VOV4.M’nông: Ka leo, lah du ntil ka geh rnoh khlay văng sa âk, ntơm geh ƀon lan tâm Lâm Đồng rlong rong tâm nglau. Ndrel nau geh bôk năp ân saơ, kon ka leo ngăn ngên dơi rêh tâm ntu ka tâm neh ndrel ma ueh đah neh ntu, mih nar bah Tây Nguyên, mra geh nau văng sa âk.

            Nô Trần Hữu Tự, ta Thôn Tân Hoá 2, xã Lộc Nga, nkuăl ƀon têh Bảo Lộc, n’gor Lâm Đồng lah nŭih geh âk nau blau tâm nau mât rong ka dak sât kơt lah ka krop, ka chép, ka trắm. Năm 2020, tĭng nau ntĭm mbơh bah cán bộ ntrŭt nsôr nau kan mât rong, nô rlonbg rong ka leo, du ntil ka mhe ngăn đah kônh wa ƀon lan nkuăl yôk prêh. Ndrel nau dơi bôk năp ân saơ, ntu ka ngioh nô lah ntŭk ka leo rêh ndrel hao rŏ ueh ngăn.

            Knŭng đah ntu ka hvi bơi 2 sào măt dak, khay 6/2020, nô hŏ rlong m’ơk 2000 mlâm ka leo ntil. Ntil ka yor ntŭk kan ntrŭt nsôrr nau kan tuch tăm mât rong Lâm Đồng pă kơl an, ntŭk aơ hôm kơl tay nô 70% rnoh mpa sa ân ka kŏ kơt lah nau ntĭm ân nô ntrong mât rong. Nô nkoch: ‘Ka leo lah ntil ka geh nau dơi rong têh jâk ngăn 7-8 gram/mlâm, jâk ngăn rnôk rong têh ngăn ri nklăp 150kg/mlâm. Jêh 10 khay rong, kon ka leo leo rlong veh jâk ri păng geh 1,4kg/mlâm, uănh kơt lah geh nau hao têh ueh”

            Tĭng nau nô Tự, ka leo lah nytil ka sa măng, Rnôk hôm jê̆, ka leo sa lâk âk. Rnôk têh, ka leo vay sa kon ka jê̆, mô lah kon tui…, mât chăm ri ueh ndrel mô geh nau khuch êng. Ka nê tâm nâm neh dak, păng dơi mât rong ka êng ba lơ măt dak kơt ka trắm, ka krop.

            Nô Tự nkoch, rnôk m’ơk ka, nô rao ntu ka kloh ngăn, srih vôi, poh phân hữu cơ gay ma kloh dak, âk ndơ kah rong ka. Ntu ka geh trong lih, lăp dak, trih dak tă bah dak me Lộc Nga yor ri ma kloh ngăn ndrel geh rgâl mro. Yor ri, kon sa leo geh ntŭk rêh tâm kơt ma ntŭk rêh tâm dak ngăn, mô geh ndơ khuch. Êng nê nô tự hôm rong âk ka krop, pă ndơ sa ân ka leo tâm nâm.

            Nô Nguyễn Văn Thành, cán bộ ntŭk kan ntĭm mbơh nau tuch tăm mât rong n’gor Lâm Đồng mbơh, ka leo hôm geh ntơ lah ka Nheo, lah ntil ka ntô mbir. Ka têh, geh rnoh kah lay tâm săk, puăch păng sa kha, ƀô ngưi, geh âk ntŭk bu rvăt ngăn, yor lah ka tâm dak ngăn ri geh bu nhŭp lĕ hôm, yor ri ma mô geh âk. Ndri ma, ntŭk kan kơl an nau kan “Rong ka leo tâm nglau nơm njêng” gay ma rlong rong du ntil ka geh rnoh văng sa âk.

            Đah nau kan hŏ geh ntrŭnh, kơp uănh lĕ rnoh geh tăch 90 rbăn/kg ka leo dôl geh tăch tâm nkuăl. Rnpôk geh leo tăch sa, ăp rnăk mra geh ntơm 140-160 rkeh/rnăk. Đah nau kan aơ ân saơ, du đê̆ nkuăl dôl ma geh nau tâm di gay ma hun hao nau leo rong ka leo. Nau kan aơ kơl an rnăk ƀon lan geh tay nau săch ntil ka mhe rgâl ma ăp ntil ka ơm tă rong, bah nê n’hao nau geh ueh ntil tui ka, nar lơn tŏng dơi nau ŭch ngêt sa bah ƀon lan tâm n’gor Lâm Đồng./.

                                    Nŭih rblang: H’Thi