Kêng măng 15/9, ta Jay Quốc hội ƀư Tâm nchră đah Ban Thường vụ Đảng ủy Quốc hội n’hanh Ban Thường vụ Đảng ủy Chính phủ gay nchrăp an Rơh hop tâl 10, Quốc hội khóa XV. Kruanh Quốc hội Trần Thanh Mẫn an gĭt, rơh hop mbra ntơm pơk nar 20/10 n’hanh nchrăp mpôch dŭt nar 12/12.

Nchrăp, Quốc hội mĭn uănh, n’glêh an 45 trong nchrăp luật, nghị quyết mpeh pah kan njêng pháp luật; 13 rmôt nkô̆ geh tât wăng sa- rêh jêng kon nuĭh, ngân sách, groi nđôi n’hanh ăp nkô̆ nău khlay êng ƀa ƀă; nkre, ăp nhih pah kan njuăl 13 rmôt siƀŭt mbơh gay đại biểu gŭ mĭn. Yơn lah, tât aƀaơ mhe geh 16/45 nkô̆ njêng pháp luật dơi Ủy ban Thường vụ Quốc hội an nău rgop. Kruanh Quốc hội dăn đă ăp Bộ trưởng, Kruanh Hội đồng Dân tộc n’hanh ăp Chủ nhiệm Ủy ban grêt dăch, tĭng tât dŭt rnôk nchih rgum, mbơh rblang n’hanh uănh năl di tay ăp trong nchrăp luật gay đăp mpăn săk tam, năn ngăch, rgop n’hao nău dơi kan njêng pháp luật.