Ta rơh tâm nchră, bar hê nuĭh leo kan tam ban ŭch n’hao tay lơn nău tâm mâp n’hanh tâm mbơh kan gâl têh n’hanh ăp gưl kan, ntrôl dăng nău tâm nđur đah ăp ntŭk kan, ntŭk leo kan bâh 2 ding. Bar hê nuĭh leo kan lĕ tâm ban ŭch tâm rgop tay na nê, tâm kơl ndrel ta ăp rơh tâm mâp ta nkual n’hanh lam ntur neh, ngăn lah ta LHQ n’hanh nău kan mô tâm rgop. Việt Nam rnê n’hanh mbra ƀư ntung njŏ gay ma Nepal n’hao nău tâm kơl kan đah ASEAN n’hanh đă Nepal ƀư ntung njŏ kơl Việt Nam ntrôl nău tâm boh kan đah ăp dak Nam Á. Bar hê nuĭh leo kan tâm ban ŭch tâm rgop na nê̆, tât râng ta ăp nău nsrôih nsum bâh lam ntur neh ta trong tâm rdâng đah rgâl trôk nar mih sial, ƀư tĭng na nê̆ nău tâm ton mô geh nsuk ƀŏ ta năm 2050 tâm ban kơt tât râng ta ăp nău kan mât đăp mpăn bâh LHQ.