Wa Rơ Lan Lết, tâm ƀon Klăh, xã Ia Mơr, n’gor Gia Lai dôl geh 2 kon hăn nti lôch nar tâm ngih săm ƀŭt Tiểu học ndrel THCS Nguyễn Văn Trỗi. Ăp nar, wa vay 4 tŏ njŭn kon, hôm ăp nar mô ru luh mir, kon păng nchon neh vah jâng sĭt ngih sông nar, ri ma jêr ngăn.

            Ndri ma, rnôk tăng xã Ia Mơ, ntuh kơl bơi tât 200 rmen gay ndâk ngih săm ƀŭt nội trú tâm neh hvi 6 ha êp Tỉnh lộ 664, đah ăp ntil jrâu nti, jrâu gŭ sông, ntŭk pâl ndrel ma trong điện, dak ndrel ngih dak si, wa Lết mô mpôn nau rhơn.  Wa rnơm lah, nkre geh ntĭm nti tâm ntŭk nâp ueh, ăp ntil lơn:

            ‘Nkoch tât ngih săm ƀŭt ri bah năp nơh ueh hôm. Ăp năm tât, n’gâng kan bar gưl ntuh kơl ƀư ngih săm ƀŭt nội trú ân kon nơm, ngih săm ƀŭt mhe ri rhơn ngăn. Kônh wa ƀon lah kŏ rhơn, kŏ ueh ngăn”.

            Mô êng me mbŏ kon se, nai ntĭm kŏ rhơn đŏng. Nai nti Ngô Văn Vững, Groi Hiệu trưởng ƀư kan tâm Ngih săm ƀŭt Tiểu học ndrel THCS Nguyễn Văn Trỗi, xã Ia Mơr mbơh, tâm nkuăl geh âk ngih săm ƀŭt ngai 18 km, ƀư kon se tâm ntŭk jru, ngai hăn ngai mô lah hăn tât n’gor êng mơ geh nti. Ndri ma, lah geh ngih săm ƀŭt bar gưl nti, mra dơi rklaih nau jêr mô tŏng kon se hăn nti, n’hao rnoh nâp ntĭm nti đŏng:

            “Rhơn ngăn. Nchrăp ngih săm ƀŭt mra geh ntŭk mhe, nâp ueh lơn, ăp ntil ndoh ndơ dŏng ntĭm, nti, âk jrâu ƀư nau kan ma ngih săm ƀŭt dôl ma mô tŏng. Kơt rti ngih săm ƀŭt mra ƀư dơi tâm du ntŭk. Nau nê mra kơl an n’hao nau nâp ntĭm nti’.

            Ndrel ma xã Ia Mơr, UBND xã Ia Púch, n’gor Gia Lai hŏ săch neh 5 ha tâm ƀon Gòng, ntŭk nơih ma trong hăn, gay nchrăp ntŭk ndâk ân kon se gŭ nti bar gưl tâm rlau 730 kon se ntơm jrâu 1-5 ndrel ntơm 6-9. Nchrăp mra geh 24 jrâu nti, 14 ntŭk ntĭm nti bộ môn ndrel thư viện, jrâu mbơh nau ntĭm nti, ngih ƀư nau kan, ntŭk nti thể thao, ngih gŭ, ngih ân nai ntĭm nti ndrel ăp ntŭk ri geh tâm ban ăp. Nai nti Phan Thành Tiến, Hiệu trưởng ngih săm ƀŭt Tiểu học ndrel THCS Phù Đổng, xã Ia Púch, mbơh:

            ‘Nau kan ngih săm ƀŭt nội trú bar gưl kơt aơ tâm di ngăn. Kon se nti lah oh kon bah ăp công nhân ƀư kan tâm ăp nông trường, rmôt ƀư nau kan ngăn lah âk ngăn. Êp nê, rnoh kon se rnoi mpôl đê̆ kŏ âk đŏng, geh rlau 67%. Rnôk ma ntrŭnh ƀư ngih săm ƀŭt nộih trú bar gưl, ri pơk trong ân ăp kon se geh nau dơi hăn nti ueh lơn”.

            Tĭng rnoh kơp, nkuăl n’har bri mpeh ba lơ n’gor Gia Lai rnôk aơ geh rlau 9.400 kon se. Tâm nê geh 54,65% lah kon se rnoi mpôl đê̆. Tĭng nau ntrŭnh bah Bộ chính trị mpeh ntuh kơl ndâk ăp ngih săm ƀŭt nội trú bar gưl tiểu học ndrel THCS tâm 248 xã n’har bri geh neh têh hvi rđil ma lam dak, nchrăp n’gor Gia Lai mra geh ntuh kơl nklăp 1.200 rmen ƀư tâm 7 xã mpeh ba lơ.

            Ntơm bah bôk khay 7 năm 2026 tât rnôk aơ, UBND n’gor hŏ rđau n’gâng kan ntĭm nti tâm rgop nsum đah n’gâng kan ƀư kơp uănh n’hêl mpeh neh, nkre ăp nau mât nau kan ndal ƀư jêh săm ƀŭt gay năn ndâk. Nchrăp, du đê̆ ntŭk mra geh ndâk nkre tâm dŭt năm 2025.  Wa Phạm Anh Tuấn, Groi Bí thư UBND n’gor Gia Lai đă ăp xã ƀư ndal săm ƀŭt tât neh ntu ndrel ngih săm ƀŭt mra ndâk ơm:

            ‘Đă ăp rmôt, ăp ntŭk kan nkuăl gay ƀư nkre săm ƀŭt tât neh, nau ƀư jao, veh, trok tâm. Bah năp măt sŏk ân ngih săm ƀŭt nội trú, ƀư nkre tâm khay 9 gay khay 10 năm 2025 ri geh nkra mẫu bah N’gâng kan ndâk njêng nê lah n’gor ƀư nkre”.

            Đah nau nsôih nê, ăp ngih săm ƀŭt nâp, ueh mhe tâm nkuăl neh n’har bri jêr jŏt bah n’gor Gia Lai dôl nar lơn ma tât jêng nau kan geh ngăn, pơk luh du nau ueh mpeh ntĭm nti lơn ân ăp rơh mom./.