđe mơ tê̆ lha bum blang tâm glah wâr ndrel ka cơm, kơi tê̆ đêt boh mbrăch lah ndơ sa dŭt kah hôm. Ndơ sa n'hôl ƀô kah ka cơm kro.

Du ntil ndơ đŏng geh sa tăng ma nuĭh Rđe dŭt ŭch gâm ndrel đah ka cơm kro lah lha jdam ble. Nê lah nău Rđe kuăl bah du ntil lha bri. Jdam ble hon jêng ndru, lha joch, hon tâm ndôn kơi nsum, lha nse geh ư̆r blak. Nuĭh Rđe way tôch ăp nkŭr nse gâm, geh ƀô tăng. Lha jdam ble gâm đah ka cơm kro tâm ban kơt lha bum blang đŏng. Yơn lah, nău gâm lha jdam ble mô kâp siăt rhên ma an lha mblâm gay gâm. Jdam ble wâr ndrel đah ka cơm kro jŏ tâm nklăp 5 mnĭt lôch nê tê̆ boh mbrăch. Rgâl bah hôm ma dŏng mblăng kơt tâm lha bum blang ri ndơ dja ân kơi tê̆ âk mbrăch. Rnôk wâr sĭn ƀô kah bah mbrăch hơr thŏk tât muh. Lha jdam ble sa dŭt ƀô kah, wên, tăng tăng sa dŭt mha êng bâr n'hanh kah.  

Đah nău ŭch sa tăng n'hanh hăng, nuĭh Rđe uănh lha bum blang n'hanh lha jdam ble lah bar ntil ndơ sa kah khlay. Rlong sa ăp ndơ sa n'hanh piăng ngăn n'hôl duh nsĭt tay ƀô kah dah găp bâr sa yơn geh nău mha êng. Nău tăng bah ăp ntil lha rnôk sa lor bôk năp tâm ban kơt jêr lvuăn ngăn. Yơn djăt ma gĭnh hăch tât mbâr tâl 2, tâl 3, nuĭh sa mơ saơ tăng kah njŭng mha êng tâm nău tăng. Djăt ma kơt nê̆ dơm, nuĭh sa ŭch tĭng du ntil ndơ sa geh âk nău tăng hăng, tâm rdil nsum yơn ƀư an bâr mbung dŭt ŭch kơnh sa./.

Nuĭh rblang: Điểu Thân