Ăp nar bôk khay 6, ta Nhih nti THPT Buôn Ma Thuột, kon se nti ndăn tĭng mông gay nkah tay nău lĕ nti, luyện đề n’hanh ƀư lôch jêh nău blău ƀư bài. Oh Trần Quốc Trung, kon se nti jrô 12A14 an gĭt dôl rgum ôn luyện ăp đề thi ăp năm bah năp nơh, uănh joi tay đề thi bah âk nhih nti êng êng gay nchrăp an sơch lăp nti Đại học. Oh hŏ ơm rdâk njêng trong nchrăp kơt nti na nê̆ an tĭng môn, lor nchrăp joi gĭt nău lư n’hanh trong sơch lăp kon se nti bah ăp nhih nti.

“Gâp rgum ôn ăp đề thi ta ăp năm bah năp nơh, pơk uănh tay âk đề thi ta ăp nhih nti êng êng, nchih trong nchrăp gay gâp nti tĭng môn n’hanh pơk uănh âk nău rgop ta ăp trang mạng xã hội bah ăp yuh nô bah năp gay dơi lăp nti Đại học Kinh tế Nkual ƀon têh Hồ Chí Minh đah pe môn tơm lah Toán, Anh n’hanh Lý.”

Bah kơi ăp mông ôn tập ndăn ngăch bah kon se nti lah nău ndrel hăn grêt dăch bah nai ntĭm n’hanh rnăk wâl. Nai ntĭm Nguyễn Thị Xuân Hương, Hiệu trưởng Nhih nti THPT Buôn Ma Thuột an gĭt, lôch uănh năl săk blău kon se nti rlău ăp rơh kiểm tra, nhih nti hŏ rdâk njêng ăp trong ntop kơl tâm di đah tĭng rmôt nuĭh. Nhih nti hŏ kan nsum đah me bơ̆ kon se nti n’hanh nuĭh kan dak si gay đăp mpăn n’hâm suan, nău rvê an kon se nti bah năp rơh thi.

“Đah ăp kon se geh n’hâm suan mô ngăch dăng, kan nsum đah mpôl kan dak si gay ntĭm nti an ăp kon se đăp mpăn ngăch dăng săk suan gay lăp tâm rơh thi tốt nghiệp. Đah ăp mpôl kon se mô hŏ năp ăp tŏng nău nti ri jao na nê̆ an tĭng nai ntĭm bah ăp rmôt kơl ntĭm nti êng, ntĭm ăp kon se mô dơn ta nhih nti ma lĕ bah dih mông nti đŏng. Nkre geh ăp nău rđău đă nai ntĭm chủ nhiệm lor nchrăp kan nsum đah nai ntĭm chủ nhiệm, me bơ̆ kon se ndrel kruanh rđău kan nhih nti gay n’hao rnoh âk tốt nghiệp bah ăp kon se đŏng.”

Tĭng Sở Giáo dục n’hanh Đào tạo n’gor Dak Lak, pah kan ôn tập dơi ƀư tĭng trong grêt dăch nău dơi kon se nti, njrăng uănh tât mpôl kon se nti geh ma nău mô dơi tât tốt nghiệp. Ndrel đah pah kan way kan, n’gor Dak Lak hŏ ƀư lôch jêh ăp rơh nchrăp an rơh thi. Lam n’gor geh 1 Hội đồng thi đah 64 ntŭk thi tơm n’hanh 55 ntŭk thi rnă lor; nklăp 1.500 jrô thi ngăn n’hanh 40 jrô thi kâp lor. Nklăp 5.000 cán bộ, nai ntĭm, nuĭh kan n’hanh ăp mpôl kan geh tât mbra râng rơh thi.

Wa Lê Thị Thanh Xuân, Giám đốc Sở Giáo dục n’hanh Đào tạo n’gor Dak Lak, an gĭt, rơh thi năm aơ têh lơn đah rnoh nuĭh râng thi âk mpưm, ntŭk ƀư hvi jêng rgum lĕ rngôch lam trong kan chính trị, pah kan ƀư nsum ân n’hao dăng, êt lhăt, ăp kôp.

“Leo ƀư ôp uănh lam lĕ rngôch n’hanh năn ngăch rđău đă ăp ntŭk thi nkra bah mô ăp tŏng jrô thi, nsưng mpan, camera, rvăt năp ndơ dŏng; đăp mpăn ăp ntŭk dơi sơch tŏng di an rơh thi đăp mpăn. Mpeh nchrăp nuĭh kan hŏ lor nchrăp rgum tŏng rnoh cán bộ, nai ntĭm n’hanh nchrăp kơi năp nti na nê̆ mpeh nău way, nău blău kan an lĕ rngôch nuĭh kan. Uănh nsum, pah kan nchrăp, nău kan nsum n’hanh an ƀư nău kan tât rnôk dja hŏ lor nchrăp ăp tŏng, êt lhăt n’hanh di trong nchrăp da dê."

Đah nău nchrăp bah ơm bah ăp nhih nti, nău ndrel hăn bah nai ntĭm n’hanh nău nsrôih bah n’gâng kan ntĭm nti, Dak Lak dôl lăp tâm n’glăp dŭt bah năp rơh thi đah nău ŭch mô dơn an du rơh thi đăp mpăn, răp jăp ma hôm nta trong dơh gay ăp kon se nti, lơn lah kon se nkual jêr jŏt, geh rnôk hun hao dŭt uĕh nău gĭt blău bah he nơm.