Lôch ăp nar rlu Tết Nguyên đán Quý Mão, ăp n'gor tâm nkual Tây Nguyên hŏ luh an ƀư nău kan mhe. Hŏ jêng nău way, n'gor Kon Tum du rơh luh hăn rdâk njêng ƀon lan mhe. Hôm ta Dak Lak, kruanh rđău kan ta ntŭk hŏ njêng mpôl hăn khâl, rgŏ jă ăp doanh nghiệp rlău dơi jêr jŏt, nsĭt geh nău dơi âk tâm năm 2023. Êng UBND thị xã Buôn Hồ ntơm rdâk ƀư âk ndơ kan khlay rƀŏng tât nkah ndray 15 nar njêng thị xã.

Ta rơh hăn luh kan rdâk njêng ƀon lan mhe n'hanh nkual ƀon têh kloh uĕh năm mhe Quý Mão 2023, 10 nkuâl, nkual ƀon têh n'gor Kon Tum an tĭng ƀư âk nău kan ngăn ngăn gay rdâk njêng ƀon lan mhe n'hanh nkual ƀon têh rsang rnglăy, kơt: ƀư trong bê tông thôn ƀon, ntoh măt trong mât njrăng êng nđĭr - kloh- uĕh; ndơ̆ rgâl kỹ thuật, kon si ntil an ƀon lan hun hao tuch tăm...Lah nkuâl dŭt jêr jŏt mha êng bah n'gor Kon Tum, wa Võ Trung Mạnh, Kruanh UBND nkuâl Tu Mơ Rông an gĭt, nkuâl luh kan tĭng ƀư ăp nău kan têh khlay rƀŏng tât nău geh ngăn ngăn bah nuĭh ƀon lan n'hanh nsum mpôl.

        "Lôch rgŏ jă luh hăn kan bôk năm Ủy ban nkuâl an ƀư  ăp nău kan, tâm nê rgum tĭng ƀư jăp rnoh tât bôk nău kan gưl neh dak. Ƀư rơh tăch sâm Ngọc Linh nkre đah nău kan pâl nđaih nsĭt geh âk nău dơi an ƀon lan, an doanh nghiệp n'hanh an nkuâl. Ƀư n'gâng điện mpoh ang trong thôn ƀon, đăp mpăn hăn ntung trong, gĭt blău. Luh hăn ôp uănh, mât uănh ndơ mô nâp uĕh, ndơ mplư rlăm lơn  lah ăp ndơ tăch geh tât tơm dak si Sâm Ngọc Linh. An ƀư ăp nău kan, ăp trong nchrăp kan nâp uĕh, nsĭt geh nău tam n'hanh đăp mpăn".

        Tâm ăp nar bôk năm mhe, kruanh rđău kan Tỉnh ủy, Ủy ban nhân dân, Hội đồng nhân dân n'hanh Ủy ban mặt trận Tổ Quốc n'gor Dak Lak hŏ njêng 4 mpôl hăn pah kan gay chop khâl, mâp măt cán bộ nuĭh kan du đêt công ty, đơn vị ta n'gor gay rgŏ jă, ntrŭt nsôr ăp đơn vị rlău dơi jêr jŏt, nsĭt geh nău dơi âk tâm năm 2023. Na nê̆, ăp mpôl pah kan tât khâl Công ty TNHH choh bok ao Lục Thiêm Dak Lak; Công ty TNHH cà phê Ngon; Công ty TNHH MTV Tăch n'gluh n'glăp 2/9; Ngih máy Bia Sài Gòn Dak Lak n'hanh Công ty Cổ phần pă an Dak Lak.

        Ta Nhih máy Bia Sài Gòn Dak Lak, wa Phạm Ngọc Nghị, Groi Bí thư Tỉnh ủy, Kruanh Ủy ban nhân dân n'gor ndrel mpôl hăn pah kan hŏ tât khâl nkual ƀư njêng, mâp măt, nkoch bri đah ăp công nhân n'hanh pah kan đah Ban rđău kan bah Ngih máy. Tâm năm 2022 Nhih máy hŏ nkret njêng rlău 100 rkeh lít, nôp ngân sách ngih dak an bơi 900 rmen prăk; âk bơi 10% lĕ rngôch rnoh âk nsĭt geh ngân sách bah lam n'gor. Nhih máy sŏk bơi 1 rmen prăk gay tĭng ƀư pah kan đăp mpăn lam rêh jêng kon nuĭh ta n'gor.

