VOV4.M’nông: Tĭng Chi cục Tuch tăm n'hanh Mât njrăng si tăm n'gor Kon Tum, bu tuh kruănh lha bum blang hŏ ntoh ta 4 nkuâl, nkual ƀon têh bah n'gor, lah: Đăk Tô, Ngọc Hồi, Sa Thầy n'hanh nkual ƀon têh Kon Tum đah lĕ rngôch rnoh hvi neh tăm bum blang geh bu tuh rlău 300ha. Tâm nê, nkual ƀon têh Kon Tum geh bu tuh kruănh lha bum blang dŭt âk đah rnoh hvi rlău 210ha.

Phik uănh an saơ bu tuh kruănh lha bum blang lơn âk ta neh tăm rlơ̆ khay, tăm ntơm bah khay 9 năm e nơh n'hanh tât khay rôk bum khay 9 năm aơ. Nkô̆ dơi năl lah tă bah tơm bu tuh ơm geh rŭ hôch tâm nkong bum ntil bah nuĭh ƀon lan rvăt sĭt. Wa Đoàn Năng Rường, Groi Chi cục Tuch tăm n'hanh Mât njrăng si tăm n'gor Kon Tum an gĭt, n'gâng kan tuch tăm ta ntŭk dôl nsrôih nking nchăng nău ntưp rêng bah bu tuh kruănh lha bum blang. N'gâng kan tuch tăm n'hanh hun hao ƀon lan hŏ rđău đă n'hanh ntĭm nti ăp nkuâl lơh bah bu tuh kruanh lha bum blang. Ntĭm nti kônh wa đah rnoh neh tăm hvi rlău 70% ri rôk jăng lĕ rngôch n'hanh rgâl tơm tăm êng ƀa ƀă. Đah neh tăm ntơm bah 30% tât 70% rôk su jăng lĕ tơm geh bu tuh n'hanh tăm rlŭ./.

 Nuĭh rblang: Điểu Thân