Ăp nar lễ Quốc khánh, sóng radio nău ngơi Việt Nam ntoh n’gor nău rhơn, n’hao săk ndrel đah nău kahgĭt 80 năm Tết đăp mpăn bâh neh dak. Ta Tây Nguyên, ndrel đah ăp bôk nău kan vơt ngơi ngih dak, ƀon lan lơ ma nđơr rnôk geh ăp nău mbơh ngơi bâh ƀon lan nơm, nău mprơ, nău nteh chĭng gong ndrel tâm nău rhơn lễ n’hanh nău ŭch mpeh let năp tay. Nghệ sỹ ND Y San Aliô, ta ƀon Niêng, xã Ea Nuôl, n’gor Đăk Lăk nkoch:  " Kăl e nơh rnôk hăn trong jêr, mô geh ăpơ ntŭk hăn mprơ ngai đah jay, gâp way njôt radio jê̆ gay ma djăt FM, gâp ŭch ngăn, gâp djăt ƀa ƀơ ngăn. aƀaơ rĭ nău rêh lĕ mhe, mbra dơi djăt bâh internet, dŏng wifi, lơ ma dơh lơn âk đŏng. Mô dơn nău ngơi Rđe ma nău Bunong, Jarai, Anh, Pháp gâp geh djăt ƀa ƀơ ngăn. Yor gâp lah nuĭh njroh mprơ jêng rnôk djăt radio, ngăn lah ăp bôk ntuh nău mprơ gâp mbra dơi geh  âk tay nău ntop n’hao nghệ thuật n’hanh sŏk dŏng ăp nău ueh, nău di ta ăp ntil nău mprơ ntil mprơ êng êng.

        Bâh năm 1993, Radio nău ngơi Việt Nam njêng ntŭk kan radio nău ngơi Việt Nam ta Tây Nguyên, ƀư n’hanh pơk ta sóng ngih dak ăp bôk nău ngơi rnoi đê̆. Aƀaơ Radio dôl pơk sóng ăp nar 6 nău ngơi lah Rđe, Bu nong, Jarai, K’Ho, Bana, Xơ Đăng. Aơ lĕ jêng ndơ sa mô dơi mô geh, dŭt bên, kơl an ƀon lan geh gĭt nău pah kan jan sa, geh gĭt đah nău kan mhe, nkre lah geh djăt nău tâm pât, nău nkoch nđơn, nău ueh êng rnoi nơm đah nău ngơi nơm. Yuh H Thêl, ta ƀon Sar pa, xã Thuận An, n’gor Lâm Đồng ngơi." Rnăk gâp geh bên djăt Radio bâh ntơm jŏ hôm, mê̆ bŏ gâp way geh djăt jêng lah gâp djăt ƀa ƀơ ngăn , aƀaơ gâp way geh pơk ta điện thoại jêng lah dơh lơn, ăp ntŭk hăn gâp geh pơk điện thoại ma djăt, uănh ta facebook, gâp dŭt ŭch djăt nkoch nđơn ma nău ngơi Bunong, djăt radio gâp geh gĭt âk nău mhe, geh djăt nti âk nău ueh nău di, ngăn lah geh djăt ma nău ngơi nơm tay đŏng, gâp ŭch nău ngơi Bunong ta Radio nău ngơi Việt Nam geh âk nkô̆ ueh mbơh tơih an ƀon lan, gay ma ƀon lan djăt n’hanh ndrel mât rbăy nău ueh bâh nơm”.

