Tĭng nau mbơh Đại hội, 5 năm rlau aơ, Đảng bộ n’gor Quảng Ngãi ndrel n’gor Kon Tum bah năp nơh hŏ rđau ƀon lan nsôih, geh âk nau dơi khlay ndrel ăp ntil n’ăp ma chính trị, văng sa, rêh jêng, neh dak ndrel rnă njrăng. Đah nau kan ndâk njêng Đảng ndrel trong kan chính trị, Đảng bộ n’gor hŏ rgum rđay ƀư dơi ăp nau ntrŭnh bah Trung ương ndrel n’gor uỷ, ƀư jêh nau kan dăp rgum ntrong kan, ntŭk kan Đảng ân nâp, geh âk nau kan mhe, nau kan ueh, săk tam nau ndâk njêng Đảng.

            Tâm nau kan văng sa, rêh jêng, n’gor Quảng Ngãi ƀư jêh ndrel rley nau dơi, nau hun hao geh 7,3%/năm, dâk tal 10/34 n’gor, nkuăl ƀon têh. Nau geh tơm prăk ngih dak meo rlet, tâm 5 năm geh rlau 165 rbăn rmen. N’gor ƀư jêh Bôk nau kan jut ngih truh sat đah rnoh rlau 900 ngih. Nau kan n’huch ach o ƀư ueh, huch 2,17%/năm; tâm nê gôl yôk huch geh 4,64%/năm.

            Đại hội nsôih tât năm 2030, Quảng Ngãi lah n’gor hun hao, jêng du nau khlay bah nkuăl miền Trung-Tây Nguyên. Tâm nê, nsôih hun hao tâm lvang năm 2026-2030 geh ntơm 10%/năm hao gŏ lơ. Năm 2030, nau hun hao bôk nŭih nklăp 6.900 tât 7000 đôla. Tât năm 2030, nsôih mô hôm rnăk ach o.  Nau mbơh chính trị ta Đại hội ntoh măt Đảng bôk tal I, năm kan 2025-2030 năl kloh 5 nau kan tơm ndrel 3 nau kan ân rgâl mhe.

            Wa Bùi Thị Quỳnh Vân, Bí thư n’gor uỷ Quảng Ngãi lah rjăp: Đại hội Đảng bộ n’gor lah Đại hội bah nau rnơm, bah nau rƀŏng ndrel nau kan:

            ‘Mô ŭch nsrŭng tâm ăp nau tă dơi geh, Đảng bộ n’gor ân mro rvê tât nau ôp: Quảng Ngãi dôl ntŭk dâk đah ăp n’gor êng tâm lam dak? janh uănh, năl kloh rnoh dơi hun hao rnôk aơ bah Quảng Nãu hŏ geh tâm ban dơi ma nau geh, hŏ ƀư dơi ăp nau kan dơi bah nŭih pah? Nau nâp bah nau rêh geh prăk, nau ŭch rŏng geh dơi tâm rnglăp nsum bah ăp kon nŭih đŏng lah mô? Ntơm bah nê rhuăt luh nau tă dơi blau ueh, ngăn; năl kloh nkô̆ nau kan, nau ƀư, ntrong kan, ăp nau ntrŭnh khlay gay kơl Quảng Ngãi hun hao”.

            Ntoh nau tâm rơh rđau Đại hội, Uỷ viên Bộ Chính trị, Groi Thủ tướng Rnâng kan Chính phủ Nguyễn Hoà Bình kơp dơn, rnê prêh ăp nau nsôih bah Đảng bộ, n’gâng kan ndrel ƀon lan n’gor Quảng Ngãi năm kan rlau aơ, nchŏng luh nau kol, nau ê dơi, ê nâp ân rklaih.

            Mpeh nau kan ndâk njêng Đảng, Groi Thủ tướng lah kloh, ân geh ndâk Đảng bộ ndrel nau kan chính trị kloh, nâp lah nau tơm bah nau tơml ngăn lah uănh nâp nau ndâk rmôt cán bộ  tâm ban dơi ma nau kan.

            Mpeh nau kan hun hao văng sa rêh jêng năm kan tât bah Quảng Ngãi, Groi Thủ tướng Nguyễn Hoà Bình đă n’gor rƀŏng tât hun hao công nghiệp tĭng nau jru, nau kan prêh, sŏk nau kan văng sa Dung Quất ƀư tơm, ntrŭt dăng văng sa nsum ma ntŭk kan Chu Lai gay njêng du n’gâng tơm neh dak. Mpeh pâl n’aih, n’gor njêng luh nau kan ueh, nthoi doi ‘bri” ndrel “dak lêng” ƀư ueh nau kan “du ntŭk tât, 3 neh dak”, njêng nau lư gôl dak Lý Sơn, nau dăng ueh ntŭk uănh, ueh bri neh Măng Đen ndrel nau dăng nglah pe Đông Dương lah du ntil nau văng sa tâm rgop ueh. Groi Thủ tướng lah rjăp:

            ‘Quảng Ngãi geh du ntŭk văng sa, chính trị ueh, tâm nglah pe Đông Dương, lah mpông nthoi Tây Nguyên tât dak lêng. Gâp rnê nuih n’hâm bah n’gor rnôk năl ƀư nkô̆ nau hun hao 10% hai gŏ lơ. Yơn lah, aơ lah du nau ntul rlong têh, du nau rlong đah nau dăng ndrel nau dơi mât ƀư nau kan bah n’gor uỷ. Rđau kan ân geh ƀư mĭn jru, ƀư têh, yor ƀon lan. Ân jăng lơi nau mĭn kan ơm knŭng kâp rnơm tâm ntuh kơl nsum, nau kan ơm kâp rnơm Trung ương ân bư nau kan ndrel sŏk tơm prăk. Ntrong ƀư, nau ntrŭnh kloh ueh gay rgum dăng ndrel hun hao nau dăng ueh tâm ƀon lan, tâm ntŭk kan tăch rgâl mơ lah nau kan ƀư tâm di rnôk aơ. Đah nau dăng dơi têh jêh rnôk tâm rnglăp ndrel nau mpŏng bah rach năm mhe, gâp đă Đại hội ân tâm nchră, ndâk nau ntrŭnh ngăn, geh nau kan prêh, nchrăp dơi nau rgâl mhe, tâm ban ndrel geh nau nsôih chính trị prêh lơn, nsôih ân dơi, mô lah rlet nau nchrăp hun hao hŏ nchrăp luh”./.