Aƀaơ âk ntŭk ta trong  Quốc lộ 28B hăn let ăp xã Phan Sơn, Tà Hine n’hanh Ninh Gia n’gor Lâm Đồng lĕ geh ƀư lôch nău kan pơk hvi tay trong hăn, du đê̆ ntŭk lĕ ntơm geh tŏ chai. Tĭng nău mbơh bâh kĩ sư Nguyễn Văn Thuận, uănh groi nău kan rnoh kan mbrô 2, gay ma dơi geh ƀư ngăch, ntŭk kan an geh rgum lĕ rngôch may mok n’hanh nuĭh kan, ndăn lĕ mông nar ueh sơh gay ma ƀư lôch. “Ntŭk kan leo kan aƀaơ dôl ntrôl ngăch nau ƀư 4 ntŭk kan ƀư ndĭk hvi trong n’hanh 2 ntŭk kan tŏ chai , An geh dŏng ndăn lĕ nar ueh sơh gay ma ƀư kan an ngăch lôch”.

Nău kan ƀư mhe, n’hao nkra mhe trong Quốc lộ 28B geh nău jong rlău 68km, lĕ rnoh prăk ntuh ƀư rlău 1.400 rmen prăk, yor Cục trong neh Việt Nam ƀư tơm ntuh kơl. Aơ lah nău kan tơm, gay ma tâm rgop nthoi 2 nkual wăng sa Đà Lạt – Phan Thiết (bri n’hanh dak lêng), n’hao nău tâm rgop ta nkual n’hanh rhoăt gleh mông nar trong hăn luh nar- nhâp nar. Ntơm ƀư bâh khay 4/2024, tât aƀaơ nău kan lĕ ƀư lôch rlău 40% rnoh nău kan,. Rlău 30km trong lôch tŏ chai, 40km trong lĕ lôch n’hanh bơi tât 58km trong lĕ rli lŭ.

Ta yôk nkue Đaị Ninh- ta nkual tơm, 6 ntung ta kơh geh ngăch ndăn ƀư lôch. Wa Trần Trung Hiêú, kruanh leo tơm ƀư ntung ta kơh mbrô 3 (Công ty CP 134 Việt Nam) an gĭt, nkual neh jêr hăn ƀư an nău ntăm n’gâng dŭt jêr, roh hoach âk mông nar, yơn ta ntŭk kan hôm nha n’hao mông kan nar măng gay ma mât đăp mpăn lôch nău kan.“Ta mpeh ba dâng nkual neh jêr ƀư, dŭt jêr ir jêng nău kuaih ntu ntăm jrŏng jêr, ƀư jrŏng roh hoach âk mông nar. Tât n’gul khay mhe nơh mơ lôch, ƀư lôch ntŭk ƀư jrŏng. Tât ba lơ rĭ he n’hao mông kan nuĭh kan ƀư nar măng rĭ mbra ngăch lôch dơm n’hanh ƀư lôch di đah nar ton. Mpôl hên kan lĕ măng nar, rgum jă tay âk nuĭh kan n’hao tay nuĭh kan gay ma lôch ơm di nar pă jao ta lơ 15/12 tay”.

Tĭng nău nchrăp, nău nchrăp kan mbra ƀư lôch tâm khay 12/2025. Yơn lah, yor mih hô n’hanh jêr nău ntrơn ntŭk gŭ ta du đê̆ ntŭk hôm nha lah ăp nău jêr ngăn, mbra mô ueh tât nău ton kan ƀư lôch nsum.

Quang Sáng