Ôi aơ ( 5/9), ăp nhih nti ta n’gor Dak Lak du rơh ƀư Lễ khai giảng năm nti mhe 2025- 2026. Aơ lah năm nti lor bôk năp n’gâng kan ntĭm nti lăp tâm rơh mhe lôch rnôk n’gor Dak Lak n’glăp nsum đah Phú Yên. Nkô̆ rloh rlău dơi lam n’gâng kan sơch lah: “Nău way – Blău ƀư mhe – Đăt ndal – Hun hao”.

Lôch n’glăp dơn ngoăy, rnoh têh hvi ntĭm nti bah n’gor Dak Lak dơi pơk hvi đah rlău 1.370 ntŭk ntĭm nti bah mầm non tât THPT, ntĭm nti nău kan n’hanh ntĭm nti mbro. Lam n’gor aƀaơ geh rlău 700.000 kon se nti, nuĭh nti ndrel rmôt rlău 38.400 cán bộ mât bôk kan, nai ntĭm, tŏng đah nău ŭch geh hun hao ntĭm nti. Nău ŭch tâm năm nti dja, n’gor Dak Lak nsrôih n’hao rnoh âk nhih nti di rnoh gưl neh dak hao 55%, mât nâp rnoh âk tốt nghiệp THPT hao 98% n’hanh ntruch huêt tâm ƀah săk blău ntĭm nti đah nkual dơh đah nkual jêr jŏt, rƀŏng tât nău hun hao tâm ban n’hanh nâp dăng an lam n’gâng kan. 

Ta Gia Lai, rlău 760.300 kon hŏk ta 1.200 ngih samƀŭt râng ƀư ntơm năm nti 2025-2026. Trôk nar kloh uĕh, nđik, mô geh mih lĕ jêng mông nar n’gŭr răm an nar rgum lam ƀon lan ndơ̆ kon se tât ngih samƀŭt. Năm aơ, n’gor Gia Lai geh 760.306 kon hŏk ta 23.017 jrô đah dĭng lĕ 37.347 cán bộ, nai, nuĭh kan. Yơn lah, nău kan ntĭm nti hôm e mô tŏng 3.500 nuĭh nkôp đah rnoh an, tâm rnôk ngih wâl ndoh ndơ ta âk ntŭk, ngăn lah nkual n’har bri, hôm e mô tŏng. Ta năp, nău kan ntĭm nti mbra tâm ôp tâm nchră UBND n’gor Gia Lai săch ntop tay 1.428 nai, nkre dăp, tâm pleh  tâm di gay tŏng nău ŭch ntĭm nti, ngăn lah đah ăp môn nti mhe tĭng bôk nău ntĭm nti phổ thông 2018. Aơ lah trong nchrăp khlay gay tŏng uĕh ntĭm n’hanh nti tâm năm mhe.