Kêng măng 21/8, ta Hà Nội, Đảng bộ N’gâng kan ntĭm nti ƀư Đại hội rơh bôk năp, năm kan 2025-2030. Groi Thủ tướng Chính phủ Lê Thành Long râng n’hanh ntoh ngơi ntĭm rđău. Tâm năm kan mhe, Đảng bộ N’gâng kan ntĭm nti năl lah rgum 10 nău kan khlay, rgâl mhe tâm ndâk njêng Đảng n’hanh ƀư tĭng nău kan chính trị.

Groi thủ tướng Lê Thành Long uănh lah prêh trong hăn, nău kan dơi nkoch tâm nău mbơh Chính trị, nkre uănh Đảng bộ an uănh khlay 6 nău n’gâng tơm: ndâk njêng Đảng kloh uĕh, nâp dăng; n’hao uĕh rmôt kan nuĭh nai; jêh trong mât uănh ntĭm nti; hun hao ntĭm nti đại học; dăp rgum ngih samƀŭt; ndâk ƀư ngih samƀŭt tâm di nău ŭch nti hăn ndrel đah rgâl nkual ƀon têh, ngăn lah ngih samƀŭt phổ thông nội trú ta 248 xă n’har bri neh kơh.