Tâm ƀon Kniết, xã Ea Ktur, n’gor Dak Lak, rnăk yuh H’Lối Êban (rnoi Rđe) ƀư nau ngêt sa hao ngih mhe, khuch răm đah nau tâm râng bah âk mpưm kônh wa tâm ƀon. Ngih mhe ndâk, prăk rlau 400 rkeh, geh nkra tâm nklang mir cà phê, uănh tât lŏ Trăm Prong ndrih ueh, njêng lơn ueh m’ak, hơm răm đŏng.

            Yuh H’Lối nkoch: Bah năp nơh lah rnăk jêr ngăn, geh Ngih dak kơl an ndrôk ntil, deh geh 2 kon, rnăk tăch ndôk rvăt sur me, tăch geh 50 rkeh. Rnôk aơ, nau geh bah rnăk vâl tă bah 6 sào cà phê, tăm nsum ma tiêu ndrel sầu riêng. Kon bu ndăm têh mhe lôch hăn tahen, kon bu ur jê̆ dôl hăn nti. Geh nau rêh ueh lăng, đăp mpăn nar aơ, H’Lối Êban nkoch:

            ‘Lah ueh ăp kônh công an hŏ mât ân rnăk ƀon lan, mât đăp mpăn ân ăp nŭih. Công an kŏ ntĭm ƀon lan ƀư tĭng nau ntrŭnh, ntrong kan bah Ngih dak, pah kan văng sa hun hao. Kơt rnăk hên, ntơm bah rnăk ach o hŏ rlet nau jêr. Cà phê tiêu geh rnoh ndrel kŏ geh sầu riêng, rong tay ndrôk, rong tay sur, ri ma rnăk geh dơi ndâk ngih aơ”.

            Yuh H’Nhân Niê tâm ƀon K’ram, xã Ea Ktur mbơh, âk năm công an ƀư ăp nau kan rgŏ jă lam ƀon lan mât đăp mpăn neh dak. Bah nê, kơl an kônh wa gĭt nau mĭn, nau kan bah ăp phung rlăng, nsĭch, nkhah nau tâm rnglăp ăp rnoi. Công an kŏ nchŏng kloh ăp nau mhik rlăm bah phung tih dôih in drăp ndơ tâm mạng, nau druh ndăm tih đăp mpăn hăn trong. Yuh H’Nhân Niê lah rjăp, bu ur tâm xã Ea Ktur mro hăn ndrel ma nau kan “Lam ƀon lan mât đăp mpăn neh dak”:

            ‘Mbơh đă oh nur hên tâm ngih ri ân ntĭm nti oh kon nơm mô dơi hao tâm mạng xã hội nchih nklăp nau ndrel nkoch mbơh mô lah ƀư mô tĭng nau mô ueh lơh rdâng nsŭk đă ƀư mhik ngih dak nơm, rdâng lơh ƀon lan nơm. Nơm mro nkah kon sau, rnôk hăn trong, tŏng năm mơ dơi ƀĭt ndeh. Tâm rmôt bu ur kŏ ntĭm đă oh kon, oh yuh ƀon lan êp nơm mô dơi djăt tĭng nau nsich đă bah ƀon lan’.

            Lah mục sư mât chi hội Tin lành xã Ea Ktur, wa Y Djan Êban tâm ƀon Kniết, xã Ea Ktur, ntoh măt HĐND n’gor Dak Lak, mbơh: nau rêh bah kônh wa ueh lăng, đăp mpăn, dah rŏng tĭng chroh, rƀŭn rgum mpôl chroh kŏ rnơm geh nau mât bah công an ăp gưl:

            ‘Gâp saơ công an ntơm bah xã tât n’gor râng mât neh dak ndrel kơl an ƀon lan geh đăp mpăn. Kơt lah, mô geh công an ri nŭih hăn tâm trong mô geh nau tâm di tâm ban yor mô geh nau gĭt, geh nau tâm tom ndeh, tâm jin tâm lah jêh ri âk nau tât êng. Công an nau kan bôk năp lah mât neh dak, tak bar lah mât ƀon an, nau nê khlay ngăn”.

            Đah 23 năm ƀư kan Công an, trung tá Y’Sila Êban, Kruanh rmôt mât đăp mpăn, công an xã Ea Ktur, n’gor Dak Lak rhơn yor hŏ rgop nau mât neh dak, đăp mpăn rnă njrăng, đăp mpăn nau rêh tâm ƀon lan:

            ‘Rnôk aơ, gâp geh kon bu klô dôl nti nau kan công an, tĭng nau kan gâp nơm. Ŭch lah ma ƀon lan nơm mô dơi tĭng ăp nau ma bu nsŭk đă, ƀư mô ueh, ma ân nsôih pah kan, tăm cà phê, tăm tiêu gay hun hao văng sa rnăk vâl”.

            Bôk năm aơ, tâm xã Ea Ktur, Rnâng kan druh ndăm công an ƀon lan, N’gâng kan công an tâm rgop ma ăp rmôt tâm Dak Lak ƀư bôk nau kan “Sĭt ma ƀon lan”. Ndrel ma nau nah, khâl, pă ndơ ân ăp rnăk tahen khĭt, bôk nau kan hŏ nkra nâp 3 ngih rƀŭn ƀon lan, kơl an du ngih 19/8, du ngih kơl an, jao du ntŭk ‘Jrâu máy tính ân oh” ndrel pă 100 nklơm prăk nau ngơi Anh, 20 bôk ndeh vah jâng pă ân kon se...Trung tá Du Lê, Kruanh Công an xã Ea Ktur, n’gor Dak Lak mbơh, ntrŭnh nau kan lơh, mbram phung tih dôih, mât nau đăp mpăn tâm rnôk nkah 80 năm nar Cách mạng khay 8 ndrel Quốc khánh 2/9 ndrel Đại hội ăp gưl, ăp rmôt n’hao mât uănh, mât ân tơm tăm, mât nau geh dơi pah kan ân ƀon lan:

            ‘Rnôk aơ ri công an n’hao nau kan lơh njrăng phung tih dôih tâm rnôk hăn ƀư kan, đăp mpăn ngăn tâm yan klih sầu riêng, yan play sa mlu. Oh nô vay hăn mêt uănh tâm ăp ntŭk, tâm mâp ma nŭih tĭng chroh, nŭih bu rnơm tâm ƀon lan rnoi mpôl đê̆, nkah đă kônh wa mât drăp ndơ, uănh yan tuch tăm. Êp nê tâm nê tâm rgop nsum ma công an, lah saơ geh nau ntôn lah ri năn mbơh ma công an xã”.

            Plŏ tay Ea Ktur, Dak Lak tâm ăp nar khay Pham, du mau ndrih jêng bah cà phê, tiêu, sầu riêng...mbơh nau rêh hơm răm. Gay ƀon Ea Ktur hun hao, ăp tahen công an hŏ ndrel ƀư nau kan nsum ma ƀon lan tâm nau mĭn, nau kan, mât đăp mpăn nâp nâl, njrăng rdâng nau mĭn ƀư nkhah nau tâm rnglăp ăp rnoi, mât nau đăp mpăn, ueh lăng ân ăp rnăk vâl, ƀon lan./.