Kêng măng 29/7 (tĭng mông ta ntŭk), ta Ngih Liên hợp quốc ta Thụy Sỹ, nkhêp di râng Rƀŭn nchră ăp Kruanh Quốc hội lam ntŭr neh rơh tal 6, Kruanh Quốc hội Trần Thanh Mẫn lĕ geh rơh mâp đah Tổng Giám đốc Văn phòng Liên hợp quốc ta Geneva Tatiana Valovaya. Ta rơh mâp, Kruanh Quốc hội Trần Thanh Mẫn mĭn lah Việt Nam kơl hô chủ nghĩa ăp ding n’hanh mbra râng tay, rgop nar lơ âk lơn tâm ăp nău ƀư bah Liên hợp quốc.

Việt Nam dôl săch tay ƀư dak Hội đồng Nhân quyền năm kan 2026-2028, lah dơi săch Việt Nam mbra geh âk nău ƀư n’hanh mĭn ƀư mhe gay mât ƀư tơm bah ngih pah kan aơ tâm rnôk lam ntŭr neh âk nău rgâl n’hanh ntŭl rlong kơt aƀaơ. Tổng Giám đốc Tatiana Valovaya lah uĕh Việt Nam lĕ kơl ăp nău ƀư nsum bah Liên hợp quốc, tâm mbơh ƀư ăp nău rƀŏng hun hao nâp nâl. Wa uănh lah prêh nău ƀư tơm, nău kan dŭt n’hâm bah mpôl ntoh măt Việt Nam ta ăp rmôt kan Liên hợp quốc kơt tâm ăp nău kan nsum. 2 ding tâm ban ŭch ntrôl dăng tâm boh kan ndrel Việt Nam-Liên hợp quốc năm tât.