N’gor Dak Lak dŏng âk nău geh êng ntoh lư kơt “ntŭk gŭ “Ntŭk cà phê têh” bah Việt Nam, rƀŏng tât ntŭk cà phê lam ntŭr neh. Dak Lak ntŭk tâm mâp đah ăp trong wăng sa Bắc-Nam n’hanh Đông-Tây; geh nău dơi hun hao logistics, wăng sa dak lêng, công nghiệp nkret njêng jru, ŭnh nar nkra njêng n’hanh wăng sa lŏ mir. Aơ lah ntŭk gay n’gor ƀư geh nău rƀŏng hao jêng GRDP rĭng geh 11%/năm tâm lvang 2026-2030.

Dăp rgum nkra rgâl rơh aơ mĭn lah ntrong ƀư hun hao “3 nkual-3 trong-2 nklang-3 ngăch hao jêng”, rƀŏng tât ƀư tay ăp ntŭk wăng sa tĭng trong tâm rgop rjăp, joi ƀư nău dơh tĭng nkual. Nkre, n’gor rgum tâm 3 nău rgâl mhe têh geh khoa học công nghệ n’hanh rgâl mrô; tu tơm nuĭh kan n’hanh nkret njêng; boăt nthoi ntung trong mhe.

Tâm nchră ta rơh rƀŭn, wa Đào Bảo Minh, Bí thư Đảng ủy, Kruanh HĐND phường Tuy Hòa an gĭt, tâm rnôk ndâk njêng dăp rgum nsum lĕ rngôch”, mât uĕh na nao nău geh bah tĭng ntŭk.

 Tĭng ntŭk bôl tĭng nău geh ngăn ngên rnôk ma dăp rgum mpôl hên lĕ mĭn njêng n’hanh mpŏng ŭch, nchrăp nău hun hao tâm năm tât n’hanh mpôl hên lĕ ndơ̆ ăp nău mĭn aơ lăp tâm dăp rgum dơi uănh an ri geh n’hâm soan gay an mpôl hên tĭng tâm dăp rgum nĕ, mpôl hên geh nău ntuh kơl n’hanh hun hao. Ntuh kơl bah mpeh Trung ương, bah mpeh n’gor n’hanh n’ăp lĕ nău nsrôih bah ƀon lan.

Tâm dăp rgum lĕ mĭn kloh nău rƀŏng hun hao pâl nđaih jêng ngoăy tâm âk ntŭk wăng sa khlay bah n’gor Dak Lak. Yor nê, tâm rnôk ƀư dăp rgum, N’gâng kan Văn hóa, Thể thao n’hanh pâl nđaih lĕ tâm rgop dŭt rjăp đah ăp ntŭk kan mbơh ntĭm tâm nĕ uănh khlay ngăn trong nchrŏng dăp rgum ăp nkual pâl nđaih bah n’gor. Wa Trần Hồng Tiến, Giám đốc N’gâng kan Văn Hóa, Thể thao n’hanh Pâl nđaih n’gor Dak Lak an gĭt, âk ntŭk pâl nđaih khlay dơi nchrŏng na nê̆, bah nkual pâl nđaih lam dak vịnh Xuân Đài, yôk prêh bri krŏng Xuân Hòa tât bri ngih dak Yok Đôn, n’glău Lắk, ăp nkual pâl nđaih sinh thái, pâl nđaih nsum mpôl, pâl nđaih lŏ mir n’hanh ƀon nău.

Jêh rnôk dơi Thủ tướng uănh an dăp rgum bah n’gor, mpôl hên mbra tâm ôp tâm nchră tay ndơ̆ tâm ăp nău nchrăp ƀư, bôk nău rdgop an tâm nchră hun hao pâl nđaih n’hanh mbơh ƀư ăp trong nchrăp ƀư tĭng dăp rgum di trong rƀŏng.

Tĭng wa Đỗ Thái Phong, Groi Kruanh HĐND n’gor Dak Lak, ntŭk ntoh lư bah rơh aơ nău nkra rgâl dăp rgum aơ lah du ntŭk hun hao têh lơn đah nău boăt nthoi nkual na nê̆ đah mpeh Đông n’hanh Tây. Tâm nĕ, mpeh Đông mbra kơl lor hun hao công nghiệp, wăng sa dak lêng n’hanh pâl nđaih dak lêng; hôm mpeh Tây rgum lŏ mir công nghệ mhe, nkret njêng jru, ŭnh nar nkra njêng. Aơ lah 2 n’hâm soan ntop kơl ndrel an trong hăn khlay wăng sa mhe bah Dak Lak.

Nkra rgâl dăp rgum rơh aơ lah nkô̆ nău pháp lý n’hanh nău dŭt khlay. Ăp trong rƀŏng hun hao wăng sa-rêh jêng, mât njrăng bri dak-rnă njrăng bah n’gor tâm năm tât an tĭng dăp rgum n’gor.

Tĭng nău mĭn dăp rgum, bah aƀaơ tât năm 2030, Dak Lak an rgŏ jă nklăp 676.000 rmen prăk ntuh kơl lam kon nuĭh gay mbơh ƀư ăp nău nchrăp ƀư mpeh ntung trong, ntŭk logistics, ndrâm dak lêng, tach ndeh păr, nkual công nghiệp, nkual wăng sa n’hanh ăp ntŭk rhŏ an têh hvi. Aơ lah lvang n’gor Dak Lak rgum mkra ăp “Ntŭk kol” mpeh ntung trong, boăt nthoi nkual n’hanh ntŭk hun hao gay geh n’gâng tơm an hao jêng jŏ jong.

Dăp rgum nkra rgâl n’gor Dak Lak mô knŭng pơk luh ntŭk hun hao mhe, ma hôm saơ nău mpŏng ŭch hao têh dăng bah n’gor tâm lvang hun hao mhe. Đah trong uănh jŏ jong, nău mĭn mhe n’hanh dŭt n’hâm ƀư, Dak Lak dôl ndâk njêng trong nâp nâl gay ndrel lam dak hăn lăp răch năm hao êng nơm bah rnoi nuĭh.