VOV4.Mnông- Yor nău khuch tât bâh nuh srê Covid-19, tâm ba năp nơh, dŭt âk ƀon lan kan lŏ mir bâh n’gor Lâm Đồng tŭp ta nău jêr jŏt yor mô đăp mpăn ntŭk tăch. Gay ma ndâk nsơm bah nău aơ, n’gâng kan tuch tăm n’gor Lâm Đồng dôl mpŏng an ƀon lan kan lŏ mir ntrôl nău pah kan tăm biăp, bum, play tĭng trong tâm di tâm nău rêh mhe.

          Ăp nar ba năp, rnăk vâl yuh Nguyễn Thị Mơ, ta phường 8, nkuăl ƀon têh Đà Lạt rgum mât kuaih ueh mir kao gay ma rgâl tăm biăp, bum, play an nău geh jŏ khay lơn. Yuh Mơ an gĭt, yor nău khuch tât bâh nuh srê Covid-19, dŭt âk rnoh neh tăm kao koh n’gĭng lĕ roh hoach dơm, nău pah kan tăm kao mô hôm geh tâm di jêng lah rnăk vâl ntơm rgâl jêng tăm mbrăch n’hanh du đê̆ ntil biăp, bum êng.

          “Aƀaơ ndơ tăch lĕ ntơm khlăy, nău geh bâh tăm mbrăch lah geh dŏng jŏ lơn jêng nău geh păng âk lơn đah ăp ntil êng. Ăp ntil ndơ ntuh ƀư âk prăk ma gơnh lĕ dŏng rĭ mbra roh dơm âk, roh dơm kơt lah tât 80%. Hôm đah mbrăch sa rĭ geh rlău ma nar dŏng tăch geh âk đŏng. Hôm đah ăp ntil kao kơt lah kao cúc, kao cẩm chướng rĭ geh jăng dơm tâm mir roh dơm lĕ rngôch.

          Gay ma nău pah kan tuch tăm geh tâm di đah nău tât bâh nuh srê Covid-19 tâm nău mhe, n’gâng kan tuch tăm mât rong n’gor Lâm Đồng lĕ rdâk njêng nău nchrăp leo ƀư pah kan tĭng trong nkre ma tâm di đah nău ŭch geh ta ntŭk tăch rgâl, nkre mât đăp mpăn nău pah kan jan sa n’hanh n’hao nău geh an ƀon lan. Tĭng nău mbơh bâh wa Nguyễn Văn Châu, groi giám đốc ntŭk kan tuch tăm mât rong n’hanh hun hao ƀon lan n’gor Lâm Đồng, nău nchrăp kan aơ gay ma mpŏng an ƀon lan kan lŏ mir pah kan jan sa tĭng trong an tâm di lơn, mât đăp mpăn pă ndơ an ntŭk tăch rgâl đah rnoh râng geh klâp ma 6.800 tấn biăp, bum, play ăp ntil/nar.

Tâm nĕ, uănh khlăy tât nău kan rgâl rnoh neh bâh tăm tơm êng dôl mâp jêr kŏt lah kao koh n’ging gơnh lĕ dŏng, tât tăm biăp, bum, play ăp ntil geh nar dŏng jŏ lơn, dơh mât chăm, nău geh jŏ n’hanh dơi mât jŏ, dơh nchoăn rdeng. Wa Nguyễn Văn Châu an gĭt.

          “ 2 ntil ndơ geh nău khuch dŭt âk tâm rơh nuh srê Covid-19 tâm ba năp lah biăp, bum, play n’hanh kao. N’gor lĕ tâm rgop đah ăp ntŭk uănh nđôi tay n’hanh rdâk njêng du ntrong pah kan ngăch, mpŏng lah hôm nha geh mât nău srih tăm mât đăp mpăn ta rnoh neh ơm tăm. Râng geh ăp nar tăch an ntŭk tăch rgâl klâp ma 6.864 tấn biăp, bum, play, đăp mpăn pah kan an nuĭh ƀon lan n’hanh mô geh nău khuch khat. Mpôl hên geh nău nchrăp lah n’huch rnoh neh tăm biăp sa n’ha n’hanh rgâl du đê̆ rnoh neh tăm kao jêng tăm biăp gay ma tăch an ntŭk tăch rgâl, mô an geh tăch proăt ndơ tăch”.

          Ndrel đah nău mpŏng pah kan jan sa, n’gâng kan tuch tăm Lâm Đồng lĕ n’hao nău mbơh, nchroh lor nău hun hao, rnoh khlăy ntŭk tăch rgâl...gay ma kơl an ƀon lan kan lŏ mir geh nău dơi ta nău pah kan. Ngăn lah mbơh tơih n’hanh nta nău nơih gay ma kơl an ƀon lan kan lŏ mir ƀư ăp nău tâm rgop đah doanh nghiệp, HTX gay ma geh đăp mpăn ntŭk tăch.

Nuĭh rblang: Thị Đoắt