Âk neh gŭ, neh ƀư nau kan geh năl bah năp nơh tâm nkual ƀon têh Buôn Ma Thuột, n’gor Dak Lak, rnôk aơ jêng neh tăm bri, neh tăm tơm si ndrih hŏ lơh khuch tât nau kan nkra ngih, ntŭk ƀư nau kan, ê nkra bah âk ntŭk ƀư kan tăch rgâl. Tâm rơh rƀŭn tâm nchră đag rđau kan UBND nkuăl ƀon têh đah ăp ntŭk kan tăch rgâl geh ƀư lơ 27/11, âk ntŭk kan hŏ mbơh nau aơ ndrel ŭch geh UBND nkuăl ƀon têh Buôn ma Thuột geh nau kan gay ma doh rklaih, ơm njêng ăp nkuăl tuch tăm, ê nkra gay ntŭk kan geh nau nchrăp ntuh kơl ân tâm di. Ăp ntŭk kan ân lah, nau ntrơn rgâl nkô̆ dŏng neh tâm bản đồ rgum ƀư dŏng neh ƀư geh âk nau mô tâm di rđil nau nchrăp ơm.

Ơh nau ôp mpeh nau aơ, wa Vũ Văn Hưng, Kruanh UBND nkuăl ƀon têh Buôn Ma Thuột, n’gor Dak Lak kơp dơ geh nau mô ueh tâm nau gĭt mpeh nau rgum bah cán bộ ƀư nau rgum ê tâm di, âk ntŭk mbơh ê hăn lôch lĕ ăp nkuăl jêng nau rgum ƀư tih. Mpeh ntrong kan rklaih nau aơ, wa Vũ Văn Hưng mbơh: Nkuăl ƀon têh Buôn Ma Thuột dôl ƀư rgâl nau rgum nsum bah nkuăl ƀon têh, rnôk ƀư jêh nau rgum nsum ri mra ntrơn rgâl tay, plŏ tay neh tâm di nau uănh năl bah ƀon lan bah năp nơh./.