Na nê̆, ta xã Ia Hiao, mih têh jŏ nar lĕ ƀư an 120 rnăk ƀon lan geh dak băm tât ta jay, 109 ha ba khay iang, 86 ha mbo, tuh n’hanh 43 ha bum lĕ chôt rôk lĕ rngôch, dak băm, khuch khat rlău 2,4 rmen prăk. Ndrel đah nău ƀư tĭng ăp trong kan ngăch ndăn mât đăp mpăn an ƀon lan, n’gâng kan ta ntŭk dôl geh uănh nđôi, dăn đă ơm an dŏng nău kan ntrơn ntŭk gŭ mhe an ăp rnăk way geh dak băm ăp năm, nkre lah đă kơl prăk ndâk nsơm nău pah kan jan sa, mât đăp mpăn nău rêh an ƀon lan.

Ta xă Ea Bung, n’gor Dak lak du đêt rnăk ta thôn 4 n’hanh thôn 12 geh dak băm, trong hăn tâm xă Ea Bung-Ia Rvê geh nkhah êng. Ta xă Ia Lốp, thôn 10 rlău thôn 11 geh nkhah êng, âk trong hăn ăp thôn 6,8,9 geh dak băm jru, trong hăn geh tăch proăt tâm đêt mông. Ta xă Tây Sơn, mih têh ƀư pĭch rlâm âk ntŭk ta trong tỉnh lộ DT646 n’hanh du đêt trong tâm thôn, tâm lŏ. Ndrel đah nĕ, geh 29 mlâm ndrôk geh klôn rdu; mper n’gar Ngih samƀŭt Mầm non công lập Phước Tấn geh rlâm jong nklăp 40 m. Aƀaơ, n’gâng kan ƀon lan lĕ rgŏ jă rmôt nuĭh mkra, ntop kơl ƀon lan n’hanh đăp mpăn ntung trong.

 Mih têh ƀư dak băm rlău 300 rnăk ƀon lan ta xã Hiệp Thạnh, n’gor Lâm Đồng. Gay ma kơl an ƀon lan ngăch đăp mpăn tay nău rêh jêng, n’gâng kan ta ntŭk geh n’hao tay cán bộ, tahen mpôl kan công an, tahen kơl an ƀon lan nchoăn rdeng ndơ bâh ntŭk ntrơn du tât ta jay ƀon lan. Ta xã dăch dak lêng Hòa Thắng, mih têh ƀư an neh choih lăp ta rnăk jay ƀon lan. Pôih tahen n’har bri Hòa Thắng rgum lĕ cán bộ, tahen kơl an ƀon lan mât kuaih ta ngih jay ntŭk gŭ rêh.