Tâm Phường Buôn Ma Thuột geh bôk nau kan tâm mâp nau kan tăch rgâl đah ăp nŭih ƀư kan tăch rgâl bah Dak Lak-Trung Quốc, gay ntrŭt dăng jru lơn nau tâm boh kan tăch rgâl ndơ tuch tăm Việt-Trung, ngăn lah tâm ăp nau kan bah ntrong tăm sầu riêng. Tâm rnôk rƀŭn, ăp ntoh măt tâm nchră, mbơh nkoch ƀư kloh nau ŭch bah ntŭk tăch byăp, play, ngăn lah play sầu riêng ta Trung Quốc. Năm 2024, rnoh sầu riêng Việt Nam tăch luh tât Trung Quốc geh 736 rbăn tấn, hao bơi tât 2 tŏ rđil năm bah năp nê. Tĭng ăp ntŭk kan tăch rgâl bah Trung Quốc, êp nau nơih tă bah rmôt ƀư tâm boh nau kan văng sa lam nkuăl, “ntrong kan tăch rgâl’ nkuăl n’har bri Việt-Trung kơl an ƀư nau ngăch lơn, nau ŭch rvăt sa bah nŭih ƀon lan hao prêh ri nau geh dơi mpeh nkuăl tăm, rnoh nâp kah đăp mpăn ndrel trong pă tăch âk ntil tâm lôch năm kŏ rgop tâm nau hun hao bah play sầu riêng Việt Nam ta Trung Quốc.

Ăp ntoh măt ntoh nau ŭch njêng ăp ntrong tâm rnglăp ê nkra, đăp mpăn tŏng nau dơi geh kơp dơn tă bah ntuh kơl ndrel mpŏng geh ntŭk tăch âk, geh ntŭk tât kloh. Rnôk aơ, ntoh măt ăp rmôt kan ndrel kí ton nau nkah tâm boh tâm nau tăch luh ndơ tuch tăm ndrel sầu riêng. Rmôt kan tăch rgâl n’gor Dak Lak ndrel ntoh măt nŭih kan bah Trung Quốc hŏ ký ton nau ndâk ntŭk tăch rgâl play ASEAN ân ta n’gor Dak Lak./.