Măng 22/11, Đảng bộ, n’gâng kan ƀon lan n’hanh nuĭh ƀon lan ăp rnoi nuĭh n’gor Dak Lak lĕ n’gŭr răm ƀư Nkah gĭt 120 năm Nar ndâk njêng n’gor.

Groi Thủ tướng rnâng kan Chính phủ Nguyễn Hòa Bình râng n’hanh ntoh ngơi ta nar ƀư. Lơ 22/1/1904, Nău dơi lĕ rngôch Đông Dương an Nghị định nkhah Dak Lak jêng ngoăy tâm 20 n’gor nkual ƀon têh mpeh tâm Trung kỳ rnôk Pháp thuộc.

Dak Lak aƀaơ geh rnoh neh geh ơm, rnoh nuĭh mpeh tâm rmôt ăp n’gor, nkual ƀon têh dâk bôk năp lam dak, nkre lah ntung trong khlay bah Tây Nguyên, geh ndơ dŭt dơh an kan ndrêl, boăt nthoi ntŭk ntô hun hao, jêng n’hâm soan ntrôl kan ndrel hun hao wăng sa, văn hóa, rêh jêng đah ăp ntŭk tâm nkual Tây Nguyên, duyên hải miền Trung n’hanh ăp ntŭk wăng sa têh bah lam dak.

Râng n’hanh ntoh ngơi ta nar ƀư, Groi Thủ tướng rnâng kan Nguyễn Hòa Bình mĭn lah nău khlay bah n’gor Dak Lak đah nkual n’hanh neh dak dơi mĭn lah tâm âk nău ntrŭnh, nău kơl bah Trung ương.

N’gor Dak Lak an rgum rgâl mhe ntrong ƀư wăng sa khlay, khlay tă bah du đêt n’gâng tơm kơt: Hun hao ăp ndơ lŏ mir, si glê geh âk, têh hvi, uĕh kah âk, tăch n’gluh têh; ntrôl nău ƀư lŏ mir nkret njêng lŏ mir, si glê, tui ka n’hanh nkra njêng ŭnh nar.

Uănh khlay mât ndrăy, mât ƀư nău uĕh văn hóa way ơm uĕh lăng bah ƀon lan ăp rnoi nuĭh hăn ndrel đah hun hao pâl nđaih văn hóa;

ntrôl dăng boăt nthoi nkual, tâm nđŭr, kan ndrel đah ăp ntŭk; đăp mpăn mât njrăng bri dak-rnă njrăng n’hanh tâm rnglăp bah dih.