        Lah ntŭk kan báo chí trung ương gŭ kan ta nkual, ta meng mbơh nău mhe, nkoch ăp nău rêh, nău wăng sa, rêh jêng đah ăp tác phẩm báo chí âk ntil nău, VOV Tây Nguyên hôm nha nsrôih mât rbay rgum ăp nău chĭng, nău mprơ tâm pât, ndơ uh, nkoch nđơn, mĭn uănh khoa học gay ma kơl an nău rblang n’hanh pơk sóng nău ngơi rnoi đê̆. Bâh nĕ, ăp bôk nău kan bâh radio nău ngơi Việt Nam lơ ma dăch bên, nkoch mbơh nău ueh bâh ƀon lan, ndâk nsơm nău mât rbăy n’hanh n’hao ăp nău khlăy way ơm. Nghệ sỹ Ưu tú Y Phôn Ksor, ta phường Buôn Ma Thuột, n’gor Đăk Lăk an gĭt. “Rnôk geh djăt Radio nău ngơi Việt Nam ta Tây Nguyên, gâp saơ lah an geh hăn rgum mât rbăy nchih nău, rhôp tay ăp nău nkoch nău mprơ bâh bu ranh tâm ƀon, nĕ lah huêng khlăy tơm bâh nău mprơ, bâh nău ueh êng, lah an roh mbra dŭt nsoach ngăn”.

        Lôch 80 năm hun hao, Radio nău ngơi Việt Nam lĕ jêng ntung njŏ tâm rnglăp, trĕ lam nău khlăy ueh êng bâh ƀon lan tât ngih dak. Êng Radio nău ngơi ta Tây Nguyên, lôch 32 năm pah kan, lĕ mpơl na nê̆ nău kan khlăy ta trong mât nău ngơi, nău ueh rnoi nơm. Groi giáo sư Tiến sĩ Buôn Krông Tuyết Nhung, Ngih nti Đại học Tây Nguyên uănh năl.“Tĭng nău gĭt vât bâh gâp, nkre lah đah du hê lah nuĭh Rđe, rlău 75% ăp nkô̆ nău bâh VOV lĕ geh n’hao săk rnglăy, geh ueh tât nău mĭn bâh ƀon lan,ngăn lah nău geh tât nău rêh ueh êng ăp nar, tâm nĕ geh n’hao nău khlay mpeh nău ueh êng ta ntŭk. Bâh nău mbơh tơih nău mhe đah nău ngơi nơm, geh tât ăp bôk ntuh bâh VOV, ƀon lan ăp nar lơ ma geh n’hao nău dơi ueh nău rêh bâh nơm tâm nău dơn mpeh nău kơl, mpeh nău ntrŭnh.

        Tĭng nău mbơh bâh wa Nguyễn Đình Trung, Bí thư n’gor Ủy Đăk Lăk, 6 bôk ntuh nău ngơi rnoi đê̆ dôl lah du nău dơi êng bâh VOV Tây Nguyên. Ăp bôk nău kan bâh radio geh rgâl mhe tay, n’hao tay nău mbơh tơih mpeh rnoh kơl mpôl rnoi, mpeh ăp bôk nău kan nkô̆ mpŏng ngih dak dôl n’hanh mbra geh mbơh tơih. Bâh nĕ ntop n’hao nuih n’hâm ƀon lan n’hao nău tâm rnglăp, mât n’hanh n’hao nău ueh way ơm, rdâk njêng ƀon lan n’hanh n’gor ăp nar lơ têh ndrŏng.“ Ndrel đah lam dak, Đăk Lăk lăp ta rơh hun hao mhe. gâp dŭt knơm mpôl kan ta ntŭk kan Tây Nguyên mbra geh n’hao tay nău min kan chính trị, n’hao nău blău kan báo chí ntŭk kan mbơh nău mhe khlăy, tơm bâh Đảng, Ngih dak, an geh tay âk nău tâm rgop ta trong kan rdâk njêng, hun hao n’gor Đăk Lăk n’hanh ta nkual.

             80 nă ba năp, sóng nău ngơi Việt Nam lĕ tâm rgop tât ƀon lan đah neh dak, mât rbăy n’hanh trĕ lam nău ueh ăp mpôl rnoi Tây Nguyên. Lăp ta rơh mhe, radio an geh lah tay na nê̆ nău kan hăn lor, nkre mbơh nău mhe ngăn tơm khlăy, nkre lah hăn ndrel đah âk ntŭk rêh jêng ăp mpôl rnoi ta trong mât rbăy ueh êng n’hanh n’hao nău kan nâp nâl.