Kêng măng ntri (28/7), mpôl đại biểu gưl têh Ủy ban trung ương Mặt trận tổ quốc Việt Nam tă bah wa Đỗ Văn Chiến – Kruanh Ủy ban trung ương Mặt trận tổ quốc Việt Nam ƀư Kruanh mpôl leo hăn, hŏ geh ăp rơh mâp đah Groi kruanh Hạ viện n’hanh Kruanh Đảng Cộng sản Nhật Bản.

Ta rơh mâp Bar ding rhơn bah năp nău hun hao ngăn ngăn bah tâm boh Nhật Bản – Việt Nam n’hanh mpŏng, rơh mâp dja mbra lah rnôk uĕh gay bar ding ntrŭt ntrôl n’hanh ƀư jru hvi lơn đŏng tâm boh let năp tay. Mpeh bah nơm, wa Đỗ Văn Chiến rnê âk nău hun hao mô rlu bah tâm boh bar ding ta lĕ rngôch ăp trong kan, nsing nơm chính trị nar lơn ma âk, tâm boh dja hŏ jêng ntĭt leo lor nău dơi bah tâm boh bar ding. Wa Đỗ Văn Chiến an gĭt, Nhật Bản dôl lah băl tâm boh dâk bôk năp mpeh nău kơl hun hao ngăn (ODA) n’hanh nuĭh kan, tâl 3 mpeh ntuh kơl n’hanh pâl nđaih, tâl puăn mpeh tăch rgâl, tâm rnoh ăp băl tâm boh dak bah dih bah Việt Nam. Kruanh Ủy ban trung ương Mặt trận tổ quốc Việt Nam mpơl nău mpŏng tâm boh bar ding mbra hun hao dăng tay lơn đŏng tâm let năp tay.