Bah năp nău tât krit nji bah phŭt mbrô 5, ăp mpôl kan dơi kan n’gor Dak Lak hŏ an ƀư ăp kôp âk trong nkra gay đăp mpăn săk nuĭh n’hanh drăp ndơ bah ƀon lan,  nuĭh lơh joi ka ta ntŭk.

Lam n’gor aƀaơ geh rlău 3.000 duk lơh joi ka đah rlău 12.500 nuĭh kan. Tâm nê, nklăp 500 bôk duk n’hanh 2.800 nuĭh kan dôl hăn nklang dak lêng; rnoh hôm ƀa ƀă kât nsrŭng ta meng kơh. Tâm pă tĭng nkual, geh 424 bôk duk lơh joi ka ta nkual dak lêng Quảng Ngãi – nkual ƀon têh Hồ Chí Minh; 24 bôk ta nkual dak lêng Đồng Tháp – An Giang; 70 bôk ta nkual dak lêng ndru gôl dak Trường Sa. Lĕ rngôch rnoh duk lơh joi ka dja hŏ dơi kât nsrŭng đăp mpăn; hang rhiăng gŭk mât tui ka dơi kât ndăl nâp. Ndơ ôp ngơi dơi mât mbluh aih, đăp mpăn năn ngăch mbơh gưl bah lơ n’hanh kan nsum lhăt đah n’gâng kan, mpôl kan dơi kan ta ntŭk tâm nău nkra nău tât.

 Lơ 25/8, tahen Biên phòng n’gor Gia Lai hŏ kuăl jă geh 3.397 duk đah rlau 23.100 nŭih ƀon lan lăp kơh gŭ der đăp mpăn bah năp phŭt mrô 5 (phŭt kajiki). Gay ma njrăng phŭt mrô 5, Rnâng kan rđau tahen Biên phòng n’gor Gia Lai hŏ ntrŭnh 3 nau ntrŭnh ndal, đă ăp rmôt kan n’hao nau uănh n’ôi, mbơh nau tât bah mih sial tâm nkuăl n’har bri ndrel nkuăl dak lêng; nkre mbơh, ntĭm ăp dik gĭt ntŭk, ntrong hăn bah phŭt gay ma njrăng der, rklaih luh mô lah mô dơi hăn tâm nkuăl khuch jêr. Rmôt tahen biên phòng hŏ mbơh ntĭm 626 duk tui ka, đah 5.147 nŭih tât leo duk mpan tât ndram đăp mpăn; nkre kuăl jă geh 3.397 duk ka, đah 23.104 nŭih ƀon lan hao kơh./.