Tĭng uănh năl bah Mpôl hăn ôp uănh mbrô 26, Ban Thường vụ Tỉnh ủy Dak Lak hŏ lor đăp jru, an ƀư jăp ăp trong nchrăp, nghị quyết bah Trung ương. N’gor gay năn ngăch dăp rgum ăp tŏng nuĭh kan, ntrôl ngăch tâm pă gưl, tâm pă n’gâng kan, rgâl dơh glêh siƀŭt n’hanh rgâl mbrô. Đah nău dơn kan hun hao wăng sa, Dak Lak hŏ rdâk njêng trong nchrăp hun hao tĭng năm, tĭng n’gâng kan; njêng Ban rđău đă tĭng ƀư rnoh tât hun hao bar mbrô, nkre n’gluh an dŏng âk trong nkra gay ntrŭt ntrôl hun hao wăng sa – rêh jêng kon nuĭh. Tâm an ƀư Nghị quyết 57, n’gor hŏ nsrôih ƀư jêng ngăn ngăn ăp nău dơn kan, trong nkra mpeh khoa học công nghệ, rgâl blău ƀư mhe n’hanh rgâl mbrô.

Đah nău ŭch tât hun hao wăng sa bar mbrô, Mpôl hăn ôp uănh năl lah nău jao rnoh tât hun hao an 102 xã, phường hôm mô geh ntŭk nsing khoa học. Lôch jêh tĭng ƀư nău kan tâm quý I tâm ban kơt rnoh ngăch hun hao aƀaơ mô hŏ di kơt trong nchrăp ndơ̆ luh. Tâm rnôk nê, du đêt trong kan săk geh âk n’hanh dơh uĕh kơt pâl nđaih, si gle mô hŏ ntik n’hao lĕ nău khlay, rnoh âk rgop tâm hun hao wăng sa bah n’gor hôm đêt.

Tâm trong an ƀư Nghị quyết 57, du đêt ntŭk hôm mâp âk jêr jŏt tâm nău ƀư jêng ngăn ngăn nău dơn kan. Aƀaơ hôm 56 siƀŭt geh tât ăp tŏng trong tĭng tâm trong kan khoa học công nghệ, rgâl blău ƀư njêng mhe n’hanh rgâl mbrô mô hŏ dơi nkra bah. Ndơ dŏng công nghệ thông tin, ntŭk rgum prăp nău lư n’hanh ăp ndơ rhŏ dŏng rgâl mbrô, lơn lah ta nkual jru, nkual ngai nha hôm âk mpăng đêt, khuch tât nău dơi tam an ƀư ăp nău dơn kan.

Ta rơh pah kan, n’gor Dak Lak hŏ dăn đă Trung ương mĭn uănh droh rklaih ăp wăk kol geh tât neh tuch tăm, si gle; gŭ mĭn nău dăp rgum ăp xã geh rnoh huêt jê̆; lôch jêh trong kơl đah rmôt cán bộ tâm dâng n’hanh uănh khlay ntuh kơl tay ntung trong. Nkre, n’gâng kan ta ntŭk dăn đă du đêt trong kơl mha êng gay njêng geh tay trong hun hao sŭng soih mhe let năp tay. Bí thư Tỉnh ủy Dak Lak Lương Nguyễn Minh Triết dăn đă:

“Dăn đă mpôl geh siƀŭt gay n’gor dŏng Nghị quyết 72 bah Quốc hội mpeh rlong dŏng du đêt trong kơl mha êng an nkual ƀon têh Buôn Ma Thuột, nsrôih rdâk njêng Buôn Ma Thuột jêng nkual ƀon têh rgum nklang Tây Nguyên gay rgum hun hao an nkual dja; Tâl bar đŏng lah ta mpeh luh nar geh nkual wăng sa Nam Phú Yên, he mbra dơi lah suan ntrôl hun hao bar mbrô lah mô uănh tâm nkual wăng sa dja dŭt têh đŏng. Mpôl hên dăn đă dŏng Nghị định 127 năm 2012 bah Chính phủ tâm ban kơt nkual wăng sa Bắc Vân Phong gay geh trong wăch rgum ntuh kơl tâm nkual dja.”

Uănh năl mpeh lôch jêh tĭng ƀư ăp rnoh tât hun hao wăng sa – rêh jêng kon nuĭh bah Dak Lak, wa Nguyễn Thanh Nghị an lah rnoh ngăch hun hao aƀaơ bah n’gor nha hôm ngai rđĭl đah rnoh tât hun hao bar mbrô hŏ ndơ̆ luh. Săk geh hun hao mô hŏ tâm di đah săk geh, dơh uĕh bah n’gor. Khoa học công nghệ, rgâl blău ƀư njêng mhe n’hanh rgâl mbrô mô hŏ jêng suan ntrôl ngăn gay ntrŭt ntrôl hun hao wăng sa.

Kruanh Mpôl hăn ôp uănh mbrô 26 dăn đă n’gor ra uănh tay lam lĕ rngôch ăp tơm ndơ ta ntŭk; rgum droh rklaih ăp kô̆ yơn mpeh siƀŭt, ntŭk ntuh kơl tăch rgâl; n’hao nău dơi tam mât bôk kan, ntrôl dăng rgâl mbrô n’hanh tĭng ƀư ăp kôp ăp đăt ndal trong hun hao têh jong, lơn lah hun hao tơm nuĭh kan gay mbluh tơm ndơ an hun hao ngăch n’hanh nâp dăng.

“Dăn đă ăp oh nô ra uănh tay lam lĕ rngôch ăp tơm ndơ ta n’gor gay rhŏ dŏng an hun hao; ra uănh tay siƀŭt, ntŭk ntuh kơl tăch rgâl bah n’gor, rgâl dơh glêh siƀŭt, Mât bôk kan uĕh blău mhe rgâl mbrô mhâm ƀư dăn đă ăp oh nô ra uănh tay rgum droh rklaih ăp kô̆ yơn gay mbluh soih ăp tơm ndơ n’hanh tĭng ƀư ăp kôp geh nău tam đăt ndal jŏ jong lah tơm ndơ”.