VOV4.Mnông – Gay n’hao săk rnglăy wăng sa n’hanh ntơm rgâl tơm tăm, nkuăl Cát Tiên, Lâm Đồng ntrôl dăng hun hao ăp rnoh neh tăm biăp. Aƀaơ nkuăl lĕ jêng nkual way tăm biăp đah rnoh neh 524 ha mper dak me Đồng Nai. Ăp ntil biăp dơi tăm ta nkuăl Cát Tiên lah: Cải xanh, tuh jong, rpŭng dak, play mpang n’hanh xà lách. Knơm tâm di neh jêng ăp rnoh neh tăm biăp jok dak me Đồng Nai hun hao uĕh, đêt geh bu tuh tu ndrŭng n’hanh dơi uănh lah prêh đah uĕh kah. Rĭng geh du ha tăm biăp nsit tay an nuĭh ƀon lan Cát Tiên bah 300 rkeh tât 500 rkeh prăk du năm, âk rlău 5 tât 10 tơ̆ tăm ba. Aƀaơ nău kan lŏ mir nkuăl Cát Tiên dôl ntrŭt nsôr n’hanh ntop kơl kỹ thuật, prăk, ntil gay ăp rnăk geh rnoh neh njok dak me Đồng Nai rgâl bah ăp tơm tăm êng an tăm biăp tĭng công nghệ mhe gay n’hao nău geh, rgâl nău rêh.

Nuĭh rblang: Y Sưng Phê Ja