VOV4.M’nông – Du rƀŭn nchră-rgum nchră gay uănh lah nău ngăn mât uănh, mât njrăng nău khlay ntŭk ntô văn hóa chĭng gông Tây Nguyên lĕ dơi Cục Di sản văn hóa, N’gâng kan Văn hóa, Thể thao n’hanh Pâl nđaih ƀư nar 12/4, ta nkual ƀon têh Kon Tum, n’gor Kon Tum. Râng geh ăp nuĭh mât uănh, mĭn njêng văn hóa dân gian; ntoh măt nghệ nhân dân gian n’hanh n’gâng kan Văn hóa, Thể thao n’hanh pâl nđaih 5 n’gor nkual Tây Nguyên.

Nuĭh ƀon lan Kon Kơ Tu, xă Đăk Rơ Wa, nkual ƀon têh Kon Tum dŏng chĭng n’hanh njroh xoang tâm nar rgum ƀon

Ăp năm bah năp, N’gâng kan văn hóa, Thể thao n’hanh pâl nđaih, n’gâng kan n’hanh nău kan Văn hóa 5 n’gor Tây Nguyên lĕ ƀư âk bôk nău kan, nău nchrăp ƀư gay mât ndray, ƀư uĕh nău khlay drăm ndơ ơm yău. Nău khlay ngăn lah geh âk nău ƀư, lễ hội way ơm dơi nuĭh ƀon lan ta ntŭk mât ndray, ƀư dâl tâm nău rêh ăp nar. Ndrel đah nĕ, ăp rhiăng jrô ntĭm nti tŭr chĭng, njroh xoang, nău blău nkra chĭng.... Lĕ dơi ƀư đah tât râng bah rbăn nuĭh. Bah meng ăp săk rnglăy dơi rhơn, ăp nuĭh ntoh măt râng Rƀŭn nchră-rgum nchră ntĭm âk nău ntul rlong tâm trong kan mât uănh, njrăng n’gang nău khlay ntŭk ntô văn hóa chĭng gông Tây Nguyên, kơt: ntŭk ntô văn hóa ƀon geh phah chrai; rơh  nuĭh mât ăp nău ƀư way ơm nar lơ roh tâm rnôk rơh druh ndăm mô hŏ mĭn wơt dơn nău trêng ntĭm; nău tâm bôh đah hun hao wăng sa n’hanh hun hao văn hóa mô hŏ dơi mkra du trong tâm ban.

Nŭih rblang: Y Sưng Phê Ja