Đah rnoh neh rlău 24 rbăn km vuông n’hanh rnoh nuĭh bơi tât 4 rkeh nuĭh, Lâm Đồng geh mpŏng jêng nău hun hao têh bâh nkual Duyên hải Nam Trung Bộ n’hanh Tây Nguyên. Tĭng nău nchrăp, nău kan hun hao geh ƀư tĭng pe nkual kan tơm geh nkual yôk, nkual rđŭng n’hanh pĭt dak lêng. Tâm nĕ, nkual mpeh Đức Trọng, Đơn Dương, Lâm Hà n’hanh Di Linh geh nchrăp an hun hao nkuăl ƀon têh ndrel đah ntŭk kan hành chính-chính trị bâh n’gor an ta xã Đức Trọng. Ta nkual Đà Lạt geh mpŏng an jêng ntŭk kan văn hoá, ntĭm nti, khoa học công nghệ n’hanh pâl nđaih sinh thái, rlu rlău tĭng nău mpŏng lam ntur neh.

Tĭng wa Tôn Thiện San, Giám đốc Sở Tài chính n’gor Lâm Đồng, n’gor mbra njêng 6 ntrong kan wăng sa Bắc- Nam n’hanh Đông -Tây, tâm rgop ăp kual tơm bâh yôk prêh tât dak lêng. Lĕ rnoh nău geh prăk ntuh kơl lvang năm 2026-2030 nchrăp geh rlău 1 rkeh rmen prăk, tâm nĕ prăk bah dih tơm prăk ngih dak geh tât rlău 80%. “Nău nchrăp kan ta n’gor lĕ geh uănh mpŏng an geh âk ntuh kơl ta ăp n’gâng kan, trong kan tơm, nău kan tơm, geh nău dơi têh, nău dơi tâm rlong n’hanh nău dơi njêng an hun hao mhe an n’gor. Nĕ lah ndơ dŏng ntung trong, logistic, hun hao nkuăl ƀon têh, pâl nđaih nău ueh mhe, tuch tăm dŏng công nghệ mhe, công nghiệp nkra ƀư, ŭnh nar, tăch rgâl, ntĭm nti, dak si, văn hoá, thể thao, rgâl mhe rnoh mbrô, khoa học công nghệ n’hanh rgâl mhe mĭn kan.

Wa Hồ Văn Mười, Uỷ viên Trung ương Đảng,  Kruanh UBND n’gor Lâm Đồng an gĭt, nău rgâl mhe nău nchrăp kan geh nău khlăy ngăn lôch geh dơn ngoăy pe n’gor Lâm Đồng, Bình Thuận, Đăk Nông, njêng nău kan pháp lý n’hanh nău mpŏng kan tơm khlăy an lvang rơh hun hao mhe. Kruanh UBND n’gor Lâm Đồng lah na nê̆, Lâm Đồng aƀaơ lah n’gor geh rnoh neh dŭt têh ta lam dak, geh âk nău dơi mpeh ndơ trôm neh, ŭnh nar mhe njêng, tuch tăm công nghệ mhe n’hanh pâl nđaih, yor nĕ an geh du nău nchrăp kan mhe gay ma n’hao nău dơi geh, njêng nău hun hao jŏ jong.“Rgâl nău nchrăp kan rơh aơ mpơl nău nsrôih  bâh n’gor tâm nău rgâl mhe nău mĭn hun hao, sŏk ƀon lan n’hanh doanh nghiệp ƀư tơm, sŏk nău kan khoa học công nghệ, rgâl mhe nău kan, rgâl mhe rnoh mbrô n’hanh hun hao ueh nđir ƀư nău kan tơm. Mpŏng tât nău ŭch rdâk njêng Lâm Đồng jêng ntŭk hun hao ueh nđir bâh nkual Tây Nguyên n’hanh Nam Trung Bộ. nău nchrăp kan mô dơn uănh năl nău ŭch hun hao bâh nkual Tây Nguyên ma hôm nha pơk hvi nău mpŏng uănh  jŏ jong an let năp tay, mô dơn geh sŏk dŏng săk rnglăy ăp nău dơi ơm geh ma hôm nha njêng ăp nău hun hao mhe đŏng".