Tâm khuh n’gôr lam dak rƀŏng mpeh Lễ nkah ndray 80 năm Cách mạng khay Pham geh nău dơi n’hanh Quốc khánh (2/9), ta Ntŭk rgum Tiăr nti tahen gưl neh dak 4 (Sơn Tây, Hà Nội), ăp mpôl râng n’grĭng tahen, ntroh hăn dôl ndăn lăp tâm rơh tiăr nti rgum n’glĕ dŭt. Ndrel đah ăp mpôl tahen, cán bộ, tahen Cảnh sát dak lêng Việt Nam nha mô gŭ rlu ta ntŭk tiăr nti, nsrôih ƀư wat jêh uĕh nău dơn kan A80 – ngoăy tâm ăp nar chính trị, văn hóa têh khlay bah rnoi nuĭh he.

Ăp nar, rnôk ƀhit ƀhit sol yơn mbor tahen bah mpôl Cảnh sát dak lêng Việt Nam hŏ mprĭp sŏng grep. Tĭng muh măt lhăt jăp, tĭng njuat jâng chuat nâp rkâk bah ăp nuĭh tahen hŏ ntru aih lĕ bri duh bah khay rlu nti miền Bắc. Duh n’heng rlău 40 độ C mô lah ăp tơ̆ mih ntâng ntoch jong yơn ăp nuĭh tahen nha hôm wên dăng, ôi tiăr nti – kêng măng tiăr nti, geh rnôk kơi tiăr nti lĕ ma măng đŏng.

Thượng úy Nguyễn Hữu Duy Thái nkoch: Gay geh du rmôt uĕh di lĕ, ăp nuĭh tâm mpôl ân nsrôih lĕ n’hâm suan he nơm. Tĭng njuat jâng chuat, tĭng păk ti ân tâm ban, jôn rbăn. Bol jâk r’ah, yơn lĕ dĭng nuĭh nsrôih mpơl di nuih n’hâm han dăng bah nuĭh tahen Cảnh sát dak lêng Việt Nam.

“Dơi nsoh ta săk he ndơ Cảnh sát dak lêng ri săk gâp nơm drel lĕ rngôch ăp nuĭh nti tâm mpôl dŭt n’hao êng săk, rhơn n’hao êng rnôk dơi chuat ndrel njuat jâng ta quảng trường Ba Đình lịch sử. Rnôk tiăr nti ta nâm trôk nar krit djơh yơn mpôl hên nha hôm nsrôih dŭt âk gay wat jêh uĕh nău dơn kan đŏng”.

Dâk ta nklang mbor tahen, Trung úy Trần Đức Nhân rngot rhơn: Aơ lah nău n’hao êng săk têh kuâng đah săk nơm. Dơi rgop tâm mbor n’grĭng hăn tahen bah nar lễ têh khlay, Nhân uănh nê lah nău rhơn n’hao êng, lah nău dơn kan êng. Nuih n’hâm tâm rnglăp n’hanh nău mĭn rôih dăng way kơl ăp cán bộ tahen rlău dơi jêr jŏt, krit jêr.

“Ân lĭr jĭr nuih n’hâm bah săk nơm gay rlău jêr jŏt, săk nơm ân nsrôih âk n’hanh ân geh nău mĭn rôih dăng dŭt têh. Nău n’hao êng săk lah săk nơm hŏ rgop du gâl jê̆ tâm nău kan têh bah neh dak”

Hôm Thượng úy Nguyễn Phúc Đệ, lôch jut ndăn ăp dak mih hôm krêp mbĕ ta muh măt kranh nar sa an gĭt ăp mpôl tahen hŏ ƀư wat jêh rơh tiăr nti tơm, aƀaơ dôl lăp tâm rơh tiăr nti way nkô̆ jru, rgum lăp tiăr nti đah ăp mpôl. Geh jâk r’ah, geh huăr rgănh, yơn nău khlay lơn lah nău n’hao êng săk rnôk nsoh ta săk he ndơ Cảnh sát dak lêng, dơi rgop du gâl jê̆ tâm nar lễ têh khlay bah rnoi nuĭh.

“Săk gâp nơm dŭt lap n’hanh rhơn nđơr rnôk dơi rgop tâm nău dơi bah nar lễ têh. Gâp n’hanh ăp băl tâm mpôl dŭt nsrôih gay ƀư wat jêh uĕh nău dơn kan.

Lôch rơh rgum tiăr nti, Trung tướng Lê Quang Đạo – Tư lệnh Cảnh sát dak lêng n’hanh Trung tướng Bùi Quốc Oai – Chính ủy Cảnh sát dak lêng – hŏ jŭr na nê̆ tât tĭng mpôl gay ôp khâl, rgŏ jă. Ăp tơ̆ nhŭp ti lhăt, ăp nău ntĭnh ntăn nsing nơm, ndrel ăp nklâm ndơ hŏ kơl ntop tay nuih n’hâm nđơr an cán bộ, tahen. Ntơh măt, Kruanh Bộ Tư lệnh Cảnh sát dak lêng Việt Nam, Trung tướng Bùi Quốc Oai ntĭnh ntăn:

“Ăp oh nô ân mât njrăng n’hâm suan, mât rnoh âk tiăr nti, ndjôt tâm săk he nău rhơn n’hao êng săk. Tâm nar rgum têh, ăp njuat jâng bah ăp oh nô mbra mô dơn mpơl suan dăng n’hanh hăr đăng, ma hôm lah rup gui bah nău têh jêng, hun hao bah mpôl Cảnh sát dak lêng Việt Nam.”

Ntik n’hao nuih n’hâm Cách mạng Khay 8 n’hanh Quốc khánh 2/9 mô dơi roh, đah nău way ơm nsrôih lơh nsrôih dơi bah Tahen ƀon lan Việt Nam, nău nsrôih tâm rnglăp, nău nsrôih mô gŭ rlu bah cán bộ tahen, rơh n’grĭng hăn tahen ta Quảng trường Ba Đình nar 2/9 tât, ăp njuat jâng chuat dăng, rĭng grep bah ăp tahen Cảnh sát dak lêng nklăp mbra lah rup gui uĕh, an tay nău têl nkah jru tâm nuih n’hâm ƀon lan lam dak n’hanh băl mpôl dak bah dih./.