Ta phường Pleiku, UBND n’gor Gia Lai mhe ƀư Tâm nchră ntrŭt ntrôl ngăch ntuh kơl năm 2025. Ta aơ, n’gor hŏ ndơ̆ 69 n’glêh an trong nchrăp ntuh kơl, siƀŭt kơp dơn đăng ký ntuh kơl n’hanh ký ton siƀŭt nchih nkah tâm boh, đah lĕ rngôch tơm prăk ntuh kơl 4,7 rmen USD.

Ta tâm nchră, kruanh rđău kan n’gor Gia Lai hŏ mbơh gĭt mpeh trong rƀŏng hun hao. Na nê̆, ta nkual mpeh luh nar Gia Lai (n’gor Bình Định ơm), n’gor rgum tâm pah kan công nghiệp nkret njêng, ntrŭp nkra; công nghiệp văn hóa-pâl nđaih; hun hao ŭnh nar sĭt jêng tay, rhŏ dŏng ndrâm dak lêng n’hanh ntŭk rgum kan logistics.

Hôm ta mpeh nhâp nar Gia Lai (Gia Lai ơm), mbra ƀư ntŭk way tăm têh hvi; an ƀư geh nău tam ăp trong nchrăp ŭnh nar sĭt jêng tay tĭng trong nchrăp điện VIII; hun hao Nkual wăng sa mpông n’har bri Lệ Thanh, wăch rgum tơm ndơ nkret njêng bah Campuchia gay nkret njêng, tĭng  rêng rnoh khlay nâp dăng.

Bah meng wăch rgum ntuh kơl, Gia Lai rgum ra uănh tay, droh rklaih jêr jŏt an ăp trong nchrăp kan mbrơi an ƀư, n’hao nsing nơm ntŭk ntuh kơl. Wa Phạm Anh Tuấn – Kruanh Ủy ban nhân dân n’gor Gia Lai an gĭt, ntŭk ntuh kơl mhe dôl dơi rgâl uĕh bah n’gor tât tâm dâng:

“Gia Lai rgâl soih uĕh ntŭk ntuh kơl. Mpôl hên hŏ jao ăp rnoh tât kan KPI tât tĭng n’gâng kan n’hanh 135 xã, phường. Ăp ntŭk mbra nchrăp lor tât dơi, rgâl mhe trong mât uănh tât rhŏ dŏng, uănh nuĭh ƀon lan n’hanh doanh nghiệp lah ntŭk rgum tơm – lah năch bah nhih pah kan ngih dak. N’gor rmal ngăn cán bộ, công chức geh nău ƀư jêr jŏt an nău hun hao nsum bah n’gor n’hanh nking kol mpôl doanh nghiệp. Gâp mpŏng ăp doanh nghiệp geh du rơh "rgâl” lah ngăn, ƀư ngăn n’hanh geh nău dơi ngăn”.

Râng tâm nchră, Tiến sĩ Trần Du Lịch – Ủy viên Hội đồng Mbơh ntuh trong kơl prăk kaih gưl neh dak an lah, nău dơi bah n’gâng kan 2 gưl mơ lah suan rhôp ntuh kơl ngăn. Lah geh suan rhôp dja, dŭt âk doanh nghiệp mbra hăn tât ntuh kơl ta Gia Lai:

“N’hŭch sŏk soăy, rong an sŏk soăy neh ntuh lah nău khlay, yơn khlay lơn ma doanh nghiệp ŭch geh lah nuĭh kan geh jâng nsing ndơ dŏng nta trong dơh, n’gâng kan ân lah ‘bu đâng deh’ an doanh nghiệp. Gay mhâm ƀư, doanh nghiệp tât Gia Lai wăng sa ngăn, kloh rvah mbra mô klach rvê mô lah mâp jêr jŏt”.

Ta tâm nchră, UBND n’gor Gia Lai hŏ ndơ̆ 69 n’glêh an trong nchrăp ntuh kơl, siƀŭt kơp dơn đăng ký ntuh kơl n’hanh ký ton siƀŭt nchih nkah tâm boh, đah lĕ rngôch tơm prăk 4,7 rmen USD. Tâm rnoh dja, geh 27 trong nchrăp dơi ndơ̆ n’glêh an trong nchrăp ntuh kơl n’hanh siƀŭt kơp dơn ký ntuh kơl, đah lĕ rngôch tơm prăk đăng ký nklăp 26.400 rmen prăk (tâm ban đah rlău 1 rmen USD). Tâm nê geh 13 trong nchrăp công nghiệp, 14 trong nchrăp ndơ dŏng nkual, rkŭm công nghiệp; ăp trong nchrăp ŭnh nar sĭt jêng tay n’hanh  Nhih dak  si.

Bah meng nê geh, 42 trong nchrăp dơi ký ton ma trong ƀư siƀŭt nchih nkah tâm boh ntuh kơl, đah lĕ rngôch tơm prăk nchrăp ƀư rlău 93.400 rmen prăk (tâm ban đah bơi 3,6 rmen USD). Aơ lah rnoh nkah uĕh, mpơl nău nsing nơm bah mpôl doanh nghiệp tâm trong rƀŏng tât hun hao bah n’gor; lah jâng ntơm khlay gay ntrơn rgâl dăp rgum wăng sa, n’hao săk geh, kah uĕh  n’hanh nău dơi tâm rlong. Ăp trong nchrăp kan rgum tâm trong kan điện ŭnh nar sĭt jêng tay; tuch tăm n’hanh tui ka; hun hao bri nkre đah mât rong ndrôk, rdâk njêng nhih máy – nkret njêng ndơ tuch tăm. Wa Nguyễn Thị Lan Hương – Kruanh Hội đồng Quản trị Công ty Cổ phần ƀư njêng n’hanh Tăch n’gluh Việt Phúc, đơn vị ntuh kơl tâm trong kan tuch tăm công nghệ mhe an gĭt:

“Mpôl hên ntuh kơl tâm nkual tuch tăm dŏng công nghệ mhe ta Chư Sê. Aơ mbra lah trong nchrăp ntĭt leo lor tâm trong kan tuch tăm đah ăp nkual ƀư yơng ntil bản quyền, nkual mât ndray gen n’hanh nkual dŏng công nghệ mhe. Mpôl hên ŭch rŏng trong nchrăp kan jêng ntŭk buăt nthoi ăp kỹ thuật uĕh  mhe, nkre ndrel hăn kônh wa hợp tác xã n’hanh ƀon lan kan lŏ mir”.

Tâm nchră ntrŭt ntrôl ngăch ntuh kơl năm 2025 ta Gia Lai mô dơn pơk luh âk trong tâm boh đah lĕ rngôch tơm prăk hang rmen USD, ma hôm lah rjăp nău nsrôih bah n’gor tâm nău rdâk njêng ntŭk ntuh kơl kloh rvah, dơh uĕh n’hanh nâp jong. Đah trong rƀŏng hun hao kloh rvah an tĭng nkual, ndrel hăn bah n’gâng kan bar gưl n’hanh nsum mpôl doanh nghiệp, Gia Lai dôl tĭng kơn năp di ntŭk khlay tât săk geh, ntŭk rgum ăp tơm ndơ gay hun hao wăng  sa nđĭr uĕh, tuch tăm công nghệ mhe, công nghiệp nkret njêng n’hanh ŭnh nar sĭt jêng tay. Aơ mbra lah suan ntrôl khlay ndơ̆ Gia Lai jêng ntŭk rgum hun hao mhe bah nkual Tây Nguyên tâm let năp tay.