Tĭng nău mbơh ta Tâm nchră bah UBND n’gor Dak Lak ƀư nar ntri (8-9), tât nar 28/8, lam n’gor mhe n’gluh geh rlău 3.939 rmen prăk ntuh kơl năm 2025, geh 1/3 trong nchrăp. Ăp ntŭk nchrăp ntuh kơl têh kơt cao tốc Khánh Hòa – Buôn Ma Thuột, trong meng dak lêng Phú Yên, ndơ dŏng Nkual wăng sa bah dâng Phú Yên, Nkual công nghiệp Hòa Tâm, ndrâm dak lêng Bãi Gốc… wăk kol mpeh siƀŭt  n’hanh đă ntrơn du da dê. Tâm rnôk nê, âk trong nchrăp kan bah dih ngân sách kơt tổ hợp thương mại – dịch vụ, ăp nkual pâl nđaih bri dak, nkual công nghiệp công nghệ cao an ƀư mbrơi đŏng.

Bah năp nô nău dja, wa Tạ Anh Tuấn, Kruanh UBND n’gor Dak Lak đă ăp n’gâng kan tâm n’gor, ăp n’gâng kan tâm dâng  ntrôl ngăch n’gluh tơm prăk ntuh kơl, uănh aơ lah nău dơn kan khlay gay ntrŭt ntrôl hun hao. Ăp wăk kol mpeh neh ntu, trok tâm, siƀŭt ntŭk gŭ rêh, rdâk njêng ân dơi rgum droh rklaih tâm khay dja dĭl. Lơn lah, Kruanh UBND n’gor Dak Lak đă mô an ăp nuĭh tơm ƀư ndranh mô dăng blău râng ƀư ăp ntŭk nchrăp kan, der bah nău mbrơi ƀư, n’hao âk tơm prăk, ƀư hŭch nău tam dŏng tơm ndơ ntuh kơl. Ndrel đah nău ŭch ntrôl ngăch n’gluh tơm prăk ntuh kơl, UBND n’gor Dak Lak rđău đă ra uănh tay, gay rgâl trong nchrăp ntuh kơl 2025, rgum tơm prăk an ăp ndơ ƀư geh suan ntrôl dăng, geh nău dơi n’gluh tơm prăk âk, nchrăp ntuh kơl jong dah găp 2026 – 2030. Nău ŭch lah njêng nău rgâl kloh tâm ăp trong nchrăp kan rgum tơm, rgop tĭng ƀư rnoh tât hun hao rlău 10% tâm rơh tât.