         Ntơh măt kruanh rđău kan n'gor, wa Phạm Ngọc Nghị - Groi Bí thư Tỉnh ủy, Kruanh UBND n'gor Dak Lak mpư rnê nău nsrôih rlău jêr jŏt bah Nhih máy Bia Sài Gòn Dak Lak tâm năm 2022, nkre mpŏng lah đah nău dơi hŏ geh tâm năm rlău aơ, Nhih máy mât uĕh tay suan dăng, ndơ nău kan ƀư njêng, tăch rgâl nsĭt geh nău dơi âk tâm let năp tay.

          Gâp ŭch rŏng ăp oh nô mât uĕh ăp nău dơi hŏ geh bah năm 2022, mhâm ƀư gay tâm rnglăp, dơn ngoăy geh ăp rgâl mhe, nău mĭn mhe mô di bia Sài Gòn ma ăp ndơ geh ƀư bah kơi bia đŏng. He n'gluh trong nchrăp hung luh tât ntŭk tăch rgâl dak bah dih đŏng, mpŏng mbra nsĭt nău geh wăng sa âk lơn, hun hao lơn. Ntơh măt an mpôl pah kan dăn an ăp oh nô ndrel rnăk wâl du năm mhe rhơn răm, đăp mpăn, hao geh têh ndrŏng n'hanh Công ty nar lơn ma hun hao uĕh lăng lơn".

    Mbah rhơn nkah ndray 93 năm nar njêng Đảng n'hanh rƀŏng tât nkah ndray 15 nar njêng thị xã Buôn Hồ, UBND thị xã Buôn Hồ, n'gor Dak Lak hŏ ntơm pơk ƀư 4 nău kan tơm khlay, rgum tâm ntung trong đah lĕ rngôch rnoh ntuh kơl nklăp 37 rmen prăk, nchrăp ƀư lôch jêh tâm quý 2 n'hanh quý 3 năm aơ. Ăp ntŭk ƀư dja gay rgop rgâl geh ntung trong, tŏng an nău ŭch geh rsong hăn bah ƀon lan. Bah nê, tĭng kơn rdâk njêng thị xã Buôn Hồ tât ăp rnoh di nkual ƀon têh ntil III tâm năm 2025 tĭng Nghị quyết Đại hội Đảng bộ n'gor Dak Lak tâl XVII.

        Wa Đặng Gia Duẩn, Kruanh UBND thị xã Buôn Hồ an gĭt, đah nău ntơm lăp ƀư bah bôk năm mhe, thị xã nsrôih dŏng geh nău tam ăp tơm ndơ ntuh kơl bah ngih dak.  Nkra, mbra ntrôl dăng wăch rgum tơm prăk ntuh kơl, nsrôih rdâk njêng thị xã Buôn Hồ jêng ntŭk rgum wăng sa, văn hoá, rêh jêng kon nuĭh bah lơ n'gor Dak Lak, rgop khlay tâm nău hun hao bah nkual jê̆:

       Đah du nău nsrôih chính trị dŭt âk ri Đảng bộ, HĐND, UBND thị xã dôl nsrôih tĭng nar, n'hanh ntơm lăp pah kan bah bôk năm tĭng ƀư ăp nău  kan rgum tơm khlay gay ăp njăr trong hăn têh hvi, nđĭr uĕh lơn, uĕh mhe lơn, di đah du nkual thị xã. Nkre, tâm let năp tay mpôl hên mbra nkra ăp ntŭk kô̆ yơn kol khan mpeh dăp rgum gay kuăl jă tay ăp nuĭh ntuh kơl, geh tay ăp ndơ ƀư têh khlay, kơl Buôn Hồ nar lơn ma uĕh mhe lơn".