Rlet rlău 120 năm njêng n’hanh hun hao, Đăk Lăk aƀaơ geh rnoh neh ơm geh, rnoh ƀon lan ta rmôt ăp n’gor, nkuăl ƀon têh bôk năp ta lam dak, wăng sa hun hao âk, mât rnoh hun hao râng geh 8% tâm năm tâm mbro 20 năm dăch aơ. Ngăn lah, Đăk Lăk hôm nha lah ntŭkl geh rgum âk nău ueh êng mpeh nău khlăy bâh ƀon lan kăl e, nău way bâh âk ntŭk rêh jêng bâh lĕ 49 mpôl rnoi ndrel gŭ rêh. Râng n’hanh ntoh ngơi rhơn Đảng bộ, n’gâng kan n’hanh ƀon lan ăp mpôl rnoi Đăk Lăk, Groi Thủ tướng rnâng kan Chính phủ Nguyễn Hòa Bình đă n’gor Đăk Lăk an geh rgum lĕ soan dăng, sŏk dŏng geh săk rnglăy nău dơi, nău ơm geh, ntrôl dăng nău dơi an hun hao, rgâl mhe nău pah kan wăng sa, tơm lah hun hao ăp ntil ndơ tuch tăm, ndơ si gle, nău kan têh, nău ueh âk, tăch ngluh âk ntil ndơ, ntrôl ăp nău pah kan tuch tăm, si đar, tui ka n’hanh nău dơi njêng tay ŭnh nar, rdâk njêng trong kan chính trị kloh ueh, nâp nâl, kan jăp, pah kan, yor an ƀon lan ma kan, hun hao wăng sa rêh jêng, mât ntŭk gŭ rêh, mât đăp mpăn nău rêh jêng, mât đăp mpăn ngih dak, rnă njrăng đăp mpăn lam ntŭk rêh jêng.

Ta rơh ƀư tâm mâp, ndơn kan an nuĭh leo kan n’gâng kan văn hóa, thể thao n’hanh pâl nđaih lĕ mbơh nău ntrŭnh n’hanh pă nău kơp dơn ndo khlăy ngih dak “mât rbăy loih khoan lŭ Thác Hai an n’gor Đăk Lăk. Ta meng nĕ, Viện kỷ lục ngih dak pă 3 kỷ lục an n’gor Đăk Lăk geh: Đăk Lăk lah n’gor geh rnoh neh n’hanh rnoh cà phê dŭt âk ngăn ta Việt Nam, dak bât Lăk, nkuăl Lăk, n’gor Đăk Lăk lah dak bâh geh ơm dŭt têh ta Tây Nguyên- Việt Nam, bri ngih dak mât Yok Đôn, n’gor Đăk Lăk geh rnoh neh bri săr dŭt têh ta Việt Nam.