Ta n’gor Khánh Hòa, jêh rlău 5 khay kơt dŏng KPI-rnoh mrô wĕ săk rnglăy nău kan-an saơ, KPI mô rlu ta ăp rnoh mrô ta màn hình măy tính ma hôm lah mâng treh uĕh tam nău kan bah êng nuĭh n’hanh rmôt. Wa Phạm Minh Nhựt, Kruanh Hiệp hội Pâl nđaih Nha Trang Khánh Hòa, uănh lah:

Nău kơt dŏng KPI tâm ăp ntil nău nsĭt săk rnglăy đŏng. Đah cán bộ rnôk kơt dŏng ăp rnoh an ƀư, ăp nuĭh wât kloh moh ndơ ƀư, ƀư tĭng m’hâm ƀư. Rnôk nuĭh mkra nău kan wât moh ndơ ƀư n’hanh an m’hâm ƀư an uĕh ri kơl an nuĭh geh dơn nău kan nĕ dơi mkra ngăch lơn.

Knơm KPI, kruanh n’gor lĕ gĭt na nê̆ mông nar pah kan rĭng ăp nar bah ăp ngih pah kan, ntŭk kan. Ntĭt nsa, rkum ngih pah kan mpeh tâm n’gor ủy, MTTQ Việt Nam n’gor, Đảng ủy rkum ăp ngih pah kan Đảng n’hanh gưl ủy geh 4,97 mông; rkum n’gâng kan ƀon lan gưl n’gor 6,13 mông; ăp ntŭk kan sự nghiệp 6,11 mông; Đảng ủy ăp xă, phường 5,21 mông n’hanh UBND gưl xă 6,17 mông. Ta Ban Mât uănh nkual wăng sa n’hanh nkual công nghiệp n’gor Khánh Hòa, Kruanh ban Trần Minh Chiến an gĭt, tă bah KPI, uĕh tam nău kan lĕ na nê̆ kơt du păng rup:

Tă bah KPI mbra rgâl âk, cán bộ saơ nău mpeh păng rup ƀư tĭng nău kan bah dĭng lĕ nhih pah kan. Biên chế mô hao, nău kan nar lơ âk. Yor rĭ, an n’hao săk rnglăy nău kan đah trong ntĭm nti, kơt dŏng công nghệ têh dăng lơn.

N’gor Khánh Hòa jêh rnglăp nsum dôl n’gluh an ăp rnoh an dŭt âk: ngăch hao jêng GRDP rĭng 11%-12%/năm; GRDP/nuĭh tâm Top 10 lam dak; wăng sa mrô geh 35% GRDP; rnoh rgâl nkual têh geh 70%. Ntŭl rlong hăn ndrel mô đêt; 2 ntŭk kol têh mpeh ntung trong (lơn lah ngih wâl mrô) n’hanh nuĭh kan uĕh blău âk, ndrel nău đă n’hao uĕh blău cán bộ. Yor rĭ, KPI tơm ndơ dŏng gay rgâl, groi nđôi ngăch ƀư tĭng ăp nău rƀŏng aơ, dŭt n’hâm jêng dữ liệu kloh rah wah. Bí thư N’gor ủy Khánh Hòa, wa Nghiêm Xuân Thành, mĭn lah KPI nkre lah ndơ mât uănh nkre lah ntung nthoi đah nău rƀŏng n’hanh săk rnglăy uĕh tĭng nar:

Nău kơt dŏng KPI mbra saơ mrô nuĭh pah kan ŭch khlay. Uănh mrô mông mbra gĭt ntŭk kan dôl rmeh mô lah mô tŏng cán bộ, dôl rmeh ndâk âk cán bộ, rmeh ta moh nău kan.

N’gor Khánh Hòa lah ntŭk bôk năp ri lam dak lah ntŭk tât kơt dŏng KPI cán bộ N’gâng kan Nội vụ lĕ ƀư trong nchrăp mbơh ƀư KPI rĭng ta lam dak ntuh kơl năm 2026 rgum đah rgâl mrô. Rnôk dữ liệu dơi joi tĭng mông nar ngăn, du samƀŭt rhăch nău mbrơi mô knŭng rlu ta nău rblang, ma hôm geh an saơ na nê̆ ta trong ndơ̆ hành chính nsum jêng ntŭk ntô tâm rlong uĕh. Kruanh n’gâng kan Nội vụ Phạm Thị Thanh Trà lah rjăp:

Chính phủ mbra an nău ntrŭnh na nê̆ mpeh uănh lah cán bộ, công chức, viên chức. Kôp rnoh an ƀư uănh lah mbra dơi ndâk ƀư ta ntŭk kơt dŏng công nghệ, tâm rgop KPI đah nău geh êng công vụ Việt Nam, tĭng ntŭk nău kan, đăp mpăn kloh rah wah n’hanh ngăn ngên. Aơ lah nkô̆ nău gay ƀư tĭng, mô hôm mĭn “biên chế lôch săk.

Du trong uănh lah di, rnoh wĕ săk rnglăy nău kan-KPI ma Khánh Hòa dôl kơt dŏng mô knŭng uĕh blău nău kan n’hanh nsrôih bah ăp ntŭk kan, êng nuĭh. Tĭng Groi Kruanh Quốc hội Nguyễn Thị Thanh, aơ lah ndơ dŏng ntrôl ƀon lan ƀư tơm ta bah dâng.

Khánh Hòa lah ngoăy tâm âk ntŭk kan hăn lor tâm ndâk ƀư KPI gay uănh lah, ndâk ƀư ntŭk pah kan, Nău uĕh ƀư tĭng yơn nkô̆ nău dŭt mhe đah ƀư ngăn ƀon lan ƀư tơm, nkre ntop nkô̆ nău dŭt mhe an ndơ dŏng ƀư ngăn ƀon lan ƀư tơm lvang rgâl mrô.

Ntơm tă bah dâng, tât n’gor, tât lam dak, Rnoh mrô wĕ săk rnglăy nău kan-KPI dôl pơk ăp trong tơm mhe tâm văn hóa săk rnglăy công vụ. Tâm dự thảo Mbơh Chính trị Đại hội Đảng bộ n’gor Khánh Hòa rơh bôk năp, KPI dơi mĭn lah ndơ dŏng kỹ thuật khlay gay ƀư tĭng nău mpŏng ŭch: jêng trong hao jêng têh bah lam dak, tât năm 2030 lah nkual ƀon têh mpeh tâm Trung ương, ntŭk pâl nđaih rhŏ ndơ dak lêng lam ntŭr neh. KPI dơi lah rjăp ta 3 nău khlay: Hăn lor tâm trong kan cán bộ; An rgâl ngăn ngên tâm uănh lah, dăp gưl; n’hanh Kơt dŏng rĭng tâm lĕ trong Chính trị, đăp mpăn kloh rah wah, di na nê̆. Aơ lah njoăt hăn bôk năp gay công vụ Việt Nam dăch lơn đah ăp nău di mhe, way kan n’hanh săk rnglăy./.