N’gor Lâm Đồng dôl ntrôl ngăch ƀư dăp rgum nsum rdâk njêng Nkual pâl nđaih gưl neh dak Mũi Né tât năm 2040, uănh ngai tât năm 2050 gay wăch rgum ntuh kơl hun hao wăng sa dak lêng. Sở Xây dựng n’hanh Sở Văn hóa, Thể thao n’hanh Pâl nđaih lah 2 nhih pah kan dơi UBND n’gor Lâm Đồng jao an ƀư ăp nkô̆ hồ sơ Dăp rgum nsum Nkual pâl nđaih gưl neh dak Mũi Né tât năm 2040, uănh ngai tât năm 2050.

Nkual dăp rgum ta 3 xã, phường, lah: Phú Thuỷ, Hoà Thắng n’hanh Mũi Né đah lĕ rngôch rnoh hvi dăp rgum rlău 14.700ha. Dăp rgum ndơ̆ rnoh tât geh rdâk njêng, hun hao nkual pâl nđaih gưl neh dak Mũi Né jêng du ntŭk rgum pâl nđaih tâm ban dak bah dih, ntŭk tât bôk năp bah nkual châu Á - Thái Bình Dương. Nchroh tât năm 2030 rnoh âk năch pâl nđaih nklăp 14 rkeh tơ̆, ntŭk manh gŭ nde nklăp 41.000 jrô n’hanh neh rdâk njêng ăp nkual mât bôk kan bơi 10.000ha. Wa Võ Thành Huy, Groi Giám đốc Sở Văn hóa, Thể thao n’hanh Pâl nđaih, an gĭt, dŭt mbrơi tât nar 15/9 tât lĕ rngôch siƀŭt nchrăp dăp rgum mbra dơi ƀư lôch jêh.