Ta mir sầu riêng bah rnăk wa Nguyễn Công Điềm ta xã Ea Knuêc, n’gor Dak Lak, Bí thư Đảng ủy xã Ea Knuêc – wa Ngô Thị Minh Trinh – hŏ râng na nê̆ rơh livestream tăch sầu riêng ndrel kônh wa ƀon lan. Aơ lah lor bôk năp ta Dak Lak du kruanh mât bôk kan tâm dâng “pơk ƀoh sŏng dăng” gay nkoch mbơh, nkơnh n’hơ n’hanh ntop kơl tăch ndơ tuch tăm an nuĭh ƀon lan.

Rơh pơk livestream dơi ƀư đah nău ndrel hăn bah Hợp tác xã Tuch tăm kloh uĕh Krông Pắc, nuĭh ƀon lan, mpôl đoàn viên druh ndăm ta ntŭk ndrel du đêt doanh nghiệp ntop kơl logistics n’hanh nchuăn rdeng. Rơh ƀoh ngơi dơi pơk ndrel du rơh ta âk ndơ pơk ƀoh mbrô. Lah ta rơh livestream, Bí thư Đảng ủy xã Ea Knuêc Ngô Thị Minh Trinh lah rjăp:

“Nău ŭch bah rơh livestream dja lah mô dơn n’glĕ ta nău tăch geh dah âk tấn sầu riêng, ma khlay lơn lah nkơnh n’hơ rup gui, ndơ kah khlay bah ƀon tơm; ntrŭt nsôr kônh wa ndrel râng rơh rgâl mbrô, bah nău nti trong tăch ndơ bah ngai tât mbơh nkoch văn hóa ta ntŭk; nkre năl di săk kah ndơ tuch tăm Dak Lak ta ntŭk tăch rgâl.”

Bah meng nău ntoh bah Bí thư xã, du đêt nuĭh ƀon lan ta ntŭk râng ndrel nkoch mbơh ndơ geh tuch tăm đŏng. U Hoàng Thị Nguyên, 70 năm deh, gŭ rêh ta thôn Tân Sơn, xã Ea Knuếc rhơn nkoch rnôk lor bôk năp dơi nhŭp Micro nkoch mbơh ndơ geh tuch tăm ta ƀon nơm ta bôk ƀoh pơk sŏng dăng:

“Dơi gŭ bah meng đảng uỷ xã, bí thư n’hanh lĕ ma ăp n’gâng kan bah xã he geh trong leo ƀư, bol 70 năm deh nha hôm nsrôih nđơr kan gay an ăp kon său geh nău rhơn mƀak bah rnăk wâl ân nsrôih mhâm ƀư gay geh âk sầu riêng gay tăch n’gluh đŏng n’hanh he n’hao êng săk mpeh kon său rnăk wâl he lah nău dŭt rhơn răm”

Đah nuĭh ƀon lan, nău n’gâng kan tâm dâng mô dơn hăn ndrel ma nghị quyết mô lah siƀŭt, ma nău dâk kan na nê̆, hŏ nsĭt cán bộ dăch ƀon  lan n’hanh grêt dêh ƀon lan lơn. Nău kruanh xã ndrel kônh wa “pơk sŏng dăng” lah trong ƀư ngăn ngăn gay rêng lam nuih n’hâm rgâl mhe, nkre rdâk tay nău nsing nơm đah nuĭh ƀon  lan n’hanh n’gâng kan. Wa Mai Đình Thọ, Kruanh HTX Tuch tăm srăch Krông Pắc, rnê âk nău blău ƀư dja:

“Gâp dŭt nkah uĕh đah du hê bu ur Bí thư xã mô dơn rgum tâm pah kan rđău đă, ƀĭt juet tâm dâng ma hôm uănh khlay tât nău ntop kơl kônh wa ma nău mĭn tăch ndơ online. Trong ƀư dja kơl ƀon lan tât đah trong rƀŏng mhe, n’hao rnoh khlay ndơ geh ƀư n’hanh nsĭt tay nău geh wăng sa ngăn ngăn lơn. Gâp mĭn lah du hê bu ur Bí thư kơt nê kre tâng jru, nkre dăch dêh, ndrel hăn ngăn đah nuĭh ƀon lan kan lŏ mir gay joi trong nkra dŭt uĕh an kônh wa, uănh khlay tât tĭng ntil nău na nê̆ tâm nău rêh bah ƀon lan kơt nê̆.”

Rơh livestream wăch rgum hang rbăn tơ̆ nuĭh uănh n’hanh âk ndơ tăch hŏ dơi ton rvăt. Mô dơn ntop kơl geh trong tăch luh an ndơ tuch tăm, nar ƀư hôm kơl kônh wa măt saơ na nê̆ kơt nti trong nkơnh n’hơ ndơ geh ƀư ma ndơ pơk dŏng keh mbrô, jêng nău way bên tuch tăm – tăch rgâl nkre đah ntŭk tăch têh mhe.

Nău Bí thư xã Ea Knuêc, n’gor Dak Lak livestream na nê̆ tăch sầu riêng nar aơ dơi uănh lah njuat hăn ngăn ngăn tĭng ƀư nuih n’hâm Nghị quyết 57-NQ/TW mpeh ntrôl dăng dŏng khoa học công nghệ n’hanh rgâl mbrô, nkre mpơl nău ton “dăch ƀon lan, grêt dêh ƀon lan” ma nău kan ngăn ngăn bah kruanh rđău kan tâm dâng rnôk tĭng ƀư n’gâng kan 2 gưl.