Kêng măng 10/9 ta Nhih pah kan kruanh dak, Kruanh dak Lương Cường n’hanh I ur hŏ ƀư tơm rơh wơt rgum nuĭh dơi ƀư lam lĕ rngôch Australia Sam Mostyn n’hanh I sai khâl gưl Ngih dak tât Việt Nam. Lôch ƀư wơt ngăn, Kruanh dak Lương Cường hŏ tâm nchră đah nuĭh dơi ƀư lam lĕ rngôch Australia Sam Mostyn. Bar ding an lah nău n’hao têh tâm boh lam lĕ rngôch khay 3/2024 lah du njuat hăn mô hŏ tă geh, n’hao tâm boh bar ding hun hao dăng. Bar dak lah băl tâm boh tăch rgâl têh nsum đah nsĭt geh tăch rgâl geh rlău 14 rmen USD năm 2024, rnoh âk năch pâl nđaih bar ding hao âk rlău ăp năm. Ăp doanh nghiệp bah Australia hŏ n’hanh dôl nta trong dơh gay hun hao ntuh kơl tăch rgâl ta Việt Nam.

Việt Nam hŏ nsrôih jêng ntung njŏ gay Australia n’hao dăng tâm nkrêp nsum đah nkual Đông Nam Á, rgop ntrŭt ntrôl tâm boh têh jong lam lĕ rngôch Australia – ASEAN n’hanh tâm boh ngăn ngăn đah Australia n’hanh Tiểu vùng Mê-Công. nuĭh dơi ƀư lam lĕ rngôch Australia rnê âk nău rgop khlay bah nklăp 350.000 nuĭh Việt ta Australia, bơi 40.000 sinh viên Việt Nam dôl kơt nti, gŭ mĭn ta Australia; lah rjăp tâm nđŭr ƀon lan jru hvi lah jâng nsing nâp bah tâm boh bar ding. Bar ding tâm ban ŭch an ƀư dăng lơn ăp trong n’hao dăng tâm boh wăng sa bar ding, rƀŏng tât nsĭt geh tăch rgâl 20 rmen USD n’hanh hao rlău bar tơ̆ ntuh kơl bar ding tâm ăp năm tât. Australia kan nsum tay lhăt, tâm n’grŏ tĭng nsum nău way bah Việt Nam n’hanh ASEAN tâm trong mât rnă njrăng, đăp mpăn n’hanh dah rŏng nchuăn rdeng dak lêng, trong trôk ta dak lêng; nkra nău tâm pit ma ăp trong nsing luật pháp dak bah dih./.