Ôi aơ (5/9), ta Ntŭk Rƀŭn nchră Ngih dak (Hà Nội), N’gâng kan ntĭm nti ƀư Nkah gĭt 80 năm way ơm nău kan ntĭm nti n’hanh ntơm năm nti 2025-2026. Aơ lah rơh bôk năp, bơi 30 rkeh kon hŏk, sinh viên ndrel 1,7 rkeh nai ta lam dak râng ƀư ntơm năm nti nsum, boăt nthoi trực tuyến, ndrel cahò cờ n’hanh mprơ Quốc ca.

Râng nar ƀư geh Tổng Bí thư Tô Lâm, Kruanh dak Lương Cường, Thủ tướng Phạm Minh Chính, Kruanh Quốc hội Trần Thanh Mẫn ndrel kruanh, tă ƀư kruanh Đảng, Ngih dak; ntoh măt ăp n’gâng kan, ban, nău kan n’hanh ăp rmôt kan dak bah dih ta Việt Nam. Năm nti 2025-2026 dơi mĭn lah năm nti bôk năp mbơh ƀư ăp nghị quyết khlay bah Đảng n’hanh Quốc hội, tâm nĕ geh Nghị quyết mpeh ntĭm nti mầm non an kon se 3-5 năm, Luật Nhà giáo n’hanh nău kơl mô sŏk, ntop kơl prăk nti. Nău kan ntĭm nti mĭn lah bôk tơm nău năm nti 2025-2026 lah “Kỷ cương-mĭn ƀư mhe-Rgâl mhe-Hun hao” đah 10 nău kan, mkra khlay gay ƀư tam săk rnglăy ăp nău ntrŭnh, nău kơl bah Đảng n’hanh Ngih dak mpeh ntĭm nti, ƀư dơi ăp nău rƀŏng n’gluh an.

Ƀư nkah gĭt 80 năm way ơm nău kan ntĭm nti n’hanh ntơm ƀư năm nti 2025-2026 mô knŭng gay nkah gĭt tay nău way ơm, djôt dơn ăp nău rgop têh bah nău kan ntĭm nti đah nău kan cách mạng bah Đảng n’hanh neh dak he ma hôm di an rdâk hao nău kan lam nău kan ntĭm nti lah êng n’hanh lĕ kon nuĭh ta năp nău đă hun hao bah neh dak tâm rach năm mhe.