Nar nđaơ (11/9), Ban Mât uănh nkual wăng sa n’hanh ăp nkual công nghiệp n’gor Khánh Hòa ƀư an nău ntrŭnh ŭch an nuĭh ntuh kơl ƀư 2 nău nchrăp ƀư nkual ƀon têh ta Nkual wăng sa Vân Phong. Liên danh Công ty TNHH Mặt trời Phú Quốc n’hanh Công ty TNHH Mặt trời Hạ Long dơi jao mbơh ƀư nău nchrăp ƀư Nkual ƀon têh mhe Đàm Môn n’hanh Nkual ƀon têh Tu Bông đah dĭng lĕ rnoh ntuh kơl rlău 65.300 rmen prăk.

Lĕ 2 nău nchrăp ƀư rgum nsum jay gŭ, tăch rgâl, pâl nđaih, ntĭm nti, dak si, tơm si, công viên n’hanh ntung trong kỹ thuật rĭng tâm ban. Năm dŏng lah 50 năm kơp bah nar jao neh; nchrăp ntơm rdâk ƀư bah năm 2025 n’hanh jêh ta dŭt năm 2034. Wa Trần Minh Chiến, Kruanh Ban mât uănh Nkual wăng sa n’hanh nkual công nghiệp n’gor Khánh Hòa an gĭt, 2 nău nchrăp ƀư aơ mbra rgop ndơ̆ nkual wăng sa Vân Phong jêng ntŭk rhŏ nău, tăch rgâl, pâl nđaih, nkre rgop ƀư di nău kơl êng ma Quốc hội lĕ an Khánh Hòa.