Nar ntri (3/9), UBND n’gor Gia Lai hŏ rgum nsĭt du đêt công chức, viên chức bah ăp n’gâng kan bah n’gor sĭt pah kan ta ăp xã mpeh nhâp nar bah n’gor gay ntop kơl, droh rklaih jêr jŏt, nkra ăp nkô̆ nău ntoh luh tâm rnôk n’glăp dŏng n’gâng kan 2 gưl. Rơh rgum nsĭt dja geh 11 công chức, viên chức bah ăp n’gâng kan bah n’gor, sĭt pah kan ta 11 xã ta mpeh nhâp nar n’gor.

Tĭng n’glêh an bah UBND n’gor Gia Lai, jŏ pah kan ta xã bah ăp công chức viên chức dơi rgum đă lah ntơm bah 3 tât 6 khay. Tâm rnôk pah kan tâm dâng, công chức, viên chức ân mbơh ăp pơh, mbơh rgum kêng dŭt, nkre râng ntĭm nti, kơi năp nti nuĭh kan ta ntŭk, rgop n’hao nău dơi mât bôk kan ta gưl xã. Tĭng Bí thư Tỉnh ủy Gia Lai Hồ Quốc Dũng, n’glêh an dja lah njuat hăn ngăn ngăn gay tĭng ƀư nău n’glêh an bah Bộ Chính trị mpeh ntrôl dăng an ƀư trong leo n’gâng kan 2 gưl, n’hao nău dơi tam kan bah lam trong kan chính trị tâm dâng.