Kruanh Hồ Chí Minh ntĭm: Cán bộ lah n’gu tơm bah ăp ntil nău kan. Tâm rơh nuĭh kan ăp gưl mhe dơi dăp rgum tay, nău kan dăp rduăl, cán bộ hŭch đêt, nău khlay bah n’gu tơm ma Wa nkoch tât, lơn ma jêng khlay lơn.

Ta xã Khánh Sơn, mpeh yôk yang nhâp nar Khánh Hòa, ngai đah nklang n’gor rlău 120km, ntŭk gŭ dĭ hvi, yôk bri ndrung wăr, ƀon lan tâm ƀah ngai. Ntơm nơh, nău mât uănh rnoh ngăch nău kan tâm dâng mâp mô đêt jêr jŏt. Aƀaơ, ăp ôi bah cán bộ ntơm bah nău pơk máy tính, lăp phần mềm Rnoh weh nsĭt geh nău dơi kan - KPI. Ta màn hình luh săk nău dơn kan: Wơt ƀon lan, nkra ƀư siƀŭt, nkra ƀư nău kan ndal ndal. Kêng dŭt nar, mô kâp geh nuĭh nkah, tĭng nuĭh keh êng lôch jêh nău kan, nchih ăp nkô̆ nău ntoh luh. phần mềm hŏ jêng “nuĭh groi nđôi mô mpơl săk”, kơl kruanh rđău kan rƀah gĭt rnoh âk nău kan bol ma ntŭk gŭ kan ngai ngât, nkre njêng an cán bộ way bên, uănh năl êng săk nơm. Yuh Nguyễn Thị Hà, chuyên viên Ban rdâk njêng Đảng xã Khánh Sơn, nkoch, aơ lah nău way bên mhe dơi jêng bah khay 4/2025, rnôk n’gor dŏng KPI an ăp ntŭk gŭ pah kan, n’hanh trong ƀư mhe kơl yuh nchrăp lor lơn:

“Dŏng KPI mpôl hên saơ geh nău tâm ban. Nău kan mbra mô geh mbrơi nkai nar ton. Mpôl hên mbra gĭt he ƀư dơi dah âk nău kan chuyên môn, dah âk nău kan văn thư, quản trị… nkre, tâm rđĭl đah rnoh jêr âk lah đêt rđĭl đah công chức ndrel chuyên môn. Uănh năl kloh lơn nsĭt geh nău dơi kan bah he ma nău chấm điểm bah kruanh rđău kan”.

Nkôp KPI bah n’gor Khánh Hòa dơi ƀư lhăt jĭr n’hanh ăp kôp, dŏng bah chuyên viên tât kruanh rđău kan. Mô dơn gưl xã, âk nhih pah kan nsŏng kơl n’hanh đơn vị bah n’gor hŏ dŏng KPI đŏng. Wa Nguyễn Minh Tuấn, Groi Giám đốc mât uănh Ntŭk rgum hun hao tơm neh rnă ntêm bah n’gor lah rjăp, KPI hŏ kơl nhih pah kan kơp năl dơi rnoh yach ngăch nău kan, ƀư ntŭk nsing gay đăp mpăn tŏng geh tơm prăk dŏng an nhih pah kan mât dŏng êng:

“Lah mô mât uănh dơi ri cán bộ geh nău mbơh nău kan âk yơn nsĭt geh nar kan đêt. Nar luh kan n’hanh prăk khay jêr mât uănh, nău kan ntoch jong, pah kan trok tâm prăk khay an nuĭh kan lơn ma jêr jŏt an nhih pah kan đŏng”.

Gay ntik n’hao nău dơi tam bah trong uănh năl cán bộ n’hanh săk blău nău kan ma trong KPI, n’gor Khánh Hoà hŏ njêng Rmôt pah kan KPI, rgum cán bộ ơm geh nău blău kan, pah kan tât leh ăp pơh. Bí thư Tỉnh ủy Khánh Hoà – wa Nghiêm Xuân Thành ƀư tơm na nê̆ ăp rơh hop uănh năl, rhuăt luh nău tă tơm gĭt kan. I ngăn rlău 5 khay dŏng an saơ KPI kơl tâm pă ntil nău kan kloh rvah, nkre đah rnoh n’glĕ an jŏ mông nar n’hanh keh mbrô jêr. Ƀư ngăch, di nar ton ntop geh điểm; ƀư mbrơi geh n’hâp điểm. wa Võ Thị Thu Hương, Groi kruanh Ban mât uănh nkual wăng sa n’hanh Nkual công nghiệp, nuĭh tâm Rmôt pah kan KPI, an gĭt:

