Ta ntŭk ndranh XL02, Nău nchrăp ƀư gưl 3, lvang xă Tân Tiến n’hanh Vụ Bổn (n’gor Đắk Lắk), âk ndeh lu, ndeh ben, măy tuh chai ndrel rlău 30 nuĭh kan, kỹ sư mpeh tâm Công ty CP xây dựng Tân Nam mbơh ƀư tuh chai rơh 2 măt trong. Nô Cao Văn Hoành, phung pah kan Rmôt tuh chai công ty nkoch, n’gul năm bah năp nô knŭng sĭt khâl jay du tơ̆, hôm ƀa ƀă geh măt ta ntŭk kan ndâk ƀư trong. Nô Cao Văn Hoành an gĭt.

Gâp tĭng ntŭk kan geh 6 khay hôm, oh nô tâm rmôt tuh chai aƀaơ dôl rgum tuh chai măt trong dăp 1 n’hanh dăp 2. Mpôl hên knŭng rlu ăp nar mih sial, hôm ƀa ƀă lah ƀư na nao ăp ca.

Wa Phan Xuân Phú, Kruanh ntĭm rđău ndơ ndranh xây lắp 2 (nău nchrăp ƀư gưl 3, Công ty CP xây dựng Tân Nam) an gĭt, ndơ ndranh nklăp 1.200 rmen prăk, jong 15km, hăn rlău ăp xă Tân Tiến, Vụ Bổn n’hanh Ea Knếc (n’gor Đắk Lắk). Aƀaơ ƀư dôl mbrơi nkôp đah trong nchrăp, jêng công ty lĕ rgŏ jă rlău 120 ndeh rklư, ndrel 200 phung pah kan, kỹ sư ndâk ƀư măng nar tâm pă mông, ƀư n’ăp nar rlu, nar lễ gay ntop ngăch. Ăp ntil ndơ ƀư khlay ndâk ƀư geh tuh chai dăp 1, 2, ndâk ƀư trong rgum ƀon lan hăn, mpêr n’gar đăp mpăn trong hăn; nkre công ty geh nău kơl ntrŭt nsôr, ntop kơl nuĭh pah kan.

Oh nô công ty dôl ƀư na na lễ “3 ca, 4 kíp”, n’hanh nău kơl prăk nkhôm dơi công ty tŏng ăp trok tĭng nău ntrŭnh.

Ta Nău nchrăp ƀư gưl 2 yor Bộ Xây dựng ƀư tơm ntuh kơl rlău ăp xă Krông Á, Yang Mao n’hanh Cư Pui, mông nar ndâk ƀư n’gŭr răm mô đêt. Nô Nguyễn Đình Cường, kỹ sư ndâk ƀư mpeh tâm Công ty CP Tập đoàn Đạt Phương, ntŭk kan ndâk ƀư ndơ ndranh XL03 đah 3 ntung thơl n’hanh 1 trong mŭr trong jong 2km rlău xă Cư Pui (n’gor Đắk Lắk) nkoch, aơ lah ndơ ndranh rlău ntŭk jêr njê ngăn trong. Lĕ rngôch rnoh neh ndâk ƀư geh tâm bri jru, ntŭk ntô yôk yang. Du nar công ty dôl tâm pă hang rhiăng nuĭh kan ndrel âk ndeh rklư, măy mŏk ndâk ƀư ntung n’hanh nkra trong mŭr.

Aƀaơ 100 nuĭh dôl ndâk ƀư tuh bê tông măt ntung ta Km64 lvang rlău xă Cư Pui; nklăp 200 nuĭh êng ri tâm pă ƀư 2 rmôt ndâk ƀư mbăk ăp nthoi n’gâng ntung. Mpôl hên nsrôih ƀư n’ăp lễ, nar rlu gay m’hâm ƀư tât 30/6/2026 mbra soih lĕ ăp ntung n’hanh trong mŭr.

Wa Phạm Văn Hòa-Groi Giám đốc Mpôl mât uănh nău nchrăp ƀư ntuh kơl ndâk ƀư ndơ dŏng Lŏ mir n’hanh ntung trong n’gor Khánh Hòa mbơh, aƀaơ ntŭk kol mpeh sŏk neh ta Nău nchrăp ƀư gưl 1 rlău n’gor Khánh Hòa yor mpôl mât uănh ƀư tơm ntuh kơl lĕ dơi dôh rklaih. Ntŭk kan dôl ntĭm rđău ăp nuĭh ndranh rgum lĕ soan tâm pă ndeh rklư, măy mŏk ndrel nuĭh ndâk ƀư gay ntop ngăch geh mbrơi n’ăp tâm trôk nar mô uĕh.

Jêr jŏt têh ngăn lah sŏk neh ri jêh hôm, yơn ƀư tâm yan mih ri mbra dŭt jêr jŏt n’hanh an tâm di. Ăp nuĭh ndranh dŏng trong nking dak đah trong kuih rbông hoch dak gay rnôk soăt dak ngăch ri ƀư tay. Nuih n’hâm “rlet rlău duh dăng mih” ri oh nô nsrôih gay dơi geh nău đă n’gluh an.

Wa Trương Công Thái, Groi Kruanh UBND n’gor Đắk Lắk, mĭn lah bôl ngăch ƀư ta Nău nchrăp ƀư gưl 3 mhe geh nklăp 80%, jêng mbrơi nklăp 20%, yơn đah nuih n’hâm pah kan ndăn, mô nar rlu, nău rƀŏng soih ndeh lam trong ta dŭt năm 2025 jêh lĕ rngôch. Wa Trương Công Thái an gĭt:

Đắk Lắk dôl tâm yan mih, mpôl hên ntĭm rđău nuĭh ndranh ndâk ƀư trong nchrăp tuh chai măt trong rnôk bri mô mih; lah mih ri ndăn tuh jrŏng n’gar, bê tông gay pă trong hăn n’hanh trong mpêr n’gar đăp mpăn ntung trong. Đah dŭt n’hâm âk, mpôl hên ton mbra soih luh ndeh ta dŭt năm 2025.

Đah dŭt n’hâm n’hâm âk bah nuĭh tơm ntuh kơl, trong têh hăn ngăch bôk năp nthoi bri đah dak lêng ta Nam Trung Bộ mbra jêh tâm năm 2027, pơk luh dơi hun hao wăng sa-rêh jêng, hăn ndrel đah đăp mpăn mât njrăng bri dak-rnă njrăng tâm nu nău jêh nglăp nsum.