Ngih rƀŭn Jrâu kan Cảnh sát Mât hành chính ndrel đăp mpăn nau rêh (mrô 50 Lý Tự Trọng, Phường Buôn Ma Thuột, n’gor Dak Lak), ma rhiăng đảng viên tâm Đảng bộ Sở Văn hoá, Thể thao drel Pâl n’aih, Thuế n’gor Dak Lak tât ƀư săm ƀŭt gay ma rgâl thẻ. Đảng viên Hồ Văn Tĩnh mbơh, tâm nau ƀư nau kan geh ƀư dŭt ngăch:

            ‘Lah nsum, ƀư săm ƀŭt roh nklăp 3-5 mnĭt, rnôk gŭ kâp ri kŏ 5-7 mnĭt, rnoh dĭng lĕ nau kan knŭng roh 10-15 mnĭt. Bôk năp, rmôt kan công an ntĭm ntŭk gŭ nklih rup, jêh nê ntơm ƀư nau kan mbơh nau bah săk êng nŭih tâm săm ƀŭt đảng viên kơt: nar khay năm deh, nar lăp Đảng, ƀon tơm, ntŭk gŭ...lah ăp nau mbơh geh tâm ntrŭp ri lôch nau geh pă rgâl”.

  Tâm ntŭk pă rgâl Công an Phường Ea Kao, n’gor Dak Lak, kŏ geh âk jêt nŭih đảng viên tât ƀư nau kan pă rgâl. Đảng viên Trần Quang Thống, 65 năm, Chi bộ Tổ dân phố 11, Phường Ea Kao nkoch mbơh, nau kan pă rgâl ta aơ dŭt nơih:

            ‘Gâp lăp Đảng năm 1984 tât rnôk aơ hŏ 2 tŏ rgâl thẻ, kŏ tâm tahen. Rơh bôk năp, ntơm ƀư nau pă rgâl thẻ geh chip tĭng nau ntrŭnh mhe bah Rnâng kan rđau kan Trung ương gay mât đảng viên ueh lơn ndrel ndâk ăp nau ƀư nau kan tâm ntŭk kan đảng tâm dâng rjăp lơn. Ăp nŭih đồng chí công an ƀư nau kan pă rgâl thẻ ueh ngăn, rjăp đŏng, ndrel knŭng roh đê̆ mnĭt lah jêh dơm”.

            N’gor Dak Lak jêh rnôk rnôk rnglăp geh rlau 137 rbăn đảng viên, tâm 5.200 ntŭk kan đảng. Ƀư nau rđau mrô 51 bah Ban Bí thư ndrel nau nchrăp bah Bộ Công an, Công an n’gor rđau đă Jrâu kan Cảnh sát mât hành chính ndrel mât đăp mpăn nau rêh ndrel công an 102 xã, phường, pă ndơ dŏng ndrel rmôt nŭih gay ma ntrŭnh ƀư gay ma ndơn, pă rgâl thẻ đảng viên. Jêh rlau du pơh aơ, hŏ pă geh rlau 70 rbăn thẻ, geh rlau 50% nau nchrăp. Nchrăp tâm pơh aơ, nau kan pă rgâl mra jêh, rlet nau nchrăp luh. Thiếu tá Lê Đình Đô, Groi Kruanh Jrâu kan Cảnh sát mât hành chihs ndrel đăp mpăn nau rêh, Công an n’gor mbơh:

            ‘Jrâu kan nchrăp kơl mbơh nchră nau ân rđau kan Công an n’gor pă nau ƀư nchrăp ân ueh ntŭk ntu, ndơ dŏng, máy móc ân 102 ntŭk kan công an xã, phường tâm lam n’gor ƀư nau kan rgum rgâl thẻ. Êng nê, tâm mpeh ba dâng bah n’gor Dak Lak pă 2 ntŭk sŏk pă rgâl thẻ ân rmôt đảng viên dôl pah kan ta aơ; đah ăp nkuăl mpeh ba dâng bah n’gor kŏ pă 3 ntŭk, pah kan ‘3 ca 4 kíp” lôch nar prao ndrel nar pơh gay ma rgum rgâl thẻ ân đảng viên”./.