“Mông nar ƀư nău kan mbra dơi nkre đah rnoh n’glĕ tât rnoh nău kan bah tĭng nău dơn kan, nkre đah n’glĕ nar ƀư wat jêh. Wat jêh ơm n’glĕ nar ton ri dơi ntop điểm, rlơ̆ tay ƀư jêh mbrơi ri geh n’hâp điểm. Rnoh keh mbrô jêr bah nău kan dơi kơp tĭng rnoh ntơm bah 1 let lơ. Ntơm bah nê, điểm KPI bah tĭng cán bộ mbra dơi rgum nchih tĭng khay, quý, năm, uănh tĭng nău ŭch dŏng bah kruanh rđău kan”.

Ntơm bah nău rvê bôk năp lah ân “n’glăp rnoh nchih rgum nău lư âk mpưm”, âk cán bộ ta Khánh Hòa mbrơi uănh KPI kơt du “găr dak si sĭt dăng suan ăp nar”, kơl mât săk nơm uĕh lơn. Wa Phạm Quốc Hoàn, Giám đốc Sở Khoa học n’hanh Công nghệ an lah, geh KPI, kruanh mât bôk kan dơh nchŏng luh ntŭk dăngh – rbăn lhơ bah tĭng nuĭh tâm trong ƀư nău kan.

“Rêng e- Office aƀaơ hŏ rgum n’glăp KPI dja lăp, nău kan geh ntŭk mât prăp êng nău tă lôch kan, jêng luh mbor nchih tĭng cán bộ têl tĭng nău kan. Kêng dŭt lôch jêh nău kan dơi nchih têl ta phần mềm. Mô geh nău jêr jŏt rnôk an ƀư”.

Nău di ngăn tâm trong uănh năl ma KPI kơl cán bộ, viên chức geh nău dơn kan jăp lơn, kruanh mât bôk kan dơh lơn rnôk n’gluh nău n’glêh an tâm pah kan mât bôk kan. Ntơm nơh, nău lah way bên “wat jêh uĕh nău kan” way lah nău bâr ngơi bôk năp. Aƀaơ, ăp nuĭh geh bảng điểm êng, rnoh mông pah kan n’hanh rnoh âk hồ sơ di nar ton na nê̆ jêng nău “uĕh” dơi ƀư jêng ngăn ngăn.

Ntơm bah Khánh Hòa, nuih n’hâm rgâl mhe hŏ mâp di rêng tâm râp đah trong nchrăp Trung ương. Nklang khay 7, Ban Chính sách - Chiến lược Trung ương n’gluh an dŏng rpaih KPI, pơk hvi trong leo mât bôk kan yach ngăch tâm lam trong kan chính trị, dŏng ntơm bah nar 1/1/2026. Wa Trần Lưu Quang, Bí thư Trung ương Đảng, tă ƀư Kruanh Ban Chính sách - Chiến lược Trung ương, Bí thư Thành ủy nkual ƀon têh Hồ Chí Minh rnôk pah kan đah n’gor Khánh Hòa uănh năl:

“Aơ lah trong ƀư mô di lĕ dĭng n’gor geh da dê đŏng. Ăp oh nô hŏ blău ƀư mhe rnôk n’gluh rnoh tât kan na nê̆. Ntơm nơh, he way uănh năl ma siƀŭt, đah nău lah nsum nsum kơt “n’hao dăng”, “ntrôl ngăch”. Rơh dja, n’gor hŏ nsrôih rgâl mhe, rnoh âk kloh rvah tâm uănh năl cán bộ. Nsum mpôl kruanh rđău kan n’gor hŏ tâm ban ŭch dơn kan âk, mpŏng nuih n’hâm tâm ban ŭch dja dơi rêng lam jŭr tât gưl xã, ƀư dơi kơt nê he geh nău dơi têh.”