Năm bah năp, n’gor Khánh Hòa geh âk nău rgâl na nê̆ tâm nău hăn ndrel đah doanh nghiệp, nta nơih ntrôl hun hao wăng sang sa-rêh jêng. Nô Lê Thanh Vân, Groi Giám đốc Công ty Miwa Vina (Nkual công nghiệp Suối Dầu, xă Suối Dầu) nkoch, doanh nghêp mhe dơi Ban Mât uănh nkual Wăng sa, Nkual công nghiệp n’gor Khánh Hòa ntop kơl nkra samƀŭt ntuh kơl pơk hvi ngih nkra njêng dŭt ngăch, samƀŭt ƀư knŭng roh 5 nar:

Doanh nghiệp bah mpôl hên lah doanh nghiệp jêt n’hanh dah găp, 100% prăk dak bah dih. Ban mât uănh mô lah ăp ngih pah kan, ban, nău kan hăn ndrel, ntĭm ăp samƀŭt du trong ngăch dơh, di nău ntrŭnh pháp luật. Aơ lah nkô̆ nău dŭt khlay, geh soan wăch rgum gay ăp nuĭh ntuh kơl mư uănh tât lơn.

Rgâl nkra samƀŭt hành chính ta Ban Mât uănh Nkual wăng sa, Nkual Công nghiệp n’gor dơi ăp doanh nghiệp tâm n’hanh bah dih dak uănh lah prêh. Wa Lê Hồng Phương, Groi Kruanh Ban Mât uănh nkual wăng sa, Nkual Công nghiệp n’gor Khánh Hòa an gĭt, samƀŭt nkra di samƀŭt an ntuh kơl dơi rhoăt đêt bah 10 nar jŭr hôm 5 nar, êp tât, nsrôih hôm 3 nar.

Mpôl hên kơl an ăp nuĭh ntuh kơl an nkual wăng sa rgum, lơn lah ăp nuĭh ntuh kơl ăp gưl tâm nkual công nghiệp gay samƀŭt ƀư tĭng di trong knŭng nklăp 10 nar aƀaơ knŭng hôm 5 nar, nău ngăch ngăn dơi ƀư, mpôl hên mbra rhoăt jŭr hôm 3 nar. Khlay ngăn lah rnôk doanh nghiệp ndơ̆ samƀŭt rhăch nău, Ban an kơp uănh n’hanh ntĭm ngăch an doanh nghiệp lôch jêh, ntop tay, tŏng ăp samƀŭt rhăch nău geh uĕh nâp.

N’gor Khánh Hòa ntrôl ngăch hun hao ŭnh nar nkra njêng, rƀŏng tât n’hŭch knơm tâm ŭnh nar hóa thạch, đăp mpăn rnă njrăng ŭnh nar ngih dak n’hanh hun hao wăng sa kloh uĕh, nâp nâl. Tât khay 6/2025, Khánh Hòa lĕ geh 57 nău nchrăp ƀư ŭnh nar nkra njêng đah dĭng lĕ dăng bơi 3.750 Mw, geh điện sial, điện măt nar, thủy điện n’hanh điện măt nar chor jay, geh bơi 7% rnoh điện nkra njêng lam dak. Lơn lah, nkual mpeh bah lơ n’gor hun hao âk ăp nău nchrăp ƀư têh kơt Ngih măy Nhiệt điện BOT Vân Phong 1 đah dăng 1.320Mw, rgop nklăp 3% rnoh điện lam dak. Ta nkual mpeh bah dâng, ăp tập đoàn điện sial tâm rgop Trung Nam lĕ ntuh kơl hang rbăn rmen prăk tâm tổ hợp điện măt nar, điện sial tâm rgop nkra njêng  bôh kloh uĕh, uĕh an dŏng neh nkro ntang.

N’gor Khánh Hòa mĭn lah ŭnh nar lah 1 tâm 4 n’gâng tơm hao jêng khlay, geh nău rƀŏng jêng ntŭk ŭnh nar ngih dak đah dĭng lĕ dăng nchrăp 14.000 MW tâm năm 2030, geh điện măt nar, điện sial, điện khí n’hanh điện hạt nhân. N’gor dôl ntrôl ngăch ăp nău nchrăp ƀư khlay kơt ngih măy điện hạt nhân Ninh Thuận, thủy điện Bác Ái, LNG Cà Ná... Nkre rgum jêh ntung trong ngih wâl rse ndơ̆ điện, an ntrŭnh nău kơl wăch rgum ntuh kơl, rgŏ jă tâm ban ŭch bah nuĭh ƀon lan gay ƀư tĭng nău rƀŏng hun hao ŭnh nar kloh uĕh, nâp nâl.

Wa Hồ Xuân Ninh, Giám đốc N’gâng kan Công thương n’gor Khánh Hòa an gĭt, ŭnh nar đăp mpăn mô knŭng rgop nău geh sŏk an tơm prăk ngih dak ma hôm nta an ƀon lan kuăl jă ntuh kơl ăp nău nchrăp ƀư nkra njêng công nghiệp mhe:

Ŭch ngăn nău ntrŭnh an nău rƀŏng săch kơl lor ăp nău kan, ntil nău geh khlay hao âk, công nghệ mhe, uĕh đah ntŭk ntô gŭ âm, ndơ geh âk khoa học-công nghệ mhe, rgop hao nău geh an tơm prăk. Nkual công nghiệp kơt Dốc Nắng, Trảng É, mô lah Cà Ná 1 lĕ săch geh ăp nuĭh ntuh kơl geh trong nchrăp ntuh kơl ntung trong rĭng tâm ban, ngăch wăch rgum ăp nău nchrăp ăp gưl.

Ntung trong dơi ntuh kơl, ntŭk ntô ntuh kơl nkra rgâl; công nghiệp nkret njêng, ŭnh nar nkra njêng, pâl nđaih-rhŏ nău rdâk hao ngăch lah ndơ an Khánh Hòa hao ngăch hun hao wăng sa, n’hao nău rêh nuĭh ƀon lan. Jêh nglăp nsum n’gor, pơk hvi ntŭk ntô hun hao, Khánh Hòa rƀŏng tât năm 2030 jêng nkual ƀon têh mpeh tâm Trung ương, hao jêng wăng sa 12%/năm, rĭng geh hao 14%/năm. Wa Trần Quốc Nam, Kruanh UBND n’gor Khánh Hòa an gĭt:

Đảng bộ, UBND n’gor mĭn lah, ƀư soih ăp ntŭk kol têh mpeh trong ƀư n’hanh ntung trong, lơn lah ăp nău nchrăp ƀư nkân; rgum hun hao tâm ban ntung trong n’hanh ngih wâl nkual công nghiệp, nta an hao jêng mhe. Ntrôl hun hao 4 n’gâng tơm hao jêng geh công nghiệp-ŭnh nar, pâl nđaih-nău rhŏ tăch rgâl n’hanh nkual ƀon têh mhe; ntrôl ngăch tâm rnôk rgâl mrô, rƀŏng tât nău ŭch wăng sa mrô geh 1/3 dĭng lĕ ndơ tâm năm 